Аҟәа. Рашәарамза 3, 2024 шықәса. Аԥсныпресс. Аԥсны Жәлар Реизара-Апарламент Аиҳабы Лаша Ашәба Урыстәылатәи Афедерациа Аҳәынҭқарратә Дума Ахантәаҩы Виачеслав Володин Аҳәынҭқарратә Дума ааԥхьарақәа быжьба рдепутат, жәларбжьаратәи аусқәа рзы Адума акомитет алахәыла, Асовет Еидгыла Афырхаҵа, Урыстәылатәи Афедерациа Афырхаҵа Артур Чилингаров иԥсҭазаара дахьалҵыз инамаданы дидышшылеит.
«Артур Николаи-иԥа Чилингаров – адунеи аҿы зыхьӡ нагаз аҵарауаҩ, агеографиатә наукақәа рыҭҵааҩы, апрофессор, академик иԥсҭазаара алҵра – уи дыздыруаз зегьы, инаигӡоз анаукатә, ауаажәларратә, аҳәынҭқарратә усура атәы здыруаз зегьы рзы цәыӡ дууп.
Аԥсны Артур Николаи-иԥа Чилингаров иналукааша Урыстәыла анаукатә елита ахаҭарнаки зхыԥша дуу урыстәылатәи аполитики раҳасабала ибзианы дырдыруан. Артур Николаи-иԥа ҳтәыла аҩыза иакәын, урыстәыла-аԥснытәи аимабзиаратәи аусеицуратәи апарламентбжьаратәи аизыҟазаашьақәеи аимадарақәеи рырӷәӷәара акыр дацхраауан», - ҳәа иазгәаҭоуп адышшыларатә цҳамҭа атекст аҿы.
Лаша Ашәба Аԥсны Жәлар Реизара-Апарламент адепутатцәа рыхьӡала Артур Никрлаи-иԥа Чилингаров иуацәеи иҭынхацәеи дрыдышшылеит.
