Аҳәынҭқарра Ахада иара убас игәеиҭеит ҳазҭоу ашықәс ажьырныҳәамзазы ихацыркыз аӡымҩахгага асистема аиҭашьақәыргыларатә усурақәа рымҩаԥысшьа. «30 шықәса рыҩныҵҟа аӡы ахыбра аҵаҟа еизон аканализациа асистема хада ахьыҟамыз азы»,- ҳәа Ахада адырра ииҭеит анардадкылаҩ ихаҭарнак Сосо Кәыбраа. Арҭ аусурақәа хыркәшахоит мызкала.

Аҳәынҭқарра Ахада Аслан Бжьаниа ҷыдала азҿлымҳара аиҭеит аиҭашьақәыргыларатә усурақәа рхаҭбзиара. «Ҳара уиаҟара амал змоу тәылам, изныкымкәа аиҭашьақәыргыларатә усурақәа мҩаԥаҳгартә еиԥш», - ҳәа иҳәеит Аҳәынҭқарра Ахада, насгьы атәылахьчара аминистр идиҵеит уи ҷыдала хылаԥшра аиҭарц азы. «Ари арратә хәышәтәырҭа ада ыҟаӡам ареспубликаҿы, убри аҟынтә аҳәынҭқарра иахәҭоу хылаԥшра анаҭалоит уи аҿиара аус» ,- ҳәа иҳәеит Аҳәынҭқарра Ахада.

Аныҟәарақәа рхыркәшамҭазы Аслан Бжьаниа ахәышәтәырҭа ҳамҭас иаиҭеит еиҭаҵуа аультрабжьтәы диагностика аппарат. Аҳақьым хада Ахада иҭабуп ҳәа иаиҳәеит хәы змаӡам аҳамҭазы, иазгәеиҭеит ахәышәтәырҭазы уи иамоу аҵак ду.

«Амобилтә диагностикатә лшарақәа раԥҵара амедицинатә усзуҩцәа алшара рнаҭоит апалатақәа рыҟны агәаҭарақәа рымҩаԥгаразы, иузеиҭамго, зхы иамыхәо ачымазцәа рзы акыр ихәарҭоуп, иара убас амедицинатә цхыраара ласны, ахаҭабзиара аманы амҩаԥгара аус аҟынгьы», - ҳәа УЗИ уахгьы-ҽынгьы аус шауло азгәаҭаны иҳәеит иара.

Ахәышәтәырҭа аусзуцәа Аҳәынҭқарра Ахада иҭабуп ҳәа иаҳәаны, иазгәарҭеит аультрабыжьтәы мыруга ҿыц ахәышәтәырҭа аусура ахаҭабзиара акыр ишеиӷьнатәуа.