Аҟәа. Ажьырныҳәамза 10, 2024 шықәса. Аԥсныпресс. 2008 шықәсазы ииз аспортсменцәа рыла еилоу Аҟәатәи «Динамо» акоманда аӡынтәи атурнир «Dagomys Cup» аҿы аиааира агеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.

Афинал аҿы аԥснытәи акоманда Ашьапылампылтә Клуб «Спартак» (ақ. Краснодар) иаиааит.

Атурнир иреиӷьу абжахьчаҩыс далкаахеит Доминик Шьакаиа, иреиӷьу амбахьчаҩыс - Ален Хонелиа.

Акоманда азыҟаиҵоит Мераб Кәакәаскьыр.

Атурнир Дагомыс,  ажьырныҳәамза 5 - 10 рзы имҩаԥысуан.  

Аҟәа. Ажьырныҳәамза 10, 2023 шықәса. Аԥсныпресс. Ақәыларазы ахара рыдҵоуп Дәрыԥшь ақыҭан инхо ҩыџьа ауаа, иара убас урҭ ирыцыз   – Ҟәланырхәа ақыҭан инхо Ефрем Заур-иԥа Ешба, ҳәа адырра ҟанаҵоит атәыла аҩныҵҟатәи  аусқәа Рминистрра апресс-маҵзура. 

Ефрем Ешба (1984 ш.ииз) Гәдоуҭа  ақалақь аҿы дааныркылеит, уи иҟаиҵаз азы иҿы иқәшаҳаҭхеит.

Гагра араион Алаҳаӡы ақыҭан ашьусԥшааратә усбарҭа аусзуҩцәа Гәдоуҭа араион аҩныҵҟатәи аусқәа Русбарҭа ауаажәларратә шәарҭадара амилициеи аоперативтә еилазаареи рыцны  имҩаԥыргаз аоперативтә ԥшааратә  усмҩаԥгатәқәа раан иааныркылеит 1975 шықәсазы ииз Тәанба Владимир Витали-иԥа, 1977 шықәсазы ииз Тәанба Заур Тарас-иԥа. Уи данааныркылоз аамҭазы имҩаԥгаз хаҭала игәаҭараан иӷьычыз амобилтә ҭел идырбалеит. 

Ашьаустә материалқәа рыла, Ефрем Ешба, Владимир Тәанба, Заур Тәанба, Ефрем Ешба ириҭаз адырра ала, заанаҵы ицәыҵеицәажәаны, атәым мазара ампыҵакра, ахәҭакахьала иҭииз амандаринақәа ирыҭныхыз аԥаратә хархәагақәа ргара хықәкыс иҟаҵаны ақәылара аԥшьыргеит.   

Ахара зду ауаа Ҟәланырхәа ақыҭахь рхы дырхеит. Араҟа урҭ ахәлара иазыԥшит. Анаҩс Заури Владимири Тәанаа алашьцара рҽалакны ааха зауз аамҭала дахьаанкылаз ахатәы ҩны иҩналеит. Урҭ  1957 шықәсазы ииз аԥҳәыс, аԥара рылҭарц азы илықәлеит. Заур Тәанба лабала, ҭаҷкәымла аԥҳәыс длысуа далагеит, Владимир  Танба – аԥҳәыс лнапқәа ҳәызбала ахәрақәа аниҵеит.  Аԥара анырмоу ашьҭахь, ацәгьоуцәа  ирымԥыхьашәаз амобилтә ҭел аашьҭыхны, ааигәа ирзыԥшыз Ефрем Ешба имашьынала аҭыԥ аҟынтәи рҽырӡеит.  

Аҟәа. Ажьырныҳәамза 10, 2023 шықәса. Аԥсныпресс. Атәыла аҩныҵҟатәи аусқәа Рминистрра Автоҳәынҭинспекциа Аусбарҭа анапхгаҩцәа –  Автоҳәынҭинспекциа Аусбарҭа анапхгаҩы ихаҭыԥуаҩцәа Асҭамыр Ҭаниеи Рауль Ҳагбеи Гәдоуҭа араион аҩныҵҟатәи аусқәа Русбарҭа  Автоҳәынҭинспекциа ахатәы еилазаара алархәны анҭыҵтәи аусуратә еилатәара мҩаԥыргеит, ҳәа адырра ҟанаҵоит атәыла аҩныҵҟатәи аусқәа Рминистрра аофициалтә саит.

2023 шықәсазы Гәдоуҭа араион аҿы зегьы реиҳа аԥстәбара зцу амҩатә машәыртә хҭысқәа ҟалеит. Урҭ ирыхҟьаны 25-ҩык  ҭахеит.

Автоҳәынҭинспекциа Аусбарҭа аҿы ари агәҭынчымра узцәрызго астатистика амзысқәа жәпакы ирыдҳәалоуп ҳәа ирыԥхьаӡоит. Ахәҭакахьала, уахь иаҵанакуеит Автоҳәынҭинспекциа аусзуҩцәа рганахьала аҭыԥ змоу агхақәагьы уахь иаҵанакуеит. Гәдоуҭа араион аҩныҵҟатәи аусқәа Русбарҭа  Автоҳәынҭинспекциа ахатәы еилазаара амҩақәа рҿы ашәарҭадара ашьақәыргылара азы ганрацәала аусура арӷәӷәара азы ахыдҵақәа рзықәыргылоуп.

Аҟәа. Ажьырныҳәамза 9, 2024 шықәса. Аԥсныпресс. Изакәанымкәа анаркотикатә маҭәашьарқәа рыдгалара азы ахара рыдҵоуп хҩык Аԥсны ауааԥсыра.  

Аоператив-ԥшааратә усмҩаԥгатәқәа рымҩаԥгараан аҳҭнықалақь аҩныҵҟатәи аусқәа Русбарҭа ашьаусԥшааратә ҟәша аусзуҩцәа дааныркылеит 2000 шықәсазы ииз Сыҷынаа Алиас Феликс-иԥа. Абри атәы аанацҳауеит ареспублика аҩныҵҟатәи аусқәа Рминистрра апресс-маҵзура.

Сыҷынаа Алиас имхыз амедицинатә шприц иҭаз агәырлаҵаратә еилаҭәа, имҩаԥгаз аекспертиза инақәыршәаны, «метадон» ҳәа изышьҭоу анаркотикатә маҭәашьар ауп.  Анаҩс аҭира хықәкыс иҟамҵаӡакәа изакәанымкәа анаркотикатә маҭәашьар аахәареи адгалареи аиагареи рзы, Сыҷынаа Алиас Феликс-иԥа иганахьала ашьаусеилыргара хацыркуп. Сыҷынаа Алиас ахьырхәра аҳасабала аҭыԥ дшахымҵуа азы ашәҟәы инапы аҵарҩуп.

Гагра ақалақь аҿы Араион аҩныҵҟатәи аусқәа Русбарҭа ашьаусԥшаара аҟәша аусзуҩцәа Гәылрыԥшь араион аҿы инхо,  1983 шықәсазы ииз Каарес Роберт Виктор-иԥа анаркотикатә маҭәашьар идырбалеит.

Роберт Каарес идырбалеит амедицинатә шприцқәа ҩба ирҭаз, «мефедрон» ҳәа изышьҭоу  анаркотикатә маҭәашьар.

Анаҩс аҭира хықәкыс иҟамҵаӡакәа изакәанымкәа анаркотикатә маҭәашьар аахәареи адгалареи аиагареи рзы Роберт Каарес иганахьала ашьаусеилыргара хацыркуп.  Уи аҭыԥ дшахымҵуа азы ашәҟәы инапы аҵарҩуп.

Аҟәа. Ажьырныҳәамза 9, 2023 шықәса. Аԥсныпресс. Амилициа аусзуҩцәа Очамчыра инхо, 1992 шықәсазы ииз Марганиа Емиль Оҭар-иԥа анаркотик рацәа имхуп ҳәа аанацҳауеит Аԥсны аҩныҵҟатәи аусқәа Рминистрра апресс-маҵзура. Аҩныҵҟатәи аусқәа Рминистрра аексперт-криминалисттә Центр иҟанаҵаз аҭҵаара инақәыршәаны, ахаҵа идырбалаз анаркотикатә маҭәашьар «мефедрон» акапан 3 грамм рҟынӡа инаӡоит.  

Емиль Марганиа Гагра араион аҩныҵҟатәи аусқәа Русбарҭа ашьаусԥшааратә ҟәша аусзуҩцәа  Гагра ақалақь иахьаҵанакуа ареидтә усмҩаԥгатәқәа рымҩаԥгараан даанкылан.  

Аҟәа. Ажьырныҳәамза 9, 2024 шықәса. Аԥсныпресс. Цандрыԥшьтәи акоманда «Саӡаа»  ашьапылампыласыҩ қәыԥшцәа ажьырныҳәамза   6 – 8 рзы  афедералтә ҵакыра «Сириус» аҿы имҩаԥысуаз  атурнир «Қырсаныҳәазтәи Ахраҿа» аԥхьахәқәа ргеит, ҳәа адырра ҟанаҵоит атәыла аҿари аспорти русқәа рзы аҳәынҭқарратә Еилакы апресс-маҵзура.

2013 шықәсазы ииз ашьапылампыласыҩцәа атурнир аҿы аиааира ргеит. Атурнир иреиӷьу ахәмарҩы ҳәа далкаахеит Баграт Ҭарба, иреиӷьу ажәылаҩ ҳәа – Леон Хастиан.

Акоманда азыҟарҵоит Гәырам Ԥкьыни Ара Казариани.

Аҟәа. Ажьырныҳәамза 9, 2024 шықәса. Аԥсныпресс.  Аԥснытәи ашьапылампыласҩы, гәдоуҭатәи «Риҵа» ааӡамҭа, Апрфессионалтә шьапылампылтә Клуб «Динамо» (ақ. Ставрополь) ижәыло абжахьчаҩ Лука Багаҭелиа Воронеж ақалақь ахь ахәаԥшразы ааԥхьара иоуит. Лука Багаҭелиа урыстәылатәи иԥхьагылоу алига аклуб «Факел» дацны Ҭырқәтәылаҟа актәи аизгарақәа рахь дцоит.  Абри азы адырра ҟанаҵоит аҿари аспорти русқәа рзы аҳәынҭқарратә Еилакы аофициалтә саит.

«Аԥхынтәи аизгарақәа раан ҳара ҳкомандеи  акоманда «Ахмати» рыбжьара аиҩызаратә матч мҩаԥган.  Грозныи ақалақь аҟынтәи акоманда азыҟаҵаҩ  хадас усҟан дыҟан Сергеи Ташуев. Уи ицхырааҩ Виачеслав Молчанов ахәмарра ашьҭахь даасыдгылан ус иҳәеит: «Ҳара уара уаҳгоит». Анаҩс Сергеи Ташуеви Виачеслав Молчанови аклуб «Факел» ахь ииасит, аха сыхәмарра иазҿлымҳан. Сара аҭакԥхықәра шсыду сдыруан, аматчқәа зегьы рҿы исымоу астиль сҽақәыршәаны изласылшоз ала акоманда азы ибзианы, схәарҭаны сҟаларц азы ахәмарра сҽазысшәон. Сыгәра згаз ахәмарыҩцәа, азыҟаҵаҩцәа, аспорт абзиабаҩцәа, уҳәа зегьы рзы исылшоз ала сықәԥон.  Аааԥхьара аиашазы даараӡа гәахәара дула исыдыскылеит. Аизгарақәа ажьырныҳәамза 9 рзы иалагоит, сара сҿаԥхьа ахықәкы ҳаракқәа ықәсыргылоит. Даара сгәыӷуеит сыгәҭакқәа рынагӡара сылшап ҳәа», – еиҭеиҳәеит Лука Багаҭелиа.

Иара ишеиҭеиҳәаз ала, Ставрополь ақалақь аҿы иара адгылара иоуит.

Аҟәа. Ажьырныҳәамза 9, 2024 шықәса. Аԥсныпресс.  Иреиҳаӡоу аспорттә ҟазара Ареспубликатә школ акоманда – аҭыԥҳацәа ркомандақәа рыбжьара амҵәышәмпыл азы Аԥсны Ахраҿа агеит, ҳәа адырра ҟанаҵоит Аԥсны аҿари аспорти русқәа рзы аҳәынҭқарратә Еилакы апресс-маҵзура.

Афинал аҿы Иреиҳаӡоу аспорттә ҟазара Ареспубликатә школ акоманда асчиот 64:49 ҳәа акоманда «Аԥсны амҵәыжәҩақәа» иаиааит.  Ахԥатәи аҭыԥ ааннакылеит акоманда «Спартак 2», уи асчиот 62:45 ҳәа Афонҿыцтәи акоманда иаиааит.

Атурнир иреиӷьу ахәмарыҩцәа ҳәа иалкаахеит Алексиа Кәыҵниа, (Иреиҳаӡоу аспорттә ҟазара Ареспубликатә школ акоманда), Ева Гәыбаз («Аԥсны амҵәыжәҩақәа»), Камилла Занҭариа («Спартак»). Дарина Каҷарааԥҳа – зегь раасҭа далкаахеит (MVP - аред. азгә.)

Аҟәа. Ажьырныҳәамза 8, 2024 шықәса. Аԥсныпресс.  Аибашьра иадҳәалоу 11 категориа ирыҵақакуа атәынчаҩцәа ажьырныҳәамза 2024 шықәса инаркны иназыцҵоу атәынчахәы роулоит. Абри азы адырра Аԥсныпресс ахь иҟаиҵеит Аԥсны Атәанчаратә Фонд ахантәыҩы Денис Гәылариа.

Иааизакны иҳараку атәанчахәқәа зауа рзеиԥш хыԥхьаӡара–  5 174 -  ҩык рҟынӡа инаӡоит.

Атәынчахәқәа рыцҵара азы мызказы инацҵаны иаҭаххоит 45  млн. мааҭ, шықәсык азы - 550 млн. мааҭ инарзынаԥшуа.  

2 000 мааҭ рыла ртәынчахәқәа шьҭыххоит абарҭ акатегориақәа ирыҵанакуа атәанчаҩцәа:

Аперсоналтә тәанчахәы зауа атәанчаҩцәа – 73-ҩык, урҭ ртәанчахәы ахышәа-ҵышәа – 12 000 мааҭ рҟынӡа инаӡалоит;

Аперсоналтә тәанчахәы зауаз, зыԥсҭазаара иалҵыз атәанчахәы иҭаацәа – 31 - ҩык, урҭ ироуло атәанчахәы ахышәа-ҵышәа – 12 000 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра I агәыԥ иаҵанакуа аинвалидцәа – 310 -ҩык, урҭ ироуло атәанчахәы ахышәа-ҵышәа – 12 000 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра II агәыԥ иаҵанакуа аинвалидцәа – 2316-ҩык,  урҭ ироуло атәанчахәы ахышәа-ҵышәа – 9 500 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра III  агәыԥ иаҵанакуа аинвалидцәа – 95-ҩык,  урҭ ироуло атәанчахәы ахышәа-ҵышәа – 8 500 мааҭ рҟынӡа инаӡалоит;

1992-1993 шш. Аԥсны жәлар Рџьынџьтәылатәи еибашьра аҿы иҭахаз рҭаацәа,  I агәыԥ иаҵанакуа – 25-ҩык, урҭ ироуло атәанчахәы ахышәа-ҵышәа – 12 000 мааҭ рҟынӡа инаӡалоит;

Зыԥсҭазаара иалҵхьоу 1992-1993 шш. Аԥсны жәлар Рџьынџьтәылатәи еибашьра аинвалидцәа рҭаацәа,  II агәыԥ иаҵанакуа – 51-ҩык, урҭ ироуло атәанчахәы ахышәа-ҵышәа – 9 500 мааҭ рҟынӡа инаӡалоит;

Зыԥсҭазаара иалҵхьоу 1992-1993 шш. Аԥсны жәлар Рџьынџьтәылатәи еибашьра аинвалидцәа рҭаацәа,  III агәыԥ иаҵанакуа – ҩыџьа, урҭ ироуло атәанчахәы ахышәа-ҵышәа – 8 500 мааҭ рҟынӡа инаӡалоит;

Аҟәа. Ажьырныҳәамза 8, 2024 шықәса. Аԥсныпресс.  Ԥхынҷкәынмза 27 инаркны атәыла аҩныҵҟатәи аусқәа Рминистрра  русбарҭақәа хабарда ибжьаӡыз Софииа Олеиник лыԥшааразы аоператив-ԥшааратә усмҩаԥгатәқәа мҩаԥыргоит.

Уажәазы иҟоу адыррақәа рыла, ажьырныҳәамза 7 рзы  Софииа Олеиник дырбон Очамчыра араион Аӡҩыбжьа ақыҭан.

Макьаназы Софииа Олеиник дахьыҟоу аҭыԥ еилкааӡамкәа иаанхоит, ҳәа адырра ҟанаҵоит аҩныҵҟатәи аусқәа Рминистрра апресс-маҵзура.