Аҟәа. Ԥхынҷкәынмза 23, 2022 шықәса. Аԥсныпресс.  Аԥыза-министр Алеқсандр Анқәаб Очамчыра араион Баслахә ақыҭа ахада Даур Пагавеи араионтә Еизара адепутат Коба Ҷыҭанааи идикылеит.  Урҭ аԥыза-министр Аалӡга ақыҭа аӡышьҭра аҿы иҟаз адамба аилыбгара иахҟьаны 30 инарзынаԥшуа анхарҭақәа аӡы рықәлара ашәарҭара ыҟоуп ҳәа адырра ҟарҵеит.

Ақыҭа ахада иара убас ақыҭа школ аиҭашьақәыргылареи аспорттә плошьадка аргылареи рзы аԥыза-министр иахь аҳәара ҟаиҵеит.

Аҟәа. Ԥхынҷкәынмза 23, 2022 шықәса. Аԥсныпресс. Аԥыза-министр Аҟәа ақалақь ахада Беслан Ешба 55-шықәса ихыҵра идиныҳәалеит.

Аԥыза-министр Беслан Ешба иусураҿы ақәҿиарақәеи аманшәалареи изеиӷьаишьеит.

Аҟәа.  Ԥхынҷкәынмза  23, 2022 шықәса.  Аԥсныпресс.  Аԥсны Жәлар Реизара – Апарламент Аиҳабы Лаша Ашәба Аҟәа ақалақь Администрациа ахада Беслан Ешба ииубилеитә шықәсхыҵра идиныҳәалеит. 

Ҳаҭыр зқәу Беслан Фиодор-иԥа!

Аԥсны Жәлар Реизара – Апарламент ахьӡала гәык-ԥсык ала ишәыдысныҳәалоит аиубилеитә ныҳәа - 55 шықәса шәхыҵра амш.

Гәацԥыҳәарала, ааԥсарада имҩаԥыжәго аусура, шәыпрофессионализм ҳтәыла гәакьа аизҳазыӷьара иазкуп, ари аҳаҭыр ду шәаԥсаны шәҟанаҵеит, ахәшьара ҳаракгьы иаԥсоуп.

Иахьа Шәара шәнапхгарала ҳаҳҭнықалақь асоциалтә-економикатә ҿиара, уи аизҳазыӷьара, аиашьара зуа ақалақьқәа аус рыцура арӷәӷәара иазку алшарақәа рыцҵара мҩаԥысуеит.

Аҟәа. Ԥхынҷкәынмза 23, 2022 шықәса. Аԥсныпресс. Аҳәынҭқарра Ахада Аслан Бжьаниа «Аԥсны Аҳәынҭқарра зҽаԥсазтәыз аенергетик» ҳәа аҳаҭыртә хьӡы анашьара азы Аусԥҟа инапы аҵаиҩит.  

Шықәсырацәа инеиԥынкыланы аенергетикатә усхкы аҿы хра злоу аусуреи зыҩаӡара ҳараку азанааҭдырреи рзы «Аԥсны Аҳәынҭқарра зҽаԥсазтәыз аенергетик» ҳәа аҳаҭыртә хьӡы ранашьахеит:

Абшьылаа Реваз Ирадион-иԥа,

Агрба Нури Виктор-иԥа,

Аҟәа. Ԥхынҷкәынмза 23, 2022 шықәса. Аԥсныпресс. Аԥсны Иҷыдоу аҭагылазаашьақәа рминистр Лев Кәыҵниа атәыла аԥыза-министр Алеқсандр Анқәаб Донецктәи Жәлартә Республикеи Лугансктәи Жәлартә Республикеи, иара убас Херсонтәии Запорожтәии аобластқәа рахь ицара шымҩаԥысыз атәы изеиҭеиҳәеит.  Иарбоу Урыстәыла иҿыцу арегионқәа рахь ацара Аҳәынҭқарра Ахада Аслан Бжьаниа агуманитартә цхыраара аҟаҵара азы инапынҵа ала  еиҿкаан.  

Аҟәа. Ԥхынҷкәынмза 22,  2022 шықәса. Аԥсныпресс. Аҟәа ақалақьтә Еизара адепутатцәа ақалақь абиуџьеҭ аҟынтәи иршәо асоциалтә цхыраагӡатә шәатәқәа  50% рыла ашьҭыхра азы аӡбамҭа рыдыркылеит.

Аусшәҟәы адгалара мҩаԥигеит Аҟәа ақалақьтә Еизара ахантәаҩы Дмитри Осиа.

Убас, абыда зыхшаара зааӡо анацәа аӡәы изы  1500 мааҭ рызшәалахоит.

Ахәыҷы рацәа (хҩык ахәыҷқәа) змоу аҭаацәа аӡәы изы 600 мааҭ рызшәалахоит; ԥшьҩык ахәыҷқәа змоу – аӡәы изы 900 мааҭ рызшәахоит; хәҩык, ма еиҳаны ахәыҷқәа змоу аҭаацәа –  1050 мааҭ аӡәы изы ирызшәахоит.

Аиаҭымцәа мызкы ироулоит 1500 мааҭ.   

Аҟәа. Ԥхынҷкәынмза 22, 2022 шықәса. Аԥсныпресс. Аҟәа ақалақьтә Еизара адепутатцәа 2023 шықәсазы ақалақь абиуџьеҭ шьақәдырӷәӷәеит.

Аусшәҟәы адгалара мҩаԥигеит Аҟәа ақалақьтә Еизара ахантәаҩы Дмитри Осиа.

Аилатәара ихы алаирхәит аҳҭнықалақь ахада Беслан Ешба.

2023 шықәсазы иазԥхьагәаҭоу ақалақь абиуџьеҭ ахашәалахәытә хәҭа аицҵалыҵ 1 млрд 428 млн 378,30 нызықь мааҭ рҟынӡа инаӡоит, аныхтә хәҭа – 1 млрд 534 млн 206,50 нызықь мааҭ.

Ареспубликатә биуџьеҭ аҟынтәи абиуџьеҭбжьаратәи аԥаратә хархәагақәа рыиагара - 105 млн 828,2 нызықь мааҭ рҟынӡа инаӡоит.

Ихадоу абиуџьеҭ шьақәзыргыло ахашәалахәқәаны иҟоуп: аиҿкаарақәа рхашәалахәы азы ашәахтә (38,7%), ахашәалахәытә шәахтә (47,8%), акцизқәа (3,5%), адгьылтә шәахтә (1,5 %), амазара ашәахтә (2,5%), иҷыдоу ашәахтә  (4,8%).

2023 шықәазы иазԥхьагәаҭоуп 2022 шықәсазы аҳҭнықалақь абиуџьеҭ иаҿырԥшны 206  млн 940,1 нызықь мааҭ рыла аизырҳара.  

2023 шықәсазы 2022 ашықәс иаҿырԥшны ахатәы хашәалахәқәа 206  млн 940,1 нызықь мааҭ рыла реизырҳарагьы азԥхьагәаҭоуп. Иазԥхьагәаҭоу аизырҳара ихадоу ахашәалахәқәа (ахашәалахәы азы ашәахтә, ахашәалахәытә шәахтә, акциза)  ралагалара ацҵара иадҳәалахеит.

Аҟәа. Ԥхынҷкәынмза 22, 2022 шықәса. Аԥсныпресс.  Цәыббрамза 1 инаркны ԥхынҷкәынмза 22, 2022 шықәсанӡа Аԥснынтәи  Урыстәылаҟа експортла идәықәҵахеит 20 246 тонн амандарина, ҳәа Аԥсныпресс акорреспондент адырра ирҭеит Аԥсны аҳәынҭқарратә ҳазылхратә Еилакы аҿы.  Иҳаҩсыз ашықәс аиԥш-зеиԥшу аамҭахәҭа азы Аԥснынтәи иалганы иган 14 877 тонна амандарина.

Аҟәа. Ԥхынҷкәынмза 22, 2022 шықәса. Аԥсныпресс. Ԥхынҷкәынмза 21, 2022 шықәса рзы Европатәи атәылақәа Реидгыла Урыстәылатәи Афедерациа иҿыцу асубиектқәа, иара убас Аԥсни Аахыҵ Уаԥстәылеи  рҿы ирыҭоу урыстәылатәи аҳәаанырцәтәи атәылауаҩшәҟәқәа рзинмчы азхамҵареи адымкылареи рыпринцип закәанла ашьақәырӷәӷәаразы иаднакылаз аӡбамҭа аофициалла иҭыжьхеит.  

Аҟәа. Ԥхынҷкәынмза 22, 2022 шықәса. Аԥсныпресс /Алеқсеи Шамба/. Атәыла аҩныҵҟатәи аусқәа рминистр Вальтер Быҭәба ахаша, ԥхынҷкәынмза 21 рзы имҩаԥысыз азинхьчаратә усбарҭа ркоординациатә еилатәара аҿы дықәгылауа, ахымҩаԥгашьа азы адыррақәа ахәыҷы иҭаацәа рҿы ауп иахьиуоуша ҳәа иазгәеиҭеит.

Аминистр игәаанагарала, азинеиҿкаара аусбарҭақәа аҿар акриминал ахь ралагалара излауа ала армаҷра рҽазыршәоит, аха уи мацара азхоны иҟам. Ахәыҷқәа рааӡара аиҳарак аҭаацәа рҿы имҩаԥысуазар ауп:

«Асовет Еидгыла аҿы изызҳаз иргәалашәозар акәхап ҳамҩадуқәа рҿы атәым хәыҷқәа шыҟамыз. Иахьа, аиҳабы атәым хәыҷы лахьы ииҭар, уи иҭаацәа ирыдыркылаӡом, уи моу игәаауеит».