Зтемпература ҳараку адгьылаҵатә аӡырԥхақәа рыҵыҵырҭа ааглыхратә хархәара алагара мҩаԥгазароуп ԥхынҷкәынмза  31, 2023 шықәса иахымгакәа.  

***   *** Аунитартә наплакы «Гагра араион агрофирма «Гагрыԥшь» аҿы шықәсырацәа зҵазкуа аҵиаақәа рықәхра азы» ақәҵара рыдыркылеит.   

Ақәхра иаҵанакуеит 2,0 гектар ирыҵанакуа шықәсырацәа зҵазкуа аҵиаақәа.

Иҭарцәхо адгьылхәҭақәа ақыҭанхамҩатә хықәкқәа рынагӡаразы ахархәара роуроуп.

***   *** Атәыла Анапхгара даҽа қәҵарак ала Гагра араион аҿы ацитрустә совынхара «Аԥсны» аҿы 0,97 гектарк рҿы шықәсырацәа зҵазкуа аҵиаақәа рықәхра азы аӡбамҭа рыдыркылеит.  

Иҭарцәхо адгьылхәҭақәа убасҵәҟьа  ақыҭанхамҩатә  хықәкқәа рынагӡаразы ахархәара роуроуп.

Ақыҭанхамҩа Аминистрреи Аԥсны адгьылхархәареи акадастри рзы аҳәынҭқарратә Усбарҭеи Гагра араион Ахадареи шықәсырацәа зҵазкуа аҵиаақәа рықәхреи иҭарцәхо адгьылхәҭақәа ақыҭанхамҩатә хықәкқәа рынагӡаразы ахархәара рыҭареи рзы адҵа рыҭоуп.   

***   *** Аминистрцәа Реилазаара Гәдоуҭа араион Ахадара ала хазхаҭалатәи аусдкылаҩ  Ичмелиан С. Г Ԥсырӡха ақыҭан 0,15 гектар аҟынӡа инаӡо адгьылхәҭа асасааирҭатә хкы змоу ахыбрақәа рыргылара азы еснагьтәи ахархәаразы азин иҭара иақәшаҳаҭхеит.

***   *** Аминистрцәа Реилазаара ақәҵарала, Гагра араион Пицунда ақалақь иҟоу, 1,0 гектар рҟынӡа инаӡо адгьылхәҭа Зҭакԥхықәра Ҳәаақәҵоу Аилазаара «Абырлаш 2022»  Автоабылтәыҭаҭәарҭеи ахәаахәҭратә зкызаара змоу аобиектқәеи рыргыларазы аҭара инамаданы «Ақыҭанхамҩатә зкызаара змоу адгьыл» акатегориа аҟынтәи  «аиланхарҭатә зкызаара змоу адгьыл» акатегориа ахь аиагаразы аӡбамҭа рыдыркылеит.

Зҭакԥхықәра Ҳәаақәҵоу Аилазаара «Абырлаш 2022» иҟоу аԥҟарақәа инарықәыршәаны, Гагра араион Ахадара иамххо адгьылхәҭақәа рцынхәрас адгьыл ахархәара ахәԥса азшәара ахәҭоуп.

***   *** Аминистрцәа Реилазаара Гагра араион Ахадара хазхаҭалатәи аусдкылаҩ  Чедиа Р. М. Гагра ақалақь (амикрораион Кемпинг) иҟоу 0,03 гектар рҟынӡа инаӡо  адгьылхәҭа еибырҭо-еимырхо аконструкциақәа рыла ауаажәларратә крыфара аобиект ашьақәыргыларазы қьырала иҭара иақәшаҳаҭхеит.  

***   *** Атәыла Анапхгара ақәҵарала Аҟәа ақалақь) Колхознаиа амҩа, 1-атупик 15) ала иҟоу ахыбрақәа рмазаратә комплекс априватизациа азура ҟало аобиектқәа рсиа иалагалоуп. Ишьақәырӷәӷәоуп иара убас уи априватизациа азы аҭагылазаашьақәа (аԥҟарақәа).  

Ари ақәҵара ашьақәырӷәӷәаразы Жәлар Реизара - Апарламент ашҟа идәықәҵахоит.

Аҳәынҭмазара Аилак Жәлар Реизара-Апарламент ала ақәҵара анышьақәырӷәӷәахалак ашьҭахь априватизациа зызухо аобиект азы аинформациа ареспубликатә кьыԥхьтә ҭыжьымҭақәа рҿы акьыԥхьра азы адҵа аҭоуп.