Алеқсандр Иури-иԥа иара убас Урыстәыла Анаукақәа Ракадемиа Археологиа Аинститут Шәачатәи археологиатә експедициа аилазаараҿы Кәыдрытәи аҩхаа аҵакыраҿы археологиатә усурақәа изныкымкәа ихы рылаирхәхьан. Иара убас Аахыҵ Уаԥстәылатәи Ареспублика, Краснодартәи атәылаҿацә, Нхыҵ Уаԥстәыла–Аланиа, Ҟабарда-Балкариатәи Ареспублика, уҳәа Урыстәылатәи Афедерациа егьырҭ арегионқәа рҿы археологиатә усурақәа ихы рылаирхәуан.
«Аԥснытәи аҳәынҭқарратә музеи уи адиректор А. И. Џьопуеи аус рыцура ашықәсқәа ирылагӡаны, аметалл, акерамика, ахаҳә иалху шәкыла археологиатә маҭәарқәа анаукатә еикәыршара иалагалан. 2015 шықәсазы хырҳагара злоу иусуразы А. И Скаков Аԥсны Аҳәынҭқарра зҽаԥсазтәыз аусзуҩ ҳәа ахьӡ ианашьахеит. 2020 шықәса инаркны Урыстәыла Анаукақәа Ракадемиа мрагылараҭҵаара Аинститут адиректор ихаҭыԥуаҩыс аус иуан.
Алеқсандр Иури-иԥа иус дазҟазан, Аԥсны аҩыза иашаны дыҟан», – ҳәа иазгәаҭоуп Аԥснытәи аҳәынҭқарратә музеи аколлектив адырраҭара аҿы.
Амузеи аколлективи анапхгараҭареи зыԥҭазаара иалҵыз иуацәеи иҭынхацәеи гәалсра дула ирыдышшылоит.
«Ас еиԥш ауаҩы лаша иԥсҭазаара алҵра ҳара зегьы ҳзы хьаа дуны ҳгәаҵанӡа инеиз цәыӡ дууп.
