Аҟәа. Рашәарамза 29, 2023 шықәса. Аԥсныпресс. Аминистрцәа Реилазаара аҿы нанҳәамза 31, 2022 шықәсазы ирыдыркылаз «2023 шықәсазы анапхгарабжьаратәи ахықәкытә программа «Адемографиа аҿиара» ашьақәырӷәӷәаразы» ақәҵара №101 аиҭакрақәа аларгалеит.
Аредакциа ҿыц аҿы апрограмма ахықәки ахыдҵеи арбоуп.
Апрограмма ахықәкы хада – Ареспубликаҿы иааиԥмырҟьаӡакәа инхо, милаҭла иаԥсыуоу (абаза) ахәыҷқәа рирала Аԥсны Аҳәынҭқарра ашәарҭадара адемографиатә шәарҭаразы агәҽанҵара.
Апрограмма ахықәкы хаданы иҟоуп Ареспубликаҿы иааиԥмырҟьаӡакәа инхо аҭаацәа милаҭла иаԥсыуоу (абаза) ахәыҷы иираан зныктәи аԥаратә шәатәы рызшәара:
а) 2022 шықәсазы – ахԥатәии уи ишьҭанеиуа ахәыҷи иираан (ахәыҷы данииз инаркны фымз ирылагӡаны ашәатәы азы адҵаалара алыршазароуп) – 100 000 (шә-нызықь) мааҭ;
б) ажьырныҳәамза 1, 2023 шықәса инаркны ԥхынҷкәынмза 31,2023 шықәсанӡа:
аҩбатәи ахәыҷы иираан – 50 000 (ҩанҩажәижәаба нызықь) мааҭ;
ахԥатәи ахәыҷы иираан– 100 000 (шә-нызықь) мааҭ;
аԥшьбатәии уи ишьҭанеиуа ахәыҷи рираан – 200 000 (ҩышә-нызықь) мааҭ.
Апрограмма афинанстәра мҩаԥысуеит Аԥсны арепатриациа Афон ахарџь ала. Уи 90 млн. мааҭ рҟынӡа инаӡоит.
Даҽа лкаак аҭаацәа руаӡәы даҽазнык аҭаацәара иалалара ала ахәыҷқәа риира аан аԥаратә цхырааргӡа ашәара иазкуп.
«Аԥаратә цхыраара рызшәахоит милаҭла иаԥсыуоу ахәыҷы иираан, аҭаацәа руаӡәы даҽазнык аҭаацәара иалалара ала ахәыҷқәа риира аангьы уахь иналаҵаны. Уаанӡатәи аҭаацәара аҟынтәи ииз ахәыҷқәагьы убасҵәҟьа милаҭла иаԥсыуазароуп, урҭгьы ашәатәы аиуразы азыҳәаҩ ицны иааиԥмырҟьаӡакәа ареспубликаҿы инхозароуп», - ҳәа иазгәаҭоуп апрограмма аҿы.
