Аҟәа. Абҵарамза 9, 2022 шықәса. Аԥсныпресс. Аҟәа имҩаԥысит Женеватәи аиҿцәажәарақәа рыцхантәаҩцәа рԥылара.

2022 шықәса абҵара 9 азы Аахыҵ Кавказ ашәарҭадареи аҭынчреи рҭышәныртәаларазы Женеватәи аиҿцәажәарақәа рыцхантәаҩцәа Тоиво Клаари Џьихан Султаноглуи идикылеит Аԥсны адәныҟатәи аусқәа рминистр ихаҭыԥуаҩ Иракли Ҭыжәба.

Аиԥылара иалахәын Ашәарҭадаратә маҵзура ахантәаҩы ихаҭыԥуаҩ

Заал Хәарцкьиа, аминистрра аусзуҩцәа Лаша Аҩӡба, Артур Гагәылиа, Мадина Шамԥҳа.

Аиԥылара атема хаданы иҟан Аахыҵ Кавказ ашәарҭадареи аҭынчреи рҭышәныртәаларазы Женеватәи аиҿцәажәарақәа изаамҭанытәиу 57 – тәи рраунд.

Аиԥылара аартуа Иракли Ҭыжәба иазгәеиҭеит иахьазы аԥсуа ган еиҳа иактуалны иаԥхьаӡоу амч ахамырхәаразы аицҳәамҭа аҟаҵара азҵаара шакәу. Иҳәеит абри азҵаараҿы адинамика аҟазааразы еицманшәалоу азнеишьақәа шыԥшаатәу.

Иракли Ҭыжәба ацхантәаҩцәа иргәалаиршәеит Аахыҵ Кавказ ашәарҭадареи аҭынчреи рҭышәныртәаларазы Женеватәи аиҿцәажәарақәа рҟны ишаԥҵаз аиқәшаҳаҭра атекст аус адуларазы акомиссиа ҷыда.

«Иахьазы ари акыршықәса аус зыдулаз адокумент гәыгәҭажьуп» ҳәа азгәеиҭеит Иракли Ҭыжәба.

Аҟәа. Абҵарамза 10, 2022 шықәса. Аԥсныпресс. Аԥсны агәабзиарахьчара аминистр Едуард Быҭәба аԥыза-министр Алеқсандр Анқәаб Москваҟа иусуратә ҭаара аихшьаалақәа рзы адырра ииҭеит, ҳәа адырра ҟанаҵоит аминистрцәа Реилазаара апресс-маҵзура.

Аԥсны агәабзиарахьчара Аминистрра ахаҭарнакцәа Урыстәылатәи Афедерациа асанитар-епидемиологиатә Маҵзура 100-шықәса ахыҵра иазкыз аныҳәатә усмҩаԥгатәқәа рхы аладырхәит.

Едуард Быҭәбеи Урыстәыла Ахархәарахылаԥшра Аусбарҭа анапхгаҩы Анна Поповеи реиԥылара аҿы ааигәа аусеицуразы знапаҵыҩра мҩаԥгаз аусеицуразы аиқәшаҳаҭра аҳәаақәа ирҭагӡаны имҩаԥысуа аусмҩаԥгатәқәа ирылацәажәеит.

Аминистр иусуратә ҭаара иалагӡаны Урыстәыла агәабзиарахьчара аминистр актәи ихаҭыԥуаҩ Виктор Фисенко иԥылара мҩаԥысит.

Аҟәа. Абҵарамза 10, 2022 шықәса. Аԥсныпресс. Урыстәыла аекономикатә ҿиара аминистр Максим Решетников, абҵарамза 10 рзы имҩаԥысыз Урыстәылатәи Афедерациа Анапхгара аилатәара аҿы 2022-2025 шш. Аԥсны асоциал-економикатә ҿиара азы аҳәынҭқарратә программа анагӡара адгылара аҭаразы Аԥсни Урыстәылеи ирыбжьарҵаз аиқәшаҳаҭра аратификациа азы афедералтә закәан апроект адгалара мҩаԥигеит.  Абри азы адырра ҟанаҵоит Аԥсны аминистцәа Реилазаара апресс-маҵзура.

Апроект Анапхгара алахәылацәа зегьы еицҿакны адгылара арҭеит.

«Апрограмма анагӡара аҿы ихадоу аҭагылазаашьқәа иреиуоу – Аԥсны Аҳәынҭқарра азакәанԥҵареи Урыстәылатәи Афедерациа азакәанԥҵареи реинырнаалара ауп. Зегьы раԥхьаӡа иргыланы, уи акырӡа аҵанакуеит урыстәылатәи абизнес азы. Аинвесторцәа рзинқәа рыхьчара иазку аусшәҟәқәа реизак Аԥсны Жәлар Реизара-Апарламент ахь ахәаԥшразы идәқәҵоуп»,- ҳәа инаҵшьны иазгәеиҭеит Максим Решетников.

Аҟәа. Абҵарамза 10, 2022 шықәса. Аԥсныпресс. Атәыла аԥыза-министр Алеқсандр Анқәаб Аԥсны адәныҟатәи аусқәа Рминистрра анапхгараҭареи хаҭалатәи аилазаареи Амилициа Амшныҳәа рыдиныҳәалеит.

Адныҳәаларатә цҳамҭа атекст аҿы, ахәҭакахьала иазгәаҭоуп: 

«Ҳаҭыр зқәу сколлегацәа, гәык-ԥсыкала ишәыдысныҳәалоит шәзанааҭтә ныҳәа–амилициа Амш.

Аԥсны аҩныҵҟатәи аусқәа русбарҭақәа –зыҩаӡара ҳараку азанааҭдырра, ауаажәларреи аҳәынҭқарреи рзы хра злоу амаҵзура анагӡара, уҳәа ирыдҳәалоу Аминистрра аусзуҩцәа рабиԥарақәа рыла еиқәырханы иаагоу зеиӷьаҟам атрадициақәа реизак ауп.

Аҟәа. Абҵарамза 7, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа аусуратә гәыԥ алархәны ареспубликаҟны амобилизациатә зыҟаҵара заатәи ахәшьара аҭареи аиӷьтәразы абжьгарақәа разырхиареи рзы аилацәажәара мҩаԥигеит .

Аҟәа. Абҵарамза 5, 2022 шықәса. Аԥсныпреесс.  

Аԥсны Жәлар Реизара - Апарламент Аиҳабы Лаша Ашәба Аԥсны Жәлар Реизара - Апарламент III ааԥхьара адепутат Важа Зарандиа ииубилеи идиныҳәалеит.

Адныҳәалараҟны иҳәоуп:́

«Ҳаҭыр зқәу Важа Илларион-иԥа!

Гәык-ԥсык ала ишәыдысныҳәалоит Шәира амш! 

90-шықәса шәхыҵра иазку аиубилеи акрызҵазкуа хҭысуп Шәара шәколлегацәеи, шәҩызцәеи, ишәзааигәоу шәҭынхацәеи рзы.

Шәара еицырдыруа ҳтәыла аҳәынҭқарратәи ауаажәларра-политикатәи усзуҩцәа рыгәҭа шәгылоуп.

Шәыԥсҭазаара аӷьырак Аԥсадгьыл амаҵ аура иазышәкит. Уи Аԥсны иахьатәи аҭоурых иадҳәалоу акрызҵазкуа ахҭысқәеи аихьӡарақәеи рыла ишьақәгылоуп.

Шәара акомҿартә, апартиатә усураҟны, аҳәынҭқарратә маҵзурақәа рыҟны аԥышәа ду шәоуит. Шәнапы злакыз анапхгаратә маҵзурақәа зегьы рыҟны аарпшра шәылшеит ишәымоу аиҿкааратә ҟыбаҩ, хамеигӡарада аусура, аҭакԥхықәра.

Аҟәа. Абҵарамза 4, 2022 шықәса. Аԥсныпресс. Аԥсны Адәныҟатәи аусқәа рминистр Инал Арӡынба Урыстәыла Адәныҟатәи аусқәа рминистр Сергеи Лавров аҳәынҭқарратә ныҳәа – Жәлар ракзаара Амш идиныҳәалеит.

Адныҳәалараҿы иаҳәоит:

Аԥсадгьыл ахь абзиабара, Аџьынџь азы аҭакԥхықәра, иарбан аамҭазаалак азы аидгылара – милаҭ рацәала еилоу урыстәылатәи ажәлар ирҟазшьа ҷыдоуп. Иахьа арҭ адоуҳатә беиарақәа ҵаҵӷәны иҟоуп урыстәылатәи ауаажәларратә еилазаара рзы, ирымоуп аҵак ҷыда.

Аҟәа. Абҵарамза 7, 2022 шықәса. Аԥсныпресс.   Аҳәынҭқарратә хьчара Амаҵзура аусзуҩцәа Аҟәеи Гәдоуҭеи рҟынтәи арезервистцәа рзы арратә ҽазыҟаҵарақәа мҩаԥыргеит, ҳәа иаанацҳауеит Аҳәынҭқарратә хьчара Амаҵзура апресс-маҵзура.  Арратә ҽазыҟаҵарақәа рцашьа дахылаԥшуан Аҳәынҭқарратә хьчара Амаҵзура анапхгаҩы, аполковник Дмитри Дбар.

Аҟәа. Абҵарамза 7, 2022 шықәса. Аԥсныпресс. Амҽыша, абҵарамза 6 рзы, Анцәа дзыхшаз Ацқьа Мариа Лылацәеиқәыԥсара ахьӡ зху Мықәтәи аныхабаа аҿы Сретентәи аберҭыԥ ахори Аԥснытәи аҳәынҭқарратә хортә капеллеи ргәыҳалалратә концерт мҩаԥысит.  

Агәыҳалалратә акциа амҩаԥгара иабзоураны аизгара алыршахеит 342 734 мааҭ, ҳәа иаанацҳауеит Аԥсны акультура Аминистрра.

Еизгахаз аԥаратә хархәагақәа зегьы аныхабаа аиҭашьақәыргылара иазкхоит. Асадаҟа аҟаҵара акциа аолаин арежим ала иацҵахоит. (https://t.me/mincultra/1755).

Аҟәа. Абҵарамза 7, 2022 шықәса. Аԥсныпресс.  Аԥсны аиустициа Аминистрра аҟны иҟоу аӡбаратә експертизақәа рзы Ареспубликатә аҭҵаара-дырратә Институт адиректор Гьаргь Амҷба, имаҵуратә ҭаара аҳәаақәа ирҭагӡаны, Урыстәылатәи Афедерациа аиустициа Аминистрра аҟны иҟоу Афедералтә Биуџьеттә Усбарҭа аӡбаратә експертиза азы Воронежтәи Ацентр анапхгараҭара дырԥылеит, ҳәа адырра ҟанаҵоит Аԥсны аиустициа Аминистрра апресс-маҵзура.  

Аиԥылара аҿы ирылацәажәеит Аԥсны аиустициа Аминистрра аҟны иҟоу аӡбаратә експертизақәа рзы Ареспубликатә аҭҵаара-дырратә Институти  Урыстәылатәи Афедерациа аиустициа Аминистрра аҟны иҟоу Афедералтә Биуџьеттә Усбарҭа аӡбаратә експертиза азы Воронежтәи Ацентри рыбжьара аусеицуреи аимадареи рыбжьаҵара иадҳәалоу азҵаарақәа жәпакы.  Аӡбаратә експертиза азы Воронежтәи Ацентр анапхгаҩы Алеқсандр Долин  Аԥснытәи рколлегацәа иҿыцу атехникатәии акомпиутертәии атехнологиақәа рырдырра, иара убас аметодикатә цхырагӡатәқәа рыла аиқәыршәареи рганахьала ацхыраара рыҭара ишазхиоу иҳәеит.