Аҟәа. Ԥхынҷкәынмза 1, 2023 шықәса. Аԥсныпресс. Аминистрцәа Реилазаара аҿы 2023 – 2024шш. ҭагалан-аӡынтәи аԥсыӡкраамҭазы аӡы-биологиатә ресурсқәа рхархәаразы ахәԥса азы Ақәҵара апроект иахәаԥшит.
Ақыҭанхамҩа аминистр Беслан Џьопуа иажәақәа рыла, 2005-2006 шш. рзы аԥсыӡкраамҭа инаркны тоннак акамшьиа акра азы ахәԥса хынтә иазҳаит.
«Иҳаҩсыз ашықәс азы тоннак акамшьиа азы ахәԥса 1800 мааҭ рҟынӡа инаӡозҭгьы, сынтәа ҳара 2000 мааҭ, даҽакала иуҳәозар 11% рыла ашьҭыхра азы ажәалагала ҟаҳҵоит. Аусшәҟәы аҭҵаара апроцесс аҿы афинансқәа Рминистрра абиоресурсқәа рхархаразы ашәатәқәа 3500 мааҭ рҟынӡа ашьҭыхразы ажәалагала ҟанаҵоит», – ҳәа иҳәеит Беслан Џьопуа.
Иара иҟаиҵаз адыррақәа рыла, 2021 шықәсазы аԥсыӡкраамҭа ибзианы имҩаԥысит, аха убри аан 2022-2023 шш. аусдкылаҩцәа русура заралхеит, избан акәзар 6 909 тонна акамшьиа ауп иркыз.
«Ҳара абиоресурсқәа рзы ахәԥса ашьҭыхра ҳақәшаҳаҭӡам, избан акәзар, азауадқәа афымцамч, арацәа, адизельтә былтәы ала ауп аус шыруа, урҭ рыхәԥса есаааира иазҳауеит. Арахь абиржа аҿы аԥсыӡшылеи аԥсыӡшшеи рыхәԥса абиоресурсқәа рыхәԥса ҩынтә ацҵара рзышьҭыхыртә еиԥш ихамлаӡеит. Адизельтә былтәы литрак азы 72-73 мааҭ ахшәаатәуп, иаагозар, иҳаҩсыз ашықәс азы уи 48-50 мааҭ иркуан. Наплакык ахы иархәоит 500 тоннак рҟынӡа адизельтә былтәи 1000 тоннак рҟынӡа арацәеи», – ҳәа иазгәеиҭеит Беслан Џьопуа.
Аԥыза-министр ихаҭыԥуаҩ, афинансқәа рминистр Владимир Делба, афинансқәа Рминистрра алкаа, иааиуа ашықәс азы абиуџьет апроект арбагақәа рышьақәыргылараан Аминистрра шьаҭас ишьҭнахыз 45 нызықь тонна акамшьиа рҟынӡа инаӡо аквота ала ишьаҭаркын ҳәа иазгәеиҭеит.
«Иарбоу апроект иахәаԥшуеит 27 нызықь тонна акамшьиа рҟынӡа инаӡо аквота ҳасаб азуны. Ҳара заанаҵы иаҳдыруеит иазԥхьагәаҭоу абиуџьет ахашәалахәытә рбагақәа шынамыгӡахо. Уи ахашәалахәқәа рдефицит ацлара цәырнагар алшоит. Убри аҟнытә аӡытә-биоресурсқәа рзы ахәԥса маҷк аинедексациа азура азы ажәалагала ҟаҳҵоит», – ҳәа иҳәеит Владимир Делба.
Ақыҭанхамҩа аминистр ас еиԥш аҵаҵӷәыркра дақәшаҳаҭымхаӡеит. Уи аквота агырхара ала аӡытә -биоресурсқәа рыхәԥса ашьҭыхра ҟалаӡом ҳәа инаҵшьны иазгәеиҭеит.
Ахәҭакахьала, аԥыза-министр Алеқсандр Анқәаб иркуа аԥсыӡ зегьы аԥсыӡшылеи аԥсыӡшшеи аҟаҵарахьы идәықәҵахоит, ус акәымкәа, иарбоу аалыҵ икыу аԥсыӡ аус адулара ашьҭахь иаанхо ацәынхақәа роуп излырхыша ҳәа иазгәеиҭеит.
«Иҳаураны иҟоу ахашәалахәқәа рыбжак ҳауӡом. Уи даара ихадоу, ахшыҩзышьҭра зҭатәу проблемоуп, аԥсыӡ аалыҵ аус адулара зылшо анаплакы, мамзаргьы аинвестор дҳаԥшаароуп», - ҳәа иҳәеит Алеқсандр Анқәаб.
Тоннак акамшьиа азы ахәԥса хара имгакәа ишьақәырӷәӷәахоит.
Егьырҭ аӡытә-биоресурсқәа рыхәԥса аганахьала акәзар, изеиԥшразаалак аиқәшаҳаҭымхара ҳәа акгьы ыҟаӡамызт.
Ақәҵара инақәыршәаны, тоннак рҟынӡа инаӡо аӡытә-биоресурсқәа рхархәаразы ахәԥса наӡоит:
Агәыҵаԥшь – 20 нызықь мааҭ;
аҷарқал – 9 нызқьи 520 мааҭи;
аԥсардаҳанқәа (акилька) - 1 050 мааҭ;
аҵыхәшәыгә - 16 нызықь мааҭ;
ашәиаҟ – 80 нызықь мааҭ;
егьыҭ аԥсыӡ хкқәа (аидыԥсала, амшынла, аскат, (амшынбга, амшынцгәы), аганвых, атах, адаӷьԥсыӡ, алуфар, агәырԥсыӡ, асмарида, аԥсардаҳан, аҭкәицар, амыдаӷьқәа, аҿаԥран, уҳәа убас егьырҭгьы)
