Аҟәа. Ԥхынҷкәынмза 2, 2023 шықәса. Аԥсныпресс. Ԥхынҷкәынмза 9 рзы Москва ақалақь аҿы имҩаԥысуеит ахҭыс шьахә - Нара Ԥлиа Лырҿиаратә ҟазарҭа (астудиа) аспектакль «Аԥсҭазаара – мшынуп».
Ахәаԥшцәа рҿаԥхьа иқәгылараны иҟоуп ахәыҷтәы театралтә студиа «Сара саамҭа» аҟыбаҩ злоу артист ҿарацәа. Аспектакль ргәамԥхар залшом акульттә шәҟәыҩҩы, адраматург Даниил Хармс ирҿиара абзиабаҩцәа.
Аԥхьарбарақәа иаҭааз ахәаԥшцәа аӡәырҩы ргәаанагарала, аспектакль Аԥсны ииасуа ашықәс азы аиашазы атеатралтә аартраны иҟалеит. Арежисиори актиор ҿарацәеи ирылшеит ахәаԥшцәа имариоу, аха убри аан хадара злоу азҵаарақәа рыла рыҿцәажәара зламҩаԥыргоз атеатралтә бызшәала апублика рыршанхара. Аиашазы, «Аԥсҭазаара – мшынуп, алахьынҵа – аԥша иаҩызоуп, ауаҩы иакәзар – уи дыӷбоуп».
Астудиа «Сара Саамҭа» аԥҵаҩы атеатри ателехәаԥшреи ррежиссиор Нара Ԥлиа. Астудиа аус ауеижьҭеи абар шьҭа 11 шықәса ҵуеит. Уи аамҭа иалагӡаны арҿиаратә ҟазарҭа Аԥсны еиуеиԥшым араионқәа рҟынтәи хыԥхьаӡара рацәала ахәыҷқәа азыҟаҵара бзиа рыҭаны иоунажьҭхьеит. Астудиа аҿы иаԥҵоуп имаҷымкәа аоригиналтә ҟазшьа змоу арҿиаратә қәгыларақәа, имҩаԥгоуп ирацәаны апоезиатә хәылԥазқәа.
Аспектакль алагоит асааҭ 19:00 рзы Жәлар Рынхамҩа Аихьӡарақәа Рцәыргақәаҵа (ВДНХ) апарк, апавилион №11 «Казахсҭан» аҿы.
Аспектакль Аԥсны арҿиаратә ҿар Реидгыла, Урыстәыла иҟоу Аԥсны Аҳәынҭқарра Ацҳаражәҳәарҭа, «Москватәи Аԥсуа диаспора» рыцхыраарала имҩаԥгахоит.
