Аҟәа. Ԥхынҷкәынмза 1, 2023 шықәса. Аԥсныпресс. Гәылрыԥшь араион аҿы иҟоу Николаи Смецкои ихьӡ зху ԥыхьатәи асанатори ахыбра аинвестор қьырала иҭахар ҟалоит.
Аҳәынҭқарратә мазареи ахатәтәреи рнапхгараҭаразы Аҳәынҭқарратә Еилакы ахантәаҩы Беслан Кәыбраа иҟаиҵаз адыррақәа рыла, уаанӡатәи асанатори ахыбра ареспублика иахатәуп, аҳәынҭмазара иаҵанакуеит.
Уажәы ари ахыбра аҭагылазаашьа акыр иуадаҩуп, уи еилаҟәыбаса ишьҭоуп, аҭыӡқәа роуп мацара иаанханы иҟоу, ҳәа иазгәеиҭеит Аҳәынҭқарратә мазареи ахатәтәреи рнапхгараҭаразы Аҳәынҭеилакы ахантәаҩы Беслан Кәыбраа.
«2011 рзы ахыбра кыраамҭа қьырала рыҭаразы аӡбара рыдыркылеит, аха 2016 шықәсазы арендаҟаҵаҩ ихыдҵақәа мап рцәикит. Иҟалап аобиект аиҭашьақәыргылара илшом ҳәа ибазар. Убри азы аилаӡара аԥыххеит. Иахьагьы аобиект шыҟац иҟоуп, уи аҭагылазаашьа акыр иуадаҩуп. Акыраамҭа қьырала изгар зҭаху ауаҩы дыҟоуп. Уи урыстәылатәи аинвестор иоуп. Уи ҳара иқәҳаргылаз адҵа инақәыршәаны аԥснытәи резидентс дҟаларц, ҳшәахтә системахь аԥарақәа алеигаларц Аиустициа аминистрраҟны анаплакы ашәҟәы иҭаиҩит», - ҳәа иҳәеит иара.
Ақәҵара апроект азырхианы аԥыза-министр идгалоуп, уи азы аӡбамҭа макьана ирыдрымкылаӡацт, ҳәа иҳәеит Беслан Кәыбраа.
«Ари аобъект аҭоурых-культуратә ҭынха абаҟақәа рахь иаҵанакуеит, Аҳәынҭқарратә мазареи ахатәтәреи рнапхгараҭаразы Аҳәынҭеилакы аҭоурыхтә хыбра аҟынтәи иаанхаз ахьчара азы аҭакԥхықәра ахахьы ишаго азы апроект иарбоуп», – ҳәа инаҵшьны иазгәеиҭеит иара.
Аԥыза-министр Алеқсандр Анқәаб Ақәҵара апроект аобект аиҭашьақәыргылара аҽҳәареи уи анаҩстәи азкызаареи арбазароуп ҳәа инаҵшьны иазгәеиҭеит.
