Аҟәа. Лаҵарамза 16, 2025 шықәса. Аԥсныпресс. Аԥхынтәи акурорттә аамҭахәҭа аҽазыҟаҵара азҵаарақәа ирызкын аҩныҵҟатәи аусқәа Рминистрра аҿы имҩаԥысыз аилатәара.

Уи рхы аладырхәит Иҷыдоу аҭагылазаашьақәа Рминистрра, Аҳәынҭқарратә шәарҭадара Амаҵзура, Аԥсны Аихамҩа ахаҭарнакцәа, араионтәи ақалақьтәи аҩныҵҟатәи аусқәа русбарҭақәа рнапхгаҩцәа, араионқәеи ақалақьқәеи рхадацәа.

Аԥыза-министр ихаҭыԥуаҩ, аҩныҵҟатәи аусқәа рминистр Роберт Кьиут Аԥсныҟа иаауа атуристцәа ршәарҭадара аиҿкаара иаҵоу аҵакы ахадара азгәеиҭеит.

Аҩныҵҟатәи аусқәа рминистр Роберт Киут аҩныҵҟатәи аусқәа Рминистрра, Аԥсны Аҳәынҭқарратә шәарҭадара Амаҵзура Аҳәаахьчаратә Усбарҭеи Аԥсны иҟоу Урыстәылатәи Афедерациа Афедералтә шәарҭадара Амаҵзура Аҳәаахьчаратә Усбарҭеи комплексла аӡи адгьыли рҿы ареидқәа мҩаԥыргалоит ҳәа ииазгәеиҭеит. «Аҩнуҵҟатәи аусқәа рминистрра, Иҷыдоу аҭагылазаашьақәа Рминистрреи, Аҳәынҭқарратә шәарҭадаратә маҵзура аҳәаахьчаратә усбарҭеи, ареспубликаҿы иҟоу Урыстәыла АШәМи рыцхыраарала аӡаҿи адгьыл аҿи еизаку агәаҭарақәа мҩаԥыргалоит ҳәа иҳәеит Роберт Кьиут.

Аҟәа. Лаҵарамза 15, 2025 шықәса. Аԥсныпресс. Аҵыхәтәантәи аамҭазы ирацәахаз Урыстәылатәи Афедерациа иаку аԥаратә цхыраагӡа зауа атәылауаа раанкылара ахҭысқәа ирыдҳәаланы ишьақәгылаз аҭагылазаашьа иалацәажәеит Аԥсны Жәлар Реизара-Апарламент аҳәынҭқарра-зинтә политика азы Аилаки асоциалтә политикеи аџьеи агәабзиарахьчареи адемографиеи аветеранцәеи аибашьра аинвалидцәеи русқәа рзы Аилаки инарҭбаау аилатәара аҿы.  

Аилатәара ахь ааԥхьара рыҭан атәыла адәныҟатәи аусқәа рминистр Олег Барцыц, аиустициа аминистр Анри Барцыц, асоциалтә еиқәыршәареи адемографиатә политикеи рминистр Руслан Аџьба, Аҳәынҭқарра Ахада Иусбарҭа анапхгаҩы Беслан Ешба, Апарламент аҿы Аҳәынҭқарра Ахада аҷыдалкаатә зинмчы змоу ихаҭарнак Баҭал Аиба, Аҳәынҭқарратә шәарҭадара Амаҵзура ахантәаҩы аамҭала инапынҵақәа назыгӡо Алхас Чычба, ареспублика аҿы ауаҩы изинқәа рыхьчаразы азинмчы змоу Анас Кьышьмариа, аҩныҵҟатәи аусқәа Рминистрра ахаҭарнакцәа.

Аҟәа. Лаҵарамза 16, 2025 шықәса. Аԥсныпресс.   Аԥсны Раԥхьатәи Ахада Владислав Арӡынба (14.05.1945 – 04.03.2010 шш.) диижьҭеит 80-шықәса аҵра иазкхоит лаҵарамза 18 – Жәларбжьаратәи амузеиқәа рымш аҽны имҩаԥгахо акциа «Аҵх амузеи аҟны».

Владислав Арӡынба ихьӡ зху Аҳәынҭқарратә Арратә Ахьӡ-аԥша амузеи аҟны асааҭ 17:00 рзы иаатуеит ари аиубилеитә рыцхә иазку ацәыргақәҵа. Иара уаҟа ицәыргахоит ААУ афилологиатә факультет а-3 акурс астудентцәа атема «Владислав сгәаҿы дыҟоуп» ала еиқәдыршәаз аессе. Амузеи уахьыныҩнало ахыбра аҿаԥхьа иубар алшоит аекспонат хада – В.Г.Арӡынба имаҵуратә автомашьына ГАЗ-24-10.

Аҟәа. Лаҵарамза 16, 2025 шықәса. Аԥсныпресс. Ареспублика Аԥсны аҿы мызкы аҩныҵҟа абанк ПСБ адебеттә хсаалагақәа роуит 11 000-ҩык инареиҳаны Аԥсны инхо, Урыстәыла атәылауаҩра змоу атәанчаҩцәа. Уи Урыстәылатәи Афедерациа атәылауаҩра зманы ареспублика иқәынхо атәанчаҩцәа рзеиԥш хыԥхьаӡара аҟынтәи 50% рҟынӡа инаӡоит.

Абанк ПСБ ахсаалагақәа рыҭара иалагеит мшаԥымза 18 инаркны. Уи иабзоураны Аԥсны инхо атәанчаҩцәа уи анҭыҵ имцакәа аҭыԥаҿы абанктә хсаалақәа раиуразы алшара роуит.  Иарбоу ахсаалагақәа Урыстәыла Асоциалтә фонд аҟынтәи атәанчаҩратәии асоциалтәи ашәатәқәа.

Ахсаалага иаразнактәиуп – аклиент уи 20 минуҭ рыла иоуеит.

Ауаа рырманшәалара азы ахсаалага аиқәыршәара ихәыда-ԥсадоу аҭел цәаҳәа 4444 ала заанаҵтәи аҭаҩрала. Аклиент иара изыманшәалоу аамҭеи Аԥсны Аҵәахырҭатә банк аҟәшеи ихала иалихир ауеит. Аԥсны Аҵәахырҭатә банк иаку аԥҵаҩи акционери раҳасабала иҟоу Аԥсны Амилаҭтә Банк ауп.

Аҭыԥ аҿы аконсультациақәа рыҭара азы аус руеит абанк ПСБ ахаҭарнакцәа. Аҟәша аҿы аусзуҩцәа идырбатәхоит Урыстәылатәи Афедерациа аҩныҵҟатәи атәылауаҩшәҟәы, мамзаргьы Урыстәылатәи Афедерациа аҳәаанырцәтәи атәылауаҩшәҟәы. Атәанчаҩратә қәра иаҵанамкыц ауаа, аха атәанчахәы аиура иалагахьоу – иарбоу ашәатәқәа раиуразы азин зырҵабыргуа ашәҟәқәагьы адырбароуп.

Аҟәа. Лаҵарамза 15, 2025 шықәса. Аԥсныпресс. Аҟәатәи абжьаратәи ашкол № 2 аҿы аспортзал шьаҭанкыла аиҭашьақәыргылара цәыббрамза 1 аламҭалазы ихыркәшахоит, ҳәа адырра ҟаиҵеит Шьаҭанкыла аргыларазы Аусбарҭа аиҳабы Демир Гамисониа.

«Аусурақәа хацыркын 2024-тәи ашықәс азы, урҭ рхыркәшара азԥхьагәаҭан 2024-тәи ашықәс анҵәамҭазы, аха афинансыркра аганахьала ицәырҵыз аԥкрқәа  ирыхҟьаны, аусурақәа рыцҵара алыршахеит ҳазҭоу ашықәс азы.

Аԥсны аԥыза-министр Владимир Делба инапынҵала, иарбоу аобиект иааиуа аҵарашықәс ҿыц аламҭалазы ахархәарахь ирыҭахоит», - ҳәа иҳәеит Демир Гамисониа.

Аҟәа. Лаҵарамза 15, 2025 шықәса. Аԥсныпресс. Аԥсны Аҳәынҭқарра Ахада Гәынба Бадра Аԥсны Аџьынџьтәылатә еибашьра иалахәыз Аԥсны Аҳәынҭқарра Актәи Ахада  80 шықәса ихыҵра иазкыз агәалашәаратә усмҩаԥгатәқәа рыҽрылархәразы иааз.

Аиԥылара иара убас далахәын Аԥсны Ахада ихаҭыԥуаҩ Бигәаа  Беслан.

Аҟәа. Лаҵарамза 15, 2025 шықәса. Аԥсныпресс. Аҳәынҭқарра-зинтә политика азы апарламенттә Еилакы иааиуа Апарламент асессиа аҿы Аԥсны апрокурор Хада имаҵураҭыԥ ахь Адгәыр Агрба икандидатура ахәаԥшразы рыбжьы арҭеит.

Аҳәынҭқарра Ахада Бадра Гәынба Аԥсны Аҳәынҭқарра апрокурор Хада икандидатура ықәиргылеит.

Аԥсны Аҳәынҭқарра Аконституциа ахәҭаҷ 76, "Аԥсны Аҳәынҭқарра Апрокуратуразы" Аԥсны Аҳәынҭқарра Азакәан ахәҭаҷ 12 инарықәыршәаны Аԥсны Аҳәынҭқарра Ахада Гәынба Бадра Аԥсны Жәлар Реизара - Апарламент ахәаԥшразы иқәиргылеит Аԥсны Аҳәынҭқарра апрокурор Хада имаҵураҟны иаҭаразы Агрба Адгәыр Нугзар-иԥа икандидатура.

Аҟәа. Лаҵарамза 15, 2025 шықәса. Аԥсныпресс. Аԥсны Раԥхьатәи Ахада Владислав Арӡынба Ихраҿа агаразы автеранцәа рыбжьара ашьапылампыл азы XV Жәларбжьаратәи атурнир мҩаԥысуеит лаҵарамза 13 – 19 рзы Алаҳаӡы ақыҭан.

Иахьа атурнир даҭааит Аҳәынҭқарра Ахада Бадра Гәынба.

Атурнир рхы аладырхәуеит  Узбекьысҭан, Аахыҵ Уаԥстәыла, «Чалтырь» (ақ. Ростов-на-Дону), «Сулин» (Ростовтәи аобласт) акомандақәа, Шәачеи Адлери еиду акоманда, иара убас Аԥсны ахьӡала х-командак.

Аҳәынҭқарра Ахада Бадра Гәынба атурнир асасцәеи алахәылацәеи аветеранцәа рыбжьара ашьапылампыл азы XV Жәларбжьаратәи атурнир аофициалла аартра рыдиныҳәалеит.

Аҟәа. Лаҵарамза 15, 2025 шықәса. Аԥсныпресс. Лаҵарамза 15 рзы 10-шықәса ахыҵит Аҩныҵҟатәи аусқәа Рминистрра аветеранцәа –1992-1993 шш. Аџьынџьтәылатәи еибашьра иалахәыз Рассоциациа.  

400-ҩык инареиҳаны аҩныҵҟатәи аусқәа Рминистрра аусзуҩцәа Аԥсны жәлар Рџьынџьтәылатәи еибашьра иалахәын.

Аԥыза-министр ихаҭыԥуаҩ, аҩныҵҟатәи аусқәа рминистр Роберт Киути Аҩныҵҟатәи аусқәа Рминистрра аусзуҩцәеи ахылаԥшырҭа адәаҿы ишьақәыргылоу 1992-1993шш. Аџьынџьтәылатәи еибашьраҿы иҭахаз рбаҟа амҵан ашәҭ шьыҵәрақәа шьҭарҵеит.

Ассоциациа аиубилеи иазку аныҳәатә еилатәара ихы алаирхәит Аҳәынҭқарра Ахада Бадра Гәынба.

Аилатәара аартуа, Роберт Киут аветеранцәа, анапхгара аусбарҭақәа рхаҭарнакцәеи ауаажәларреи дрыдныҳәалеит.

«Ҳаҭыр зқәу аветеранцәа, еицеибышьуаз, аҩызцәа! Аԥсны аҩныҵҟатәи аусқәа Рминистрра ахьӡала, хаҭала сара сыхьӡала гәык-ԥсыкала ишәыдысныҳәалоит аҩныҵҟатәи аусқәа Рминистрра автеранцәа - 1992-1993 шш. Аџьынџьтәылатәи еибашьра иалахәыз Рассоциациа  10-шықәса ахыҵра амш.  

Ари баша-маша рыцхәӡам, ари шәара шәфырхаҵара аҵакдура, шәдоуҳамч аӷәӷәара, шәуалԥшьа ламысла анагӡареи Аԥсадгьыл ахь ишәымоу абзиабареи зырҵабыргуа аамҭахәҭа ауп.  Ҳажәлар рзы еиҳа иуадаҩыз аамҭақәа рзы аҩныҵҟатәи аусқәа русбарҭақәа аусзуҩцәа Ареспублика Аԥсны асуверенитети ахьыԥшымреи рыхьчаразы рахьа игылаз иреиуоуп.

Шәара абџьар кны аӷа шәиҿагылеит, атыл аҿы арратә хыдҵақәа нашәыгӡон, аибашьра аҭагылазаашьақәа рҿы азинеиҿкаареи аҭышәынтәалареи рышьақәыргылара азы аус шәуан. Уи зегьы хьыӡла-ԥшала инашәыгӡон. Ассоциациа иҳаҩсыз  10-шықәса рыла аҿар рпатриоттә, рлеишәатә, рҭоурыхтә ааӡара иузаҟәымҭхо иадҳәалахеит. Шәара иҭахаз ргәалашәара анаунагӡатәра ахьӡала шырратә ҩызцәа шәрыцхраауеит, атәыла ауаажәхларратә ԥсҭазаара активла шәалахуп, абиԥарақәа реимадара арӷәӷәара аҿы хәызмаӡам шәлагала алашәҵоит», – ҳәа иҳәеит иара.

Аҟәа. Лаҵарамза 14, 2025 шықәса. Аԥсныпресс. Аԥсны Раԥхьатәи Ахада Владислав Арӡынба иԥсҭазааратә мҩа иазку афильм «Ауаа ирыԥхьагылоу» («За кем идут люди») ддырбеит  Аԥсуа драматә театр аҿы.

Афильм арежиссиор – Ҭемыр Кәакәасқьыр, аоператор – Џьано Цурцумиа, акомпозитор – Анри Гәымба. Ароль хадақәа нарыгӡеит Мирон Осиеи Ричард Ҷкадуеи.

Ари акиносахьа еиднакылоит адокументалтәии асахьаркыратәи акино аелементқәа. Арежиссиор Ҭемыр Кәакәасқьыр иажәақәа рыла, анеироҳақәа рхархәарала авторцәа Владислав Арӡынба ишәҟәы «Сара сыԥсҭазаара» аҟынтәи ацитатақәа атәыла Раԥхьатәи ахада ибжьы рхаҵареи афотосахьақәак аԥсы рхаҵареи рылшеит».

Афильм асиужет инақәыршәаны, ҷкәынак Владислав Арӡынба аибашьра ашықәсқәа рзы ииҩыз имшынҵа имԥыхьашәоит. Архивтә кадрқәа рыбзоурала ахәаԥшцәа аполитик дызлахәыз, адунеитә арена аҿы Аԥсны аинтерессқәа ахьыихьчоз аиҿцәажәарақәа дара рхаҭақәа ирылахәызшәа ргәы иабоит.  Иара убас идырбахоит Лаҭатәи атрагедиа, Аԥсны ақалақьқәа ақырҭуа мпыҵахалыҩцәа рҟынтәи аҭарцәра, уҳәа иазку акадрқәа. Ахроника иаанарԥшуеит Аԥсуа жәлари урҭ рԥызеи ахьыԥшымразы ақәԥараҿы ирхыргаз амыҟәмабарақәа зегьы.