Аҟәа ақалақь ахада Ҭемыр Агрба аныҳәатә программа шьақәирӷәӷәеит.  Убас ала:

Асааҭ 10:00 - 20:00 рзы   Т. Шамба ихьӡ зху апарк аҿы асасцәа хәыҷқәа ирзыԥшуп арлахҿыхратә, агәмырҿыӷьратә усмҩаԥгатәқәа:

– арҿиаратәи аспорттәи аԥсшьараамҭа ахгара;

– имҩаԥысраны иҟоуп ахәыҷбаҳчақәа рааӡамҭацәа рконцерт;

– аниматорцәеи ауаҩы иоура зоуроу акьанџьақәа ршоуи;

– акьанџьақәа ртеатр: аспектакль «Алиса анашанақәа рдунеи аҿы» («Алиса в стране чудес» ). 

Асааҭ 12:00 - 19:00 С. У.Багаԥшь ихьӡ зху  аплошьад аҿы  имҩаԥгахоит афатәқәа рфестиваль. Араҟа асасцәа ишырбо Аԥсни Урыстәылеи рҟынтәи ашеф-поварцәа афатәқәа ҟарҵалоит, урҭ ргьама абара алшоит.  

Асаҭ  16:00 инаркны Амҳаџьыраа Рыԥшаҳәа аҿы, иара убас Б.У.Шьынқәба ихьӡ зху апарк аҿы еиҿкаахоит:

– афотоцәыргақәҵа;

– ахыци ахәымпали рыла ахысра атурнир;

–ашашкақәеи ашахматқәеи рзы атурнир.

Асааҭ 16:00 рзы Аԥсны Амилаҭтә банк амузеи аҿы иаатуеит ацәыргақәҵа «Повесть о городе, взятом волнами».

Асааҭ 18:00 Амҳаџьыраа Рыԥшаҳәа аҿы (Аколоннада аҿаԥхьа) Самаратәи аԥсыԥтә оркестр аныҳәатә концерт мҩԥгахоит.

Асааҭ 20:00 рзы Аԥснытәи адраматә театр аҿаԥхьа имҩаԥгахоит аконцерт «Сықалақь Аҟәа". Уи иалахәхоит аԥснытәи аестрада, ахореографиатә коллективқәеи Самарантәи акавер-гәыыԥи  рартистцәа.

Аконцерт ашьҭахь – Амҳаџьыраа Рыԥшаҳәа аҿы (Б.У.Шьынқәба ихьӡ зху апарк аҿы) аквиз, аинтеллектуал - агәмырҿыӷьратә еиндаҭлара мҩаԥысуеит.

Асааҭ 22:00 рзы Амҳаџьыраа Рыԥшаҳәа аҿы имҩаԥгахоит аныҳәатә феирверк.  

Аҟәа - ижәытәӡоу адунеи ақалақьқәа иреиуоуп. Раԥхьаӡа акәны ара ауаа реиланхарҭа шьақәгылеит ҳәа иазгәарҭоит ҳера ҟалаанӡа VI ашәышықәсазы, уи аахижьҭеи ҩ-нызқьи бжакы шықәса иҵхьоу ирылагӡаны аҭыԥантәи ашьхарыуа жәларқәа аԥсилқәеи абазгқәеи ркультурақәа еилаҵәон, урҭ ирылаҵәон еиуеиԥшым егьырҭ акультурақәагьы - абырзенцәа, генуиаа, аурымқәа, византиаа, аҭырқәцәа, аџьамцәа, аурысцәа уҳәа аӡәырҩы.