Аҟәа. Жәабранмза 10, 2025 шықәса. Аԥсныпресс. Урыстәылатәи аган жәабранмза 15 рзы Аԥсны имҩаԥысраны иҟоу Аҳәынҭқарра Ахада иалхрақәа иҭышәынтәаланы ишымҩаԥысуа азы  агәыӷра аанарԥшуеит, ҳәа РИА Новости аинтервиу аҭо аҳәамҭа ҟаиҵеит Урыстәылатәи Афедерациа адәныҟатәи аусқәа рминистр ихаҭыԥуаҩ  Михаил Галузин.

Аҟәа. Жәабранмза 10, 2025 шықәса. Аԥсныпресс. Аполитикатә партиақәеи ауаажәларратә еиҿкаарақәеи Реидгыла акандидатцәеи урҭ рыдгылаҩцәеи алхратә кампаниа амҩаԥгараан азакәан мацара рхы иадырхәарц азы ааԥхьара ҟарҵоит.

Аҳәамҭа:

Аҵыхәтәантәи аамҭазы атәыла аинформациатә ҵакыраҿы Аԥсны Аҳәынҭқарра ахадарахьы акандидат Б. Гәынба иганахь ала ахарадҵара мҩаԥысуеит иара Аконституциеи Аԥсны Аҳәынҭқарра алхратә закәанԥҵареи еилеигазшәа.

Иҟаҵоу ахарадҵарақәа шьаҭас ирымоуп Б. Гунба Аԥсны ахадаи алхрақәа рзы азакәанԥҵара еилеигоит, иара Аԥсны ахада имаҵураҭыԥ ахь кандидатс дыҟоуп, ус анакәха ареспублика ахада инапынҵақәа неигӡаӡом ҳәа иҟаҵоу аԥаршеи ҳәамҭақәа. Ари агәаанагара, Б. Гәынба Урыстәыла иҟазаараан аинтернет ҳақәа рҿы инарҭбааны ирыларҵәан.

Арҭ аҳәамҭақәа Аԥсны алхрақәа рзы азакәан хада иаҿагылоит, Аԥсны атәылауаагьы идырны имҩахырҟьоит Б. Гәынба иҳаҭыр аларҟәра хықәкыс ирымоуп.

Раԥхьа иргыланы Аԥсны Ахада иалхразы азакәан, акандидатцәа ԥсшьара шәцароуп ҳәа ҭакԥхықәра рыднаҵом.

Аконституциатә закәан «Аԥсны Аҳәынҭқарра Ахада иалхрақәа рзы» аҿы иазгәаҭоуп «Алхратә кампаниа аан Аԥсны Аҳәынҭқарра ахадарахьы акандидатцәеи ахада-ихаҭыԥуаас иқәгылоу акандидатцәеи аааглыхратә, ма амаҵзуратә ҭакԥхықәрақәа рҟынтәи рхы иақәиҭтәуп русуратә ҭыԥ аҿы ироуа ибжьаратәу руалафахәы, алхрақәа рзы иалкаау аԥарақәа рҟынтәи ирызшәо» ҳәа.

Аҟәа Жәабранмза 10, 2025 шықәса. Аԥсныпресс. Жәабранмза 12 рзы Аҟәа имҩаԥысраны иҟоуп М.Е. Пиатницки ихьӡ зху Аҳәынҭқарратә академиатә аурыс жәлар рхор агастрольқәа. Аусмҩаԥгатә мҩаԥгахоит Аԥсни Урыстәылеи акультура Аминистррақәа иҟарҵо адгыларала. Аиҿкааҩ – «Росконцерт». 

Урыстәыла жәлар рартистка, апрофессор Александра Пермиакова напхгара зылҭо зыхьӡ нагоу урыстәылатәи арҿиаратә коллектив ахәаԥшцәа иддырбоит аконцерттә программа «Живи в веках, моя Россия». Ақәгылара мҩаԥысуеит С. Ҷанба ихьӡ зху Аԥснытәи аҳәынҭқарратә драматә театр асценаҿы. 

Аҟәа. Жәабранмза 10, 2025 шықәса. Аԥсныпресс. Аԥсны Аҳәынҭқарра Ахада инапынҵақәа назыгӡо Валери Бганба Урыстәыла адипломатиатә усзуҩ Имш инамаданы Урыстәыла адәныҟатәи аусқәа рминистр Сергеи Лавров ихьӡала адныҳәаларатә шәҟәы дәықәиҵеит. 

Адныҳәаларатә цҳамҭа атекст аҟны, ахәҭакахьала иазгәаҭоуп:

«Ҳаҭыр зқәу Сергеи Виктор-иԥа! Шәара аԥхьа шәнаргыланы Урыстәыла адәныҟатәи аусқәа Рминистрра аусзуҩцәеи аветеранцәеи шәзанааҭтә ныҳәа шәыдысныҳәылоит! Ҳаамҭазтәи агеополитикатә ҭыгылазаашьақәа рҿы, иҿыцу адунеитә шьақәгылара аҿиараан адипломаттә усзуҩцәа русура аҵакы еиҳагьы ихадахоит.

Иахьагьы, адунеизегьтәи аиашамратә ҭагылазаашьаан урыстәылатәи адипломатцәа адунеи аҿы ашәарҭадареи аҭышәынтәалареи рышьақәгылара аус активла рхы аладырххәуеит, урҭ равторитети иҳараку рзанааҭдырреи рхырхәарала ақәреи асоциалтә статуси, амилаҭреи адинхаҵареи ирыхьмырԥшыкәа, аиашара шьаҭас измоу адунеизегьтәи аиҿкаара ашьақәыргыларазы иазықәгылоит.

Аҟәа. Жәабранмза 10, 2025 шықәса. Аԥсныпресс. Аҟәатәи аҳәса ркоманда аишәатә ԥкьаҭмпыл азы аицлабрақәа «Надежды Кубани» аҿы қәҿиарала иқәгылеит.

Аҟәа. Жәабранмза 10, 2025 шықәса. Аԥсныпресс. Аԥсны Аҳәынҭқарра Ахада инапынҵақәа назыгӡо Валери Бганба Аԥсны иҟоу Урыстәыла ацҳаражәҳәаҩ Михаил Шургалин адипломаттә усзуҩ Имшныҳәа идиныҳәалеит.  

Аҟәа. Жәабранмза 10, 2025 шықәса. Аԥсныпресс. Аҟәа ақалақь, Анатоли Карпов ихьӡ зху ашахматтә школ аҿы 12 шықәса рҟынӡа зхыҵуа аспортсменцәа рыбжьара имҩаԥысит традициала еиҿкаахо ашахматқәа рзы иаарту ареспубликатә ахәыҷтәы реитингттә еицлабрақәа «Алашара – агәыӷра ҿарақәа».

Аҟәа. Жәабранмза 10, 2025 шықәса. Аԥсныпресс. Аԥснытәи аспортсменцәа карате киокусинкаи (кумите) азы Волгоградтәи аобласт Иаарту аицлабрақәа «Сталинградская Битва» рҿы 18 медал ргеит.

Аицлабрақәа мҩаԥысуан жәабранмза 9 рзы Волгоград ақалақь аҿы.

Аҟәа. Жәабранмза 9, 2025 шықәса. Аԥсныпресс. Тиумен инхоз Алексеи Берестениов иԥсыбаҩ рыԥшааит иахьа ашьжьымҭан Риҵатәи аиҩхааҿы Риҵа аӡиахь ицо амҩа 35-тәи акилометр аҿы.

«Уажәтәи адыррақәа рыла, урыстәылауаҩ ацаҟьа далҟьеит», - ҳәа адырра ҟарҵеит Иҷыдоу аҭагылазаашьақәа рзы Аминистрра апресс-маҵзура аҿы.

Аҟәа. Жәабранмза 7, 2025 шықәса. Аԥсныпресс. Аҟәантәи Москваҟа ихынҳәуа аҳаирплан иҷыдоу амедицинатә цхыраара роурц азы хҩык ачымазцәа агараны иҟоуп. Урҭ Москва ақалақь, Урыстәылатәи Афедерациа амедицинатә Центрқәа рҿы ахәышәтәра иахысуеит, - ҳәа иҳәеит Аԥсны агәабзиарахьчара аминистр инапынҵақәа назыгӡо Едуард Быҭәба. Уи алыршахеит Аԥсни Урыстәылеи ргәабзиарахьчара Аминистррақәа рыбжьара аиқәшаҳаҭрақәа ирыбзбоураны.

Москватәи аҳаирбаӷәаза Внуково аҿы ачымазцәа ирԥылоит Урыстәыла Амашәырцәгьақәа рмедицинатә Центр аҟынтәи ацхыраара лас амашьынақәа.