Аҟәа. Хәажәкырамза 8, 2024 шықәса. Аԥсныпресс.  Альбина Иаруллина авторсгьы анапхгаҩыси дызмоу  акультура-рккаратә проект «Абхазский берег», иара убас  К. В. Ковач ихьӡ зху Ахәыҷтәы аҟазара ашкол ахәыҷқәа амоноспектакль «Клоун Авабука» ахь ааԥхьара рырҭоит.

Аспектакль «Клоун Авабука»  –  ари иччарху, иара убри аамҭазы игәырԥшаагоу асценақәа рыла ишьақәгылоуп. Араҟа абжьааԥнытәи ахҭысқәа роума, амаҭәарқәа роума, зегьы анашанатә цәаҩа рыҟәнылоит: еикәаԥсоу аурашәага аиаҵәа алҵуеит, ақьаад иану асалам шәҟәы иӷбаны иаақәгылоит, аиалаҳәара хәыҷы акәзар - ахәыҷы.   Ара имҩаԥысуа зегьы –аинтерактивтә хәмарраны иҟоуп, уи ара иҟоу зегьы рҽаладырхәуеит.

Аҟәа. Хәажәкырамза 9, 2024 шықәса. Аԥсныпресс. Аполитикатә партиа «Аиҭаира» аполитхеилак аџьынџьуаа рахь Урыстәыла Ахада иалхрақәа активла рҽыладырхәырц азы ааԥхьара ҟанаҵоит.

«Хәажәкырамза 17, 2024 шықәса рзы имҩаԥысраны иҟоуп Аԥсны азы ихадоу астратегиатә партнир, ҳтәыла ашәарҭадара агарантс  иҟоу Урыстәылатәи Афедерациа Ахада иалхрақәа. Алхрақәа рзы алхырҭатә ҭыԥқәа Аԥсныгьы иаартхоит.   Аполитикатә партиа «Аиҭаира» аполитхеилак Урыстәылатәи Афедерациа атәылауаҩра змоу ҳџьынџьуаа рахь алхрақәа активла рыҽрыладырхәыц азы ааԥхьара ҟанаҵоит. Ари амш аҽны Урыстәыла анаҩстәи аҿиара акурс шьақәырӷәӷәахоит, уи ҳаамҭазтәи адунеи аҿы аҭыԥ ҩаԥхьа иалкаахоит.  Уи иузаҟәымҭхо иадҳәалоуп ҳара ҳтәылагьы ԥхьаҟатәи аԥеиԥш», - ҳәа иаҳәоит ааԥхьара атекст аҿы.

Аҟәа. Хәажәкырамза 8, 2024 шықәса. Аԥсныпресс. Хәажәкырамза 8 инаркны хәажәкырамза 10-нӡа Аҟәа ақалақь аҿы имҩаԥысуеит Аԥсны ашахматқәа Рфедерациа апрезидент Константин Ҭыжәба  70-шықәса ихыҵра иазку ашахматқәа ртурнир. Атурнир актәи амш азы аицлабра рхы аладырхәит Аԥсны араионқәа зегьы рҟынтәи 70-ҩык 9-шықәса зхымҵыц ашахматист ҿарацәа.

9-шықәса зхымҵыц  аҷкәынцәа рыбжьара актәи аҭыԥ ааникылеит Хьынҭәба Глеб (ақ. Гәдоуҭа), аҩбатәи аҭыԥ - Бганба Даниель (ақ. Аҟәа), ахԥатәи аҭыԥ - Шалин Иван (ақ. Аҟәа).  

9-шықәса зхымҵыц  аӡӷабцәа рыбжьара актәи аҭыԥ аанылкылеит Ԥалаванӡиа Анна (ақ. Аҟәа), аҩбатәи аҭыԥ - Агрба Амира (ақ.Гәдоуҭа), ахԥатәи аҭыԥ- Гәылариа Емили (ақ. Гәдоуҭа).

Аҟәа. Хәажәкырамза 8, 2024 шықәса. Аԥсныпресс.  Урыстәылатәи Афедерациа Анапхгара ахада Михаил Мишустин Аԥсны Аҳәынҭқарра Ахада Аслан Бжьаниа иԥшәмаԥҳәыс - Аелита Ахьиба Жәларбжьаратәи аҳәса Рымшныҳәа лыдиныҳәалеит.

Адныҳәаларатә цҳамҭа аҿы, ахәҭакахьала иазгәаҭоуп:

«Ҳаҭыр зқәу Аелита Максим-иԥҳа!

Гәык-ԥсыкала ишәыдысныҳәалоит Жәларбжьаратәи аҳәса Рымшныҳәа Хәажәкырамза 8.   

Аҟәа. Хәажәкырамза 8, 2024 шықәса. Аԥсныпресс. Аԥсны Жәлар Реизара – Апарламент Аиҳабы Ашәба Лаша Аҳәса рымш азы адныҳәалара ҟаиҵеит.                                                                             

«Акыр иаҳзаԥсоу ҳанацәа, ҳаҳәшьцәа, ҳҩызцәа!

Аԥсны Жәлар Реизара – Апарламент ахьӡала гәык-ԥсык ала ишәыдысныҳәалоит Жәларбжьаратәи аҳәса рымш! 

Арҭ ааԥын мшқәа рзы шәара ишәызку ажәақәа зегьы ҳаҭырла, гәыблыла  ҳшышәзыҟоу атәы рҳәоит. Адунеи ыҟанаҵы иҟоу аҟазшьа ссирқәа – анра, ахамеигӡара, аҟәыӷара, аҭаацәарақәа еилшәарада иаазго аԥхарра – ныҟәызго шәара шәоуп, акыр иаԥсоу ҳанацәа, ҳахәшьцәа. 

Аҟәа. Хәажәкырамза 08, 2024 шықәса. Аԥсныпресс.  Аԥсны Аҳәынҭқарра Ахада Аслан Бжьаниа Аԥсны иқәынхо аҳәса Жәларбжьаратәи аҳәса рымш рыдиныҳәалеит.

«Акыр иаҳзаԥсоу ҳанацәа, ҳаҳәшьцәа!

Гәык-ԥсык ала ишәыдысныҳәалоит Жәларбжьаратәи аҳәса рымш.

Шәара шәыла ари аԥсҭазаара даҽа цәа хаак ахалоит, шәара уи арԥшӡара шәылшоит, ҵакыла ихашәырҭәаауеит хылҵла ирбеианы.  Шәара шәыжәҩа иқәу аидара шымариамгьы, аҵахара шәыздырӡом, шәнапы злаку иарбан усзаалак хьӡы-ԥшала инашәыгӡоит, убри аангьы шәгәыкреи, шәгәыбылреи шәшыцыц ишәыцуп. Шәара адунеи еибаркны изку абзиабареи ауаҩ ихӡыӡаареи шәырсимволын ахаангьы.

Аибашьра аамҭа хьанҭақәа раангьы ахацәа шәарӷьажәҩаны шәрыдгыан. Шәара шәыгәаӷьреи шәхамеигӡареи рыла иалыршоу рацәоуп Аԥсны Аҳәынҭқарра ихьыԥшым, исуверентәу ҳәынҭқарраны ашьақәгылараҟны.

Аҟәа. Хәажәкырамза 7, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аҳәынҭқарратә Шәарҭадара Амаҵзура ахантәаҩы Ҭемыр Ахьиба далархәны аиԥылара мҩаԥигеит, ҳәа адырра ҟанаҵоит Аҳәынҭқарра Ахада ипресс-маҵзура.

Ҭемыр Ахьиба Аҳәынҭқарра Ахада Аҳәынҭқарратә шәарҭадара Амаҵзура аусура алҵшәақәа, иара убас 2023 шықәса рзы Аҳәынҭқарра Ахада, арбџьар мчқәа рыдҵаҟаҵаҩ Хада идҵала иқәыргылаз аҳасабтәқәа қәҿиарала рынагӡаразы имҩаԥгаз аусуразы адырра ииҭеит.

Аслан Бжьаниа аҳәынҭқарратә шәарҭадареи аҳәынҭқарратә ҳәаа ахьчареи, иара убас аусбарҭа аматериал-техникатә база арӷәӷәареи, аԥхьаҟа аусура аиӷьтәреи рызҵаарақәа рзы адырра иҭан.

Аҳәынҭқарратә шәарҭадара Амаҵзура ахантәаҩы иазгәеиҭеит, иҳаҩсыз ашықәс азы ареспубликаҟны ишьақәгылаз аҭагылазаашьа инақәыршәаны  Амаҵзура аусура атәым ҳәынҭқаррақәа рыԥшыхәратәи иҷыдоу аусбарҭақәеи аҳәаанырцәтәи аҳәынҭқаррақәа реиҿкаарақәеи егьырҭ рхықәкқәеи рҿагылара, аконституциатә шьақәгылара ашьаҭақәа рыхьчара, аекономикатә ҟазшьа змоу ацәгьоурақәеии акоррупциатә цәырҵрақәеи,  адиверсиа-қәыларатә актқәеи, аҭагылазаашьа ҷыдақәеи ралмыршареи разы аусқәа ишрызкыз.

«Ҳара ҳамчқәеи ҳалшарақәеи аоперативтә ҵакы змоу агәҽанҵара алзыршо аинформациа аԥшаара иазкуп. Аоператив-ԥшааратә усурақәа ирыбзоураны ихацыркуп 23 шьауӷатә ус, 18-ҩык атәылауаа ирықәыӡбоуп», - ҳәа иҳәеит Ҭемыр  Ахьиба.

Иҳаҩсыз ашықәс азы амаҵзура ҷыдақәа 150 инареиҳаны усмҩаԥгатә мҩаԥыргеит, урҭ рхыԥхьаӡараҿы иҟоуп аоператив-еибашьратә, аԥшааратәқәа; ауаа рацәа злахәыз аусмҩаԥгатәқәа реиқәыршәара, арҵара-еибашьратә усмҩаԥгатәқәа, Аԥсны атәылахьчара аминистрреи Урыстәыла Афедералтә Шәарҭадара Амаҵзура аҳәаахьчаратә усбарҭеи еицымҩаԥыргаз, аҳәынҭқарратә ҳәаа ахьчара арежим арӷәӷәара иадҳәалаз ауснагӡатәқәа. Иазгәаҭан иара убас архәҭаҷыдақәа иҷыдоу арратә операциа ахьымҩаԥыргоз аҭыԥқәа рахь рцара.

Аиԥылараҟны ирылацәажәан Аԥсны Аҳәынҭқарра Ашәарҭадара Амаҵзуреи  Урыстәыла Афедералтә Шәарҭадаратә Маҵзура аҳәаахьчаратә усбарҭеи русеицура иадҳәалаз  азҵаатәқәа.

Аҟәа. Хәажәкырамза 7, 2024 шықәса. Аԥсныпресс. Аԥсны Аҳәынҭқарра Ахада Иусбарҭа аҿы афымцамч ахархәаразы ашәатәқәа реизгара ашьҭыхра азҵаарақәеи изакәанымкәа акриптовалиута арҳара аҿагылара азы анагӡаратә мчра аусбарҭақәа русуа аефффективра ашьҭыхреи ирылацәажәеит.

Аҟәа. Хәажәкырамза 7, 2024 шықәса. Аԥсныпресс. Хәажәкрамза 17 рзы Аԥсны Урыстәылатәи Афедерациа Ахада иалхрақәа мҩаԥысраны иҟоуп. Уи рхы аладырхәыр рылшоит Ареспублика Аԥсны иааиԥмырҟьаӡакәа, мамзаргьы аамҭала инхо Урыстәыла атәылауаҩра змоу зегьы. Абри азы адырра ҟанаҵоит Аԥсны иҟоу Урыстәыла Ацҳаражәҳәарҭа апресс-маҵзура. Алхратә биуллетень аиура азы Урыстәыла атылауаҩ итәылауаҩшәҟәы (аҩныҵҟатәи, мамзаргьы аҳәаанырцәтәи) имазар ахәҭоуп.

Алхырҭатә ҭыԥқәа аартхоит асааҭ 8:00  инаркны 20:00 рҟынӡа абарҭ аҭыӡҭыԥқәа рыла:

Аҟәа ақалақь

Аҟәа Картозиа имҩа, аҩны № 7, абжьаратәи ашкол №5 (алхырҭатә ҭыԥхада № 8002);

Ешба имҩа, аҩны №164, Аԥсны аҳәынҭқарратә миграциатә Маҵзура ахыбра (алхырҭатә ҭыԥхада № 8422);

Ӡиӡариа имҩа №56, Амедицинатә коллеџь ахыбра (алхырҭатә ҭыԥхада № 8424);

Аршба имҩа, аҩны № 56, Аҟәатәи аҳәынҭқаратә коллеџь ахыбра (алхырҭатә ҭыԥхада № 8430);

Лакоба имҩа, аҩны № 111, Амилаҭтә библиотека ахыбра (алхырҭатә ҭыԥхада № 8001);

Аиааира апроспект, аҩны № 33, абжьаратәи ашкол № 10 ахыбра (алхырҭатә ҭыԥхада №8000);

Акьыртаа имҩа, аҩны №32, абжьаратәи ашкол №14 (алхырҭатә ҭыԥхада № 8003). 

Аҟәа. Хәажәкырамза 7, 2024 шықәса. Аԥсныпресс. Аԥсны адәныҟатәи аусқәа рминистр Инал Арӡынба Приднестровтәи Молдавтәи Ареспублика иҟоу Аԥсны  азинмчы змоу ахаҭарнак Алеқсандр Ватаман ихьӡала  Приднестровтәи Молдавтәи Ареспублика иҟоу Аԥсны Аофициалтә Хаҭарнакра аԥҵара 16-шықәса ахыҵра инамаданы адныҳәаларатә цҳамҭа ишьҭит, ҳәа адырра ҟанаҵоит Аԥсны адәныҟатәи аусқәа Рминистрра апресс-маҵзура.  

«Ҳаҭыр зқәу Алеқсандр Владимир-иԥа! «Приднестровтәи Молдавтәи Ареспублика иҟоу Аԥсны Аофициалтә Хаҭарнакра Приднестровтәи Молдавтәи Ареспублика аҳҭнықалақь Тирасполь аҿы аԥҵара азы» Аусԥҟа анапаҵыҩра ҟалеижьҭеи 16-шықәса аҵра инамаданы гәык-ԥсыкала сшәыдныҳәалоит.  

Аусшәҟәы анапаҵыҩра Аԥсны Аҳәынҭқарреи Приднестровтәи Молдавтәи Ареспубликеи рыбжьара аизыҟазаашьақәа рыҿиара аҿы ихадоу хҭысны иҟалеит. Ахаҭарнакра аусура аԥсны-приднестровтәи аизыҟазаашьақәа рыҿиара хра злоу анырра анаҭоит»,  -ҳәа иазгәаҭоуп адныҳәаларатә цҳамҭа аҿы.