Аҟәа. Ԥхынгәымза 23, 2024 шықәса. Аԥсныпресс. Автоҳәынҭинспекциа афото-видео камерақәа рыла ишьақәыргылаз амҩатә ԥҟарақәа еилазго раарԥшра аганахьала аусура арӷәӷәоит.

Астатистика излаҳнарбо ала, афото-  видеофиксациа азинеилагарақәа раарԥшра азы иахьазы зегьы реиҳа аеффективра злоу уснагӡатәны иҟоуп.  Аилагарақәа раарԥшра азы акамерақәа – ари аҷыдалкаатә комплексны иҟоу еиқәыршәагақәоуп. Уи иаҵанакуеит амҩаҿы аныҟәара аԥҟарақәа еилазго раарԥшреи рышьақәыргылареи рзы ахархәагақәа, иара убас аматериалқәа ахәаԥшразы административтә зинеилагарақәа равтофиксациа Ацентр ахь рдәықәҵара.

«Ареспубликатә трасса «Ԥсоу – Егры» аҿы иахьатәи амш азы ишьақәыргылоуп 11 афото-видео камерақәа. Арҭ акамерақәа амашьынарныҟәцаҩ ила арццакратә режим аилагара ҭырхуеит», – ҳәа иҳәеит Автоҳәынҭинспекциа аиҳабы аамҭала инапынҵақәа назыгӡо Дамеи Аҩӡба.

Иахьазы акамерақәа шьақәыргылоуп Ԥсоу, Ԥсырцха, Холоднаиа  речка, Приморск, Ачадара, Синоп. 2024 шықәса нҵәаанӡа урҭ рхыԥхьаӡара  50 рҟынӡа ацҵара азԥхьагәаҭоуп. Автоҳәынҭинспекциа аԥыԥшырҭақәа «Бзыԥ», «Приморское», «Маҷара» амҩатә ԥҟарақәа реилагара афактқәа ирласны анырра аҭара иазку иҷыдоу атехнка ала еиқәыршәоуп.   

«Уаҟа амҩа наҟ-ааҟ аҩганк рыла ҩба-ҩба камера шьақәыргылоуп, иара убас иҟаоуп амашьына аномерқәеи амаркеи аазырԥшуа абжьырдугақәагьы. Автоҳәынҭинспекциа аусзуҩ ирласны ари ацҳамҭа ала зыӡбахә ҳәаз амашьына ааникылоит, уи аԥсҟы зку уаанӡа агәҽанызаара имоухьацзар, усҟан азинеилагара азы аԥкаанҵа еиқәыршәаны инапы иадыркуеит. Ус акәымкәа, амашьынарныҟәцаҩ агәҽанызаара уажәаԥхьагьы иоухьазҭгьы, усҟан административтә пкаанҵа еиқәыршәахоит, ахараԥса иара иаразнак аҭыԥ аҿы ишәар ҟалоит», – ҳәа иазгәеиҭеит Дамеи Аҩӡба.

Аҟәа. Ԥхынгәымза 23, 2024 шықәса. Аԥсныпресс. Аԥснытәи АССР зҽаԥсазтәыз акультура аусзуҩ, амузыкант, авокал-инструменталтә ансамбль «Аԥсны-67»  асолист, «Ахьӡ-Аԥша» аорден III аҩаӡара акавалер Аркади Қриа иԥсҭазаара алҵра инамаданы, аԥсыжра аиҿкааразы Аҳәынҭқарратә комиссиа аԥҵоуп. Уи ахантәаҩыс дҟалоит атәыла акультура аминистр аамҭала инапынҵақәа назыгӡо Динара Смыр.

Аҟәа. Ԥхынгәымза 23, 2024 шықәса. Аԥсныпресс.  Аԥсны Жәлар Реизара Аиҳабы Лаша Ашәба Аԥсны жәлар ирыдиныҳәалеит Аҳәынҭқарратә Бираҟ Амш.

Уаҟа иазгәаҭоуп:

«Ҳаҭыр зқәу Аԥсны Аҳәынҭқарра атәылауаа!

Аԥсны Жәлар Реизара адепутатцәа ишәыдырныҳәалоит Аҳәынҭқарратә Бираҟ Амш!

Ҳреспублика ухаҿы иузаагом уи аҳәынҭқарратә символқәа – абираҟи, агерби, агимни рыда. Урҭ иахәҭаҵәҟьоу аҭыԥ ааныркылоит ҳтәыла аҳәынҭқарратә ԥсҭазаараҿы, дарбарзаалак атәылауаҩ иԥсҭазаараҿы.

Аҳәынҭқарратә Бираҟ Амш – ари шәареи ҳареи зыргылара ҳаҿу ҳаамҭазтәи Аԥсны аҭоурых ауп. Уи иҵабыргыҵәҟьаны жәлары зегьы ирныҳәаны иҟоуп, инарҭбааны иазгәарҭоит Аԥсны Аҳәынҭқарраҿы мацара акәымкәа, хара уи анҭыҵгьы. Ҳара ҳбираҟ азы агәадура ҳамоуп, уи ианубаалоит аԥсуа жәлар рҭоурыхтә гәалашәара, рпатриотизм, рфырхаҵара, реилаҵәара.

Аҟәа. Ԥхынгәымза 23, 2024 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аҳәынҭқарратә бираҟ амш азы Аԥсны жәлар дрыдныҳәалеит.

Ҳаҭыр зқәу ҳауаажәлар!

Гәык-ԥсык ала ишәыдысныҳәалоит Аԥсны Аҳәынҭқарратә бираҟ Амш!

1992 шықәса, ԥхынгәымза 23 ҳтәыла аҭоурых наунагӡа ианылеит Владислав Арӡынба инапхгарала Аԥсны Иреиҳаӡоу Асовет Аҳәынҭқарратә бираҟи агерби  анышьақәнарӷәӷәаз мышны. Ари аҩыза аҵак ду змоу ахҭыс ахақәиҭреи ахьыԥшпымреи рзы ҳажәлар рықәԥара иасимволны иҟалеит.

Ҳара ҳбираҟ - ус баша ҳәынҭқарратә символны иҟам, ибеиоу ҳкультуратә ҭынха, иахаҿроуп, аԥсуа жәлар ижәытәӡатәуи рытрадициақәа, еицамкуа рдоуҳамчи   аныԥшуеит. Уи иҳанаҳәоит ҳаԥсадгьыл аԥеиԥш лаша иазықәԥоз ҳабацәа рыгәаӷьра, ҳтәыла аизҳазыӷьаразы иахьа дарбанзаалак аҭакԥхықәра ду иҳаду атәы.

Абираҟ анышьақәырӷәӷәаха анаҩс мчыбжьқәак ааҵуаны еиԥш, аибашьра иалагеит, аԥсуа жәлар рзы ԥышәара дуны иҟалаз. Аха абри аҳәынҭқарратә бираҟ иаҵагыланы ҳажәлар ирылшеит ахьыԥшымразы ақәԥараҟны аиааира агара.

Аҟәа. Ԥхынгәымза 23, 2024 шықәса. Аԥсныпресс. Ироуз аоперативтә дырра ала ауснагӡатәқәа рымҩаԥгараан, ԥхынгәымза 20 рзы Аҳәынҭқарратә ҳазалхратә Еилакы аусзуҩцәеи атәыла аҩныҵҟатәи аусқәа Рминистрра аекономикатә шәарҭадареи акоррупциа аҿагылареи рзы Аусбарҭа Хадеи  аекономикатә шәарҭадара Аусбарҭеи русзуҩцәеи Цандрыԥшь аҳаблаҿы иҟоу, атәылауаҩ Кешьиан А.А ихатәы ҩны аҿы ирыԥшааит 1 164 блок инарзынаԥшуа абаџьқәҵарадатә дәқьан (Duty Free) адыргақәеи Аԥсны акцизтә еизга амаркақәеи рыда иҟаз асигареҭқәа.

Аҟәа. Ԥхынгәымза 23, 2024 шықәса. Аԥсныпресс. Ԥхынгәымза 23 рзы 32 шықәса ҵуеит Ареспублика Аԥсны аҳәынҭқарратә символика – Аҳәынҭқарратә бираҟи Аҳәынҭқарратә герби рышьақәырӷәӷәара ҟалеижьҭеи.

Асааҭ 19:40 рзы Аҟәа ақалақь, Амҳаџьырқәа рыԥшаҳәаҿы С. И. Ҷанба ихьӡ зху Аԥсуа драматә театр аҟынтәи Сегреи Багаԥшь ихьӡ зху ашҭанӡа Аԥсны атәылахьчара Аминистрра иатәу аоркестр ацны, 1200 шықәса реиҳа зхыҵуа Аԥсны аҭоурых аазырԥшуа аԥсуа бираҟқәа 16 кны ажәлар рымҩасра мҩаԥгахоит. Аныҟәара ашьҭахь ауаа зегьы еизоит Аԥсуа драматә театр аҿаԥхьа, араҟа асааҭ 20:00 рзы Атеатралтә плошьад аҿы акәашареи ашәаҳәареи ҟалоит. Имҩаԥгахоит аҳәынҭқарратә рҿиаратә коллективқәеи аԥсуа естрада артистцәеи алархәны аныҳәатә концерт.

Аԥсны аҳәынҭқарратә бираҟи агерби шьақәдырӷәӷәеит Аԥсны Иреиҳаӡоу Ахеилак аилатәараан ԥхынгәы 23, 1992 шықәса рзы асахьаҭыхҩы Валери Гамгьиа иескизқәа рыла.

Аԥсны Аҳәынҭқарра абираҟ зкәакьҭа иашоу аш иалхуп. Аԥсны Аҳәынҭқарра абираҟ ашәага-загақәа - ауреи аҭбаареи 2:1 ҳәа аизыҟазаашьа рымоуп. Аш аурала ашьацԥшшәылеи ашкәакәеи рыла зҽеиҭнызыԥсахло ацәаҳәақәа ануп, урҭ рахьынтәи ԥшьба иаҵәоуп, хԥа – шкәакәоуп.

Хыхьла илбаауа актәии ҵаҟатәи аҵыхәтәантәии ацәаҳәақәа шьацԥшшәылоуп. Аиаҵәа-шкәакәа цәаҳәақәа – Аԥсны злахәылаз Ашьхаруатә республика (1918ш.) абираҟ аелементқәа ируакуп. Ашьац ԥшшәы аԥсҭазаара иасимволуп, ашкәакәа – атәыла ԥхьаҟатәи аԥеиԥш бзиа.

Хыхьтәи армарахьтәи акәакь аҟны абираҟ ахәы иазааигәаны иануп абираҟ аурала зоура  0, 38, зыҭбаара  х-цәаҳәак ираҟароу иҟаԥшьыхәхәароу акәакьҭа иаша. Аԥшьыркца агәҭаны иарбоуп хыхьынтә ҵаҟала иаарту арӷьа маҿа шкәакәа. Анапы ахахьала иаҿыкәыршоуп хәба-хәба кәакьҭа змоу аеҵәа шкәакәақәа быжьба.

Аҟәа. Ԥхынгәымза 19, 2024 шықәса. Аԥсныпресс. Аԥсны Абанк афоие аҿы еицырдыруа аԥсуа скульптор, Аԥсны асахьаҭыхыҩцәа Реидгыла раԥхьатәи ахантәаҩы Марина Ешба  диижьҭеи 100-шықәса аҵра иазку афотоцәыргақәаҵа аатит.

Ахәаԥшцәа ирыдгалаз акомпозициа иалалеит уи лусумҭақәа 16 фотосахьа. Урҭ рхыԥхьаӡараҿы иҟоуп ианлаамҭаз инхоз ауаа рпортретқәагьы. 

«Цәыргақәҵак иҭагӡаны ХХ ашәышықәазы инхоз иналукааша Аԥснытәи аҳәса рхыԥхьаӡараҿы иҟоу Марина Ешԥҳа лнысымҩа, аҟазараҿы ллагала, лхаҭара атәы аарԥшра даара ицәгьоуп, убри аҟара аҵак ду лымоуп.

"Раԥхьатәи аԥсуа дипломат иԥҳа, раԥхьатәи аскульптор, ауаажәларратә усзуҩы, Аԥсны асахьаҭыхыҩцәа Реидгыла раԥхьатәи ахантәаҩы, абри зегьы Марина Ешԥҳа лоуп. Лара лҟазара атәы ишаҭаху еиԥш иҭҵааӡам. Асоветтә скульптура иаман ахатәы традициа дуқәа. Лара раԥхьатәи лырҵаҩы Белошова иреиӷьӡаз лакәын. Ацәыргақәҵаҿы иҟоуп асериа аус здылулоз асоветтә медалқәа ааба. Иара убас урҭ аусурақәа азгәаҭан иреиӷьу асахьаркыратә знеишьа аазырԥшыз ҳәа. Марина Ешԥҳа Москва раԥхьаӡа акәны иаалыртит аԥсуа сахьаҭыхыҩцәа рцәыргақәҵа. Иахьагьы иҟоуп лара лусумҭақәа Урыстәыла амузеиқәа рҿы, урҭ ирықәҭыхзар, Аԥснытәи агалереиазы артефакт иаҩызахон», - ҳәа лҳәеит Ельвира Арсалиаԥҳа.

Аҟәа. Ԥхынгәамза 19, 2024 шықәса. Аԥсныпресс. Аԥсны аҩныҵҟатәи аусқәа рминистр Роберт Киут иҟаиҵаз адҵа инақәыршәаны, ԥхынгәымза 18 – 19 рзы имҩаԥысуан азин еилазго раарԥшра иазырхаз ареидтә профилактикатә усмҩаԥгатәқәа, ҳәа адырра ҟанаҵоит Аԥсны аҩныҵҟатәи аусқәа Рминистрра апресс-маҵзура.  

Имҩаԥгаз аусҩаԥгатәқәа ирылҵшәаны амҩатә ԥҟарақәа реилагара иазкны еиқәыршәахеит ҩынҩажәа инарзынаԥшуа аԥкаанҵақәа.

Аҟәа. Ԥхынгәымза 19, 2024 шықәса. Аԥсныпресс. Амилициа аусзуҩцәа 20 цыра амаининг аппаратқәа рыԥшааит Очамчыреи Гагреи араионқәа рҿы.

Акәасқьа ақыҭан, Бекир-оглы Русҭам Џьемал-иԥа ихатәыҩны ахьгылоу аҵакыра аҿы, ацхыраагӡатә хыбра аҩныҵҟа Очамчыра араион аҩныҵҟатәи аусқәа Русбарҭа аусзуҩцәеи Аҳәынҭқарратә шәарҭадара Амаҵзура аусзуҩцәеи 17-цыра аппарат рыла ишьақәгылаз амаининг-ферма рыԥшааит. Аиқәыршәагақәа аҿыхны Аҳәынҭстандарт ашьҭаҵарҭа ахь инагоуп.

Аҟәа. Ԥхынгәымза  20, 2024 шықәса. Аԥсныпресс. Џьансыхә Адлеиба 30 мшы ҳәа дырбаандаҩуп, ҳәа адырра ҟаҵоуп Аҟәатәи ақалақьтә ӡбарҭа аофициалтә саит аҿы.

Ԥхынгәымза 19 рзы Аҟәа ақалақь аҩныҵҟатәи аусқәа Русбарҭа Аҟәатәи ақалақьтә ӡбарҭа ахь Аԥсны Ашьаустә Закәанеидкыла ахәҭаҷ 207, ахәҭа 1 иазԥхьагәанаҭо ацәгьоура (абџьар, мамзаргьы абџьар аҳасабала рхы иадырхәо амаҭәарқәа рыла  ауаажәлара раҳаҭыр амбара аазырԥшуа ахулиганра, ауаажәларратә зинеиҿкаара ӷәӷәала аилагара) азы Адлеиба Џьансыхә Иван-иԥа ирбаандаҩра азы аӡбамҭа адкылара азы  аҳәара ҟанаҵеит.