Аҟәа. Хәажәырамза 21, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа Урыстәылатәи Афедерациа Адәныҟатәи аусқәа рминистр С. В. Лавров Иирамш идиныҳәалеит.

«Ҳаҭыр зқәу Сергеи Виктор-иҧа!

Аԥсны жәлар рыхьӡала, хаҭала сара сыхьӡала гәык-ԥсык ала ишәыдысныҳәалоит Шәира амш. 

Набыцра змам шәзанааҭә мҩа, шәԥышәа ду, хьаҳәа-ԥаҳәарада шәыԥсадгьыли шәыжәлари рымаҵ аура Шәара жәларбжьаратәи ахьӡ ду арҳара, ҳаамҭазтәи  иналукааша дипломатны  аҟалара шәылнаршеит.

Шәара зыҩаӡара ҳараку профессионалуп, зыԥсҭазааратә позициа иацәхьамҵуа патриот иашоуп. Иуадаҩу жәларбжьаратәи азҵаарақәа рыӡбараҟны Шәара шәалахәра аҭынчреи аҭышәынтәалареи ралыршара иацхраауеит.     

Жәларбжьаратәи аизыҟазаашьақәеи адипломатиеи русхк аҟны Шәара шәусура хәы змаӡам лагаламҭаны иҟоуп Аԥсны Аҳәынҭқарреи Урыстәылатәи Афедерациеи рыбжьара аусеицура арӷәӷәараҿы. 

Аԥсны ахә ҳаракны иршьоит аԥсны-урыстәылатәи аизыҟазаашьақәа рырҿиареи аусхкқәа зегьы рыҟны ҳаидгыларатәи ҳастратегиатәи усеицура  арӷәӷәареи рыҟны Шәара инашәыгӡо ароль.

Агәра згоит традициала ҳтәылақәа рыбжьара ишьақәгылаз зыҩаӡара ҳараку аиҩызаратә усеицура аԥхьаҟагьы ҩ-ганктәи аусеицура арҭбаара ишацхраало ҳажәларқәа реизҳазыӷьара ахьӡала.

Сергеи Виктор-иԥа, абри амш аҽны азин сышәҭозар, Шәира амш шәыдныҳәало, ишәзеиӷьасшьар сҭахуп агәабзиара, еицакра зқәым агәамч, аихьӡара шәыԥсадгьыл амаҵ аураҟны!».

Аҟәа. Хәажәкырамза 20, 2024 шықәса. Аԥсныпресс. Апарламент аҟны имҩаԥысит «аиҳабыратә сааҭ». Иахьа Аԥсны Жәлар Реизара – Апарламент аҟны «аиҳабыратә сааҭ» аҳәаақәа ирҭагӡаны имҩаԥысит адепутатцәеи аҵара аминистр Инал Габлиеи реиԥылара. Аиԥылара иалахәыз ареспубликаҟны аҵара апроблемақәа ирылацәажәеит. 

Аминистр иажәахә аҟны аусбарҭа аусуреи уи аҿаԥхьа иқәгылоу ауснагӡатәқәеи дырзааҭгылеит. 

Азакәанԥҵара инақәыршәаны аҵареи, абызшәатә политикеи, адини, АИХ аусқәа рзи аилак ахантәаҩы азҵаарақәа азирхиеит «аиҳабыратә сааҭ» аҟны рзыӡырҩразы.

Аҟәа. Хәажәкырамза 20, 2024 шықәса. Аԥсныпресс. Аҳәынҭқарра Ахада ихаҭыԥуаҩ Бадра  Гәынба   В. Г. Арӡынба ихьӡ зху Жәларбжьаратәи аҳаирбаӷәаза «Аҟәа» аҵакыраҿы  абаӷәаза  аргылареи ареконструкциа амҩаԥгареи рызҵаарақәа ирызкны акоординациатә штаб аусуратә еилатәара мҩаԥигеит.  

Аилатәара рхы аладырхәит атәыла аԥыза-министр актәи ихаҭыԥуаҩ, аенергетикеи атранспорти рминистр  Џьансыхә Нанба, аԥыза-министр ихаҭыԥуаҩ, аекономика аминистр Кристина Озган,  Иҷыдоу аҭагылазаашьақәа рзы аминистр Лев Кәыҵниа, Аҳәынҭқарратә шәарҭадара Амаҵзура ахантәаҩы Ҭемыр Ахьиба, аҳаирбаӷәаза адиректор Хада Наиль Батраев.

Аиԥылараҟны ирзааҭгылан аусура аамҭа анагӡара иадҳәалаз азҵаатәқәа. Аԥырратә дәаҿы нап аркуп аԥырра-тәарҭатә цәаҳәақәа рырҽеира, иара убас аҿықәқәа ррыцқьара. Ажәытә хыбрақәа рықәгаразы аусурақәа цоит.

Аԥсны Аҳәынҭқарра Иҷыдоу аҭагылазаашьақәа рзы Аминистрра аспециалистцәа рымчала артҟәацгатә маҭәашьарқәа рыԥшааразы ауснагӡатәқәа, иара убас уи аҵакыраҿы аҵлақәеи ачықьқәеи ррыцқьара мҩаԥгоуп.

Аҟәа. Хәажәкырамза 20, 2024 шықәса. Аԥсныпресс.  Агәабзиарахьчара аминистр Едуард Быҭәба Гәдоуҭатәи араионтә хәышәтәырҭа аҿы анҭыҵтәи аилатәара мҩаԥигеит, ҳәа адырра ҟаҵоуп агәабзиарахьчара Аминистрра аофициалтә саит аҿы. Аилатәара ихы алаирхәит араион ахада инапынҵақәа назыгӡо Рауль Лолуа.  

Араионтә хәышәтәырҭа аҳақьым Хада Ҳаџьараҭ Шамба ахәышәтәырҭа аҿы иҟоу аҭагылазаашьа атәы еиҭеиҳәеит, иҳәеит акомпиутертә тамографгьы шыбжьысыз атәы.  Араионтә хәышәтәырҭа Хада аҿы зхыԥхьаӡара 40 нызықьҩык рҟынӡа инаӡо Гәдоуҭа араион ауааԥсыра рымацара акәӡам ирыдыркыло, ирыдыркылоит иара убас егьырҭ араионқәа рҟынтәи апациентцәагьы, убри аҟнытә ахәышәтәырҭа аҿы акомпиутертә тамограф зда ихәарҭам маруганы иҟоуп.

Аҟәа. Хәажәкырамза 20, 2024 шықәса. Аԥсныпресс. Москва ақалақь аҿы Аԥсны Аҳәынҭқарра Ахада Аслан Бжьаниеи Урыстәылатәи  Афедерациа ашәарҭадара Ахеилак амаӡаныҟәгаҩ актәи ихаҭыԥуаҩ Рашид Нургалиеви русуратә еиԥылара мҩаԥысит.

Аҟәа. Хәажәкырамза 20, 2024 шықәса. Аԥсныпресс. Аҳазалхратә ҭыԥ «Ԥсоу аусзуҩцәа аҳазалхратә гәаҭара «Импорт» азона аҿы иаанкыланы игәарҭеит автомашьына «Toyota Alphard». Уи аԥсҟы икын Кәарҷиа Р. Р.  Амашьына аидараҭыԥ аҿы аполиетилентә еилаҳәарақәа ирылаҳәаны иҭан акриптовалиута арҳара иазку амаининг аппаратқәа ԥшьба Whatsminer M30 S.  Абри атәы аанацҳауеит Аҳәынҭқарратә аҳазалхратә еилакы.

Аҟәа. Хәажәкырамза 19, 2024 шықәса. Аԥсныпресс. 2024 шықәса ажьыныҳәамза-жәабранмза рзы  иахыԥхьаӡалаз атәанчахәқәа, аԥаратә цхыраагӡатәқәа, ацҵақәа рзеиԥш еицҵалыҵ 234 млн. 237 нызықь мааҭ рҟынӡа инаӡоит, уи 24 млн. 999 нызықь мааҭ рыла иҳаҩсыз ашықәс арбагақәа раасҭа еиҳауп.  Абри азы атәыла аԥыза-министр Алеқсандр Анқәаб адырра ииҭеит Атәанчаҩратә фонд ахантәаҩы Денис Гәылариа.  

2023 шықәса аиԥш-зеиԥшу аамҭахәҭа азы ишәан  209 млн. 238 нызықь мааҭ.

Ҳазҭоу ашықәс ажьырныҳәамзеи жәабранмзи рзы Атәанчаҩратә фонд ахь иалагалахеит 160 млн. 929  нызықь мааҭ абгаԥсатә лагалақәа, уи 2023 шықәса рзы аасҭа 27 млн. 737 нызықь мааҭ рыла еиҳауп.

Хәажәкырамза 1 азы атәанчахәқәеи аԥаратә цхыраагӡатәқәеи зауа рхыԥхьаӡара 48 169-ҩык рҟынӡа инаӡон, уи  2023 шықәса рзы аасҭа 1 461-ҩык рыла еиҵоуп.   

Зфинансркра мҩаԥгаз атәанчахәқәа рахь ацҵақәа реицҵалыҵ ҳазҭоу ашықәс хәажәкрамза  1 азы  57 млн. 278 нызықь мааҭ рҟынӡа инаӡеит, уи 2023 шықәса рзы аасҭа  5 млн. 255 нызықь мааҭ рыла еиҳауп.  

Атәанчахәқәеи аԥаратә цхыраагӡатәқәеи зауа рзеиԥш хыԥхьаӡара 13 155-ҩык рҟынӡа инаӡоит, уи  2023 шықәса рзы аасҭа 1 113 - ҩык рыла еиҳауп.

2024 шықәса алагара инаркны 19 млн. 532 нызықь мааҭ рҟынӡа инаӡо Атәанчахәытә фонд аҿаԥхьа ауал ашәара алыршахеит.  Зынӡа аинкассатә напынҵақәа рыла 2024 шықәса ажьырныҳәамза инаркны идыршәоуп 481,6 нызықь мааҭ.  

Аҟәа. Хәажәкырамза 19, 2024 шықәса. Аԥсныпресс. Алабоатортә ҭҵаарақәа рылҵшәақәа рыла аспециалистцәа Аԥсны, Краснодартәи атәылаҿацә, Севастополь аӡы иху аԥсаатә – абаҟәақәа хыԥхьаӡара рацәала рыԥсра аԥстәқәа рыгрипп авирус, мамзаргьы Ниукасла ҳәа изышьҭоу ачымазара иахымҟьаӡеит ҳәа ишьақәдырӷәӷәеит.    Абри азы ТАСС ахь адырра ҟарҵеит Краснодартәи атәылаҿацә аветеринариа адепартамент аҿы.

«Аҳәынҭқарратә биуџьеттә Усбарҭа «Крапоткинтәи атәылаҿацәтә ветеринартә  лабораториа» аҿы имҩаԥгаз алаборатортә ҭҵаарақәа инарықәыршәаны,  аԥсаатәқәа рыгрипп авирус, мамзаргьы Ниукасла ҳәа изышьҭоу ачымазара ахацыркыга аарԥшӡамызт», ҳәа адырра ҟарҵет адепартамент аҿы.

Аҟәа. Хәажәкырамза 19, 2024 шықәса. Аԥсныпресс. Имҩаԥгаз аоператив-профилактикатә усмҩаԥгатәқәа ирылҵшәаны Гәылрыԥшь араион аҩныҵҟатәи аусқәа Русбарҭа аусзуҩцәа Мархьаул ақыҭан ирыԥшааит Атулиан Олег Амаиак-иԥа итәыз аус зуаз амаининг-ферма.

 Аа-аппаратк аҿыхны Астандартқәеи ахархәаратәи атехникатәи ахылаԥшра азы аҳәынҭқарратә Еилакы ашьҭаҵарҭа ахь идәықәҵахеит, ҳәа адрра ҟанаҵоит аҩныҵҟатәи аусқәа Рминистрра апресс-маҵзура.

Аҟәа. Хәажәкырамза 19, 2024 шықәса. Аԥсныпресс. Шәагаала имаҷу аӷбақәа рзы аҳәынҭқарратә Инспекциеи аекологиатә прокуратуреи русзуҩцәа Аҟәатәи абаӷәаза аҟынтәи Очамчыра араион аӡиа Скурча аҟынӡа амшын аӡымҽхак иахьаҵанакуаз раԥхьаӡа акәны агәаҭарақәа еицымҩаԥыргеит. 

Аекологцәа ражәақәа рыла, абжьааԥны, уимоу лассы-лассы Аԥсны амшынтә фауна иҭоу  аԥстәқәеи аԥсаатәқәеи рҭахара аԥсыӡкыгатә акаҭақәа рыргылара азы ишьақәыргылоу аԥҟарақәа реилагара иахҟьоит.