Сергеи Шамба Абжьаратәи Америка иреиҳау атәылақәа иреиуоу, Никарагуа аҟынтәи ас еиԥш аҩаӡара ҳарак змоу асасцәа Аҳәынҭқарра ахада иалхрақәа рҿы анаԥшыҩцәа раҳасабала раара Аԥсны азы аҵак ду шамоу азгәеиҭеит. Уи инаҵшьны иҳәеит Аԥсны адәныҟаполитикатә усураҿы Никарагуеи Венесуелеи ирымоу аҵак ду.
Никарагуа Иреиҳаӡоу алхратә хеилак ахада Бренда Роча Никарагуа Аҳәынҭқарра ахада Даниель Ортега, Аҳәынҭқарра ахада ихаҭыԥуаҩ Росарио Мурильо рҟынтәи Сергеи Шамба асалам ииҭеит. Лара иазгәалҭеит, ас еиԥш акыр зҵазкуа абжьыҭиратә процесс ахалархәра дара рзы ҳаҭыр дуны ишыҟоу.
Бренда Роча Аԥсны ажәлар рхатәы ҳәынҭқарра ашьақәыргыларазы рықәԥара аҳаҭыр шақәылҵо лҳәеит, Никарагуа ажәларгьы иара абри аҩызаҵәҟьа ақәԥара шымҩаԥырго азгәалҭеит.
Аминистр инапынҵақәа назыгӡо аԥсны-никарагуатәи аизыҟазаашьақәа, аекономикатә усхкыгьы уахь иналаҵаны, рыҿиаразы агәыӷра шимоу азгәеиҭеит. Уи ажәалагала ҟаиҵеит Аԥсны Никарагуатәи ахәыҷқәа рзы аԥхынтәи алагер аиҿкаара алыршара иазхәыцзарц.
Сергеи Шамба, иара убасгьы иколлега, Никарагуа адәныҟатәи аусқәа рминистр, Вальдрак Џьентске асалам изынеиҭиит, Аԥсныҟа дааразы агәыӷра шимоу азгәеиҭеит.
