Аҟәа. Лаҵарамза 8, 2023 шықәса. Аԥсныпресс. Аԥсны Аҳәынҭқарра Ахада Ауаажәларратә Палата Амаӡаныҟәгаҩ, «Аԥсны анацәа аҭынчреи асоциалтә иашареи рзы» аиҿкаара анапхгаҩы  Кьычба Гәули лира Амш лыдиныҳәалеит.

Адныҳәалараҿы, ахәҭакахьала иҳәоуп:

«Ҳаҭыр зқәу Гульнара Мелитон-иԥҳа! Шәара шәыԥсҭазааратә мҩа шәпатриотизми Шәыԥсадгьыли шәыуаажәлари рахь ишәымоу абзиабареи зеиӷьаҟам ала иарҵабыргуеит. Шәара шәыԥсҭазаара зегьы ишәызгәакьоу Аԥсны иадҳәалоуп. Ауаажәларратәи аполитикатәи усзуҩы иаҳасабала Шәара зажәеи зуси еимадоу, зыжәлар рыҩныҵҟа зыгәрагоу, еснагь ахаҵгылара иазхьоу,  ззанааҭдырра ҳараку уаҩык иаҳасабала шәеицырдыруеит.

Аҟәа. Рашәарамза 8, 2023 шықәса. Аԥсныпресс. Аԥсны Жәлар Реизара-Апарламент адепутатцәа актәи аԥхьараҿы Аԥсны Аҳәынҭқарра Аҳазылхратә Закәанеидкыла апроекти «Аԥсны Аҳәынҭқарра Аҳазылхратә Заканеидкыла азинмчы аиура азы» азакәан апроекти рыдыркылеит.  

Аҳәынҭқарра Ахада Апарламент аҿы есымшатәи ихаҭарнак Анри Барцыц, хра злоу аиҭакрақәа маҷымкәа излагалоу, ирҿыцу анорма-зинтә шәҟәынҵа  адкыларазы адгылара шыҟаҵоу инаҵшьны иазгәеиҭеит.  

«Аԥсни Урыстәылеи рзакәанԥҵарақәа реишьашәалара апрограмма аҳәаақәа ирҭагӡаны ҳколлегацәа алархәны зымҽхак ҭбаау аҩганктәи аусура мҩаԥган.  Ари ашәҟәынҵа Аԥсны амчра аусбарҭақәа рҿы ақәыршаҳаҭра апроцедурақәа ирхысит», - ҳәа иҳәеит Анри Барцыц.

Аҟәа. Рашәарамза 8, 2023 шықәса. Аԥсныпресс. Апарламент Аԥсны абиуџьеҭнҭыҵтәи афондқәа хәба 2022 шықәсазы рбиуџьеҭқәа шьақәнарӷәӷәеит. Зыӡбахә ҳәоу Атәанчаҩратә фонд, ихымԥадатәиу амедицинатә бгаԥса Афонд, 1992-1993 шш. Аԥсны жәлар Рџьынџьтәылатәи еибашьра аветеранцәа рбиуџьетныҵтәи Афонд, Асоциалтә бгаԥсеи аџьа ахьчареи рзы Афонди Амҩатә Фонди.

Арепатриациа Афонд абиуџьет анагӡаразы аҳасабырба иарбоу аилатәараҿы иахәамԥшӡеит.

Иҳаҩсыз ашықәс азы Атәанчаҩратә Фонд ахашәалахәқәа 1 362 397,7 нызықь мааҭ рҟынӡа инаӡоит, аныхтәқәа  – 1 295 861,6 нызықь мааҭ рҟынӡа инаӡоит. Ажьырныҳәамза 1,  2023 шықәсазы Афонд аԥаратә хархәагақәа рцәынха  – 83 654,2 нызықь мааҭ рҟынӡа инаӡоит.  

Ихымԥадатәиу амедицинатә бгаԥса Афонд ахашәалахәқәа –  54 490,0 нызықь мааҭ рҟынӡа инаӡеит, аныхтәқәа  – 55 311,5 нызықь мааҭ рҟынӡа инаӡеит.;  Ажьырныҳәамза 1,  2023 шықәсазы Афонд аԥаратә хархәагақәа рцәынха  –1 917,7 нызықь мааҭ рҟынӡа инаӡеит.

Аҟәа. Рашәарамза 8, 2023 шықәса. Аԥсныпресс. Аԥсны Жәлар Реизара-Апарламент адепутатцәа аԥшьаша, рашәарамза  8 рзы имҩаԥысыз аилатәара аҿы амшхәаԥштә иалагалаз аадгьылхархәаратә зҵаарақәа быжьба рзы аӡбамҭақәа рыдыркылеит.

Еиуеиԥшым аплошьад змоу адгьылҵакырақәа категориак аҟынтәи даҽа категориак ахь аиагара, иара убас асасааирҭақәеи анхарҭаҩнқәеи рыргыларазы хәыда-ԥсада ахархәаразы, мамзаргьы қьырала адгьылқәа рзоужьра азҵаарақәа  иахәаԥшит.

Апарламент адепутатцәа  ирыхәаԥшит, иақәшаҳаҭхеит, иагьрыдыркылеит Аԥсны Жәлар Реизара - Апарламент Ақәҵарақәа: 

«Аԥсны Аҳәынҭқарра Аминистрцәа реилазаара Дранда аҳаблаҟны 0,76 га зҵазкуа адгьыл ҭыҧ «ақыҭанхамҩатә ҵакы змоу адгьылқәа» ркатегориаҟнытә «аиланхарҭатә дгьылқәа» ркатегориахь аиагаразы аҭара ақәиҭтәразы»;

«Аԥсны Аҳәынҭқарра Аминистрцәа реилазаара Гагра араион Маҳадыр ақыҭаҟны, Апартизанцәа рымҩаҿы 0.01 га зҵазкуа адгьыл ҭыҧ Урыстәылатәи Афедерациа Ашәараҭадаразы афедералтә маҵзура Аҳәаахьчаратә маҵзура аӡеизакырҭа аргыларазы аҭаразы»; 

Аҟәа. Рашәарамза 8, 2023 шықәса. Аԥсныпресс. Аԥсны Жәлар Реизара-Апарламент адепутатцәа «Аԥсны аныҳәатәи агәалашәаратәи амшқәа рзы» азакәан аиҭакрақәа аларгалеит.  

Аԥсны иҿыцу даҽа х-занааҭ ныҳәа ацлеит :

Лаҵарамза 17 – Аԥсны Адипломатиатә Маҵзура Амш;

Рашәарамза 10 – Аԥсны астатистика аусзуҩ Имш;

Ԥхынгәымза 4 – Аԥсны аԥсеиқәырхаҩ Имш.

Аҟәа. Рашәарамза 8, 2023 шықәса. Аԥсныпресс. Ашәба Лаша Аԥсны Аҳәынҭқарра Ауаажәларратә палата Амаӡаныҟәгаҩ Кьычба Гәули Лира амш лыдиныҳәалеит. Аԥсны Жәлар Реизара - Апарламент Аиҳабы Ашәба Лаша Аԥсны Аҳәынҭқарра Ауаажәларратә палата Амаӡаныҟәгаҩ Кьычба Гәули Лира амш инамаданы адныҳәалара ҟаиҵеит.

Адныҳәалараҟны иҳәоуп:

«Ҳаҭыр зқәу Гульнара Мелитон-иԥҳа!

Аԥсны Жәлар Реизара - Апарламент ахьӡала гәык-ԥсык ала ишәыдысныҳәалоит Шәира амш!

Шәара шәыԥсҭазаара зегьы ишәызгәакьоу Аԥсны иадҳәалоуп. Ауаажәларратәи аполитикатәи усзуҩы иаҳасабала Шәара ишәымоу ахьӡ ҳреспубликаҟнеиԥш, уи анҭыҵгьы ахә ҳаракны иршьоит.

Зажәеи зуси еимадоу, зыжәлар рыҩныҵҟа зыгәрагоу, Аԥсадгьыл аҿаԥхьа аҭакԥхықәра аныҟәгара зылшо ауаҩы – абарҭ аҟазшьақәа ҿырԥшыга бзианы иҟоуп.

Ҳара ахә ҳаракны иаҳшьоит аиҿкаара «Аԥсны анацәа аҭынчреи асоциалтә иашареи рзы» анапхгараҿы шықәсарацәала имҩаԥыжәго аусура. Шәара иаашәырԥшуа ахачҳара, агәбылра, агәкамыжьреи аԥсҭазаара агәрагареи ихьанҭаз аибашьрашьҭахьтәи ашықәсқәа рзы ҳауаажәлар рзы аҵак ду аман. 

Аҟәа. Рашәарамза 8, 2023 шықәса. Аԥсныпресс. Сынтәа Аҟәа ақалақь Амш азгәарҭоит ԥхынгәымза  8 азы.  Абри азы адырра ҟанаҵоит аҳҭнықалақь Ахадара.

Аҟәа ақалақь Амш,  Ареспублика ахьыԥшымра азхаҵара  ҟалеижьҭеи 15-шықәса аҵреи Аԥсны жәлар Рџьынџьтәылатәи еибашьра аҿы Аиааира агара Амш 30-шықәса ахыҵреи ишахәҭоу азгәаҭаразы аҽазыҟаҵара иаҿуп. Ақалақь аҿы, ауааԥсыра зегьы реиҳа бзиа ирбо аԥшаҳәа аҿгьы аиҭашьақәыргыларатә усурақәа мҩаԥысуеит.

Аҟәа ақалақь ахада Беслан Ешба аиҭашьақәыргылара-рҽеиратә усурақәа ахьымҩаԥысуа аҭыԥ даҭааит. Араҟа аныҳәатә умҩаԥгатәқәа рӷьырак мҩаԥыслоит.

Аҟәа ақалақь еиҳа изҭаауа аҭыԥқәа иреиуоуп – аколоннада, Аҟәа зегьы гәыблыла «Брехаловка» ҳәа изышьҭоу еицырдыруа акаҳуажәырҭа.

«Ақалақь Амш азгәҭара аламҭалазы зегьы бзиа еицаабо Брехаловка аҭеиҭыԥш арҽеира ҳахьӡар ҳҭахуп. Ари аусмҩаԥгатә иҳаҩсыз ашықәс азы иазԥхьагәаҭан. Ахыргьагьа арҽеира аҭахуп. Иазгәасҭарц сҭахуп, уи сынтәа 75 шықәса ахыҵуеит. Саԥыҩланы исҳәар сҭахӡам, аха ақалақь Амш азы ихадоу аусмҩаԥгатәқәа руак Брехаловка имҩаԥгахоит. Убри аҟнытә уи ԥшӡахарц азы арҽеира ҳгәы иҭоуп. Сгәы иаанагоит, ҳақалақь ауааԥсыреи уи иаҭаауа асасцәеи уи ргәаԥхап ҳәа», - иҳәеит аҳҭнықалақь ахада Беслан Ешба.   

Акаҳуажәырҭа «Амра» инаркны амҳаџьыраа рбаҟа аҟынӡа абетон иалху афонартә шьаҟақәа рҿыцхоит, иҿыцу афымцамҩангага шьақәыргылахоит, аус зымуа афонарқәа ԥсаххоит. Абетонтә дақәқәеи абагьырқәеи ршәуеит.

«Аҳәынҭргыларапроект» адиректор Асҭамыр Ԥлиа иҟаиҵаз адыррақәа рыла, иахьазы аплафонқәа рыҵаҟа афымцамҩангага ҿыцқәа рышьҭаҵара хыркәшоуп, иҟам афонартә шьаҟақәа рҭыԥан аҿыц шьақәыргылахоит.

Аҟәа. Рашәарамза 8, 2023 шықәса. Аԥсныпресс. Аԥыза-министр ихаҭыԥуаҩ Сергеи Пустовалов аҳәынҭқарратә хықәкытә программа «Анхарҭаҭыԥ 2023-2025 шш.» анагӡаразы Анапхгарабжьаратәи анагӡара-еиҿкааратә Комиссиа аилатәара мҩаԥигеит, ҳәа адырра ҟанаҵоит Аԥсны аминистрцәа Реилазаара апресс-маҵзура.

Акомиссиа анхарҭаҭыԥ аахәаразы афинанстә цхыраара аҭара азы Ареестр иалагалоу 10-ҩык атәылауаа рҟынтәи азыҳәамҭақәа рынагӡара иақәшаҳаҭхеит.   Урҭ рахьынтә:

Аинвалид ма зхәыҷаахыс зхы иамыхәо ахәыҷы знапы дану аҭаацәа – азыҳәамҭақәа 7;

Аҟәа. Рашәарамза 8, 2023. Апсныпресс. Иахьа, рашәарамза 8 рзы, Шәачантәи Гаграҟа иааит раԥхьатәи апассаџьырцәа зҭаз иццакны ицо жәларбжьаратәи афымцадәыӷба «Ласточка».

Гагра авокзал хада аҿы адәыӷба аԥыларазы аныҳәатә ҭагылазаашьа аԥҵан. Иааз апассаџьырцәа рзы кавказтәи акәашарақәа рынагӡарала аконцерт еиҿкаан.

Адәыӷба иаԥылеит аеконоика аминистр лхаҭыԥуаҩ Ҭеимураз Миквабиеи Аҳәынҭқарратә Еилакы «Аԥсны Аихмҩа» адиректор хада Октаи Хазириши.

Афымцадәыӷба есымша, абарҭ апунктқәа рҿы аамҭала аанкыларала ареисқәа нанагӡалоит: Мацеста, Хәасҭа, Адлер, Имеретиатәи Акурорт, аплатформа «Гагрыԥшь»,  аплатформа «Абааҭа».

Есыҽны апассаџьырцәа рыиагара иалагаанӡа аԥышәатә реисқәа мҩаԥган, аспециалистцәа разгәаҭарақәа зегьы ҳасаб рызун.

Афымцадәыӷба «Ласточка» Аԥсныҟа ареисқәа рынагӡара алыршахеит Аҳәынҭқарратә Еилакы «Аԥснытәи Аихамҩеи» Зҭакԥхықәра Ҳәаақәҵоу Аилазаара "Урыстәылатәи аихамҩақәеи» ирыбжьарҵаз аиқәышаҳаҭрақәа ирыбзоураны.  

Аҟәа. Рашәарамза 8, 2023 шықәса. Аԥсныпресс. Аԥсны Жәлар Реизара-Апарламент адепутатцәа «Аԥсны Аҳәынҭқарра иалҵны ацареи Аԥсны Аҳәынҭқарра аҭалареи рзы» азакәани «Аҳәаанырцәтәи атәылауаа Аԥсны Аҳәынҭқарраҿы рыҟазааразы азин шьаҭа азы» азакәани аиҭакрақәа ралагаларазы аӡбамҭа рыдыркылеит.