Аҟәа. Абҵарамза 10, 2023 шықәса. Аԥсныпресс. Аԥсны агәабзиарахьчара аминистр Едуард Быҭәба Ареспубликатә иҷыдоу апсихиатриатә хәышәтәырҭа аусура, ачымазцәа иахьыҟоу аҭыԥ аҭагылазаашьақәеи иарбоу амедусбарҭа аҭагылазаашьеи ргәаҭара мҩаԥигеит, ҳәа адырра ҟанаҵоит агәабзиарахьчара Аминистрра апресс-маҵзура.
Ахәышәтәырҭа аҳақьым хада Ирина Ануа аминистр апациентцәа хәшәылеи фатәи-жәтәи рыла иахәҭоу аиқәыршәара рымоуп ҳәа адырра илҭеит. Аха ахәышәтәырҭа акыр аамҭа ҵуеит асанитартә еибаркыра аганахьала ауадаҩрақәа амоуижьҭеит. Урҭ шьаҭанкыла реиҭашьақәыргыларазы иазоужьҭуп 3 млн. 743 нызықь мааҭ.
Ирина Ануа лажәақәа рыла, ашәырақәа иахьрыцәцо иахҟьаны, уадақәак акыр ааха аиуит.
Аусурақәа рымҩаԥгаразы анардадкылаҩыс иқәгылоит аҳәынҭқарратә Еилакы «Аԥсныргылара». Урҭ аԥшь-еихагылак рҿы аӡымҩангара шәырақәа рыԥсахраны иҟоуп, аҽыкәабарҭақәа рҿы акафель шьҭарҵоит, асантехниа зегьы рыԥсахуеит, арлашара дырҿыцуеит.
«Ҳара шьаҭанкыла ари апроблема уаҳа ҳазыхнымҳәо иҳаӡбароуп. Апациентцәеи аперсонали ирзыманшәалоу аҭагылазаашьақәа аԥаҳҵароуп. Аремонт уажәоуп ианалага, сара хаҭала уи амҩаԥысшьа шцо гәасҭалоит» , - ҳәа иазгәеиҭеит Едуард Быҭәба.
