«Иахьа ҳара аԥсуа милициа аԥҵара 102-шықәса ахыҵра азгәаҳҭоит. Аԥснытәи амилициа есымша азакәани азинеиҿкаареи рыхьчараҿы игылан.  Иахьагьы шәара азинеиҿкаареи атәыла ауааԥсыра ршәарҭадареи реиқәыршәара азы аус жәуеит. Шәара зегьы шәнапы иануп ҳажәлари ҳаԥсадгьыли ԥхьаҟатәи аԥеиԥш. Ари имариам аамҭазы Шәара гәык-ԥсыкала, ламысцқьала, хамеигӡарак ҟамҵакәа шәзанааҭтә уалԥшьа анагӡара шәаҿуп», - ҳәа иҳәеит атәыла аҩныҵҟатәи аусқәа рминистр Роберт Киут.

Аминистр амилициа аусзуҩцәа зегьы ирзеиӷьаишьеит агәабзиара, аманшәалара, анаҩстәи русура аҿы ақәҿиарақәа.

Анаҩс имҩаԥысит  амилициа аусбарҭақәа абжьаратәи аиҳабыратәи анапхгараҭаратә еилазаара изаамҭанытәиу иҷыдоу ахьӡқәа ранашьара иазку аныҳәатә церемониа.

«Амилициа аполковник» ҳәа ахьӡ ранашьахеит аподполковникцәа Реналд Ҷолариа, Денис Аиба, Арсен Биџьев.

«Амилициа аподполковник» ҳәа ахьӡ ранашьахеит  амаиорцәа Ренат Аџьиеви Денис Гәырҵкаеи.

«Амилициа амаиор» ҳәа ахьӡ ранашьахеит  акаԥданцәа Даур Какаҷиа, Едуард Овчинников, Адамыр  Аргәын.

Иахьаҵәҟьа атәыла аҩныҵҟатәи аусқәа Рминистрра аусзуҩцәа, аминистр, амилициа аинрал-маиор Роберт Киут дрыцны Аҟәа ақалақь Ахьӡ –Аԥша апарк аҿы иҟоу Аџьынџьтәылатәи еибашьра аҿы иҭахаз аибашьцәа Рмемориал амҵан ашәҭ шьыҵәрақәа шьҭарҵеит.