Аҟәа. Жьҭаарамза 27, 2022 шықәса. Аԥсныпресс. Ашәахтәқәеи аизгақәеи рзы Аминистрра Аҟәа ақалақь ала Аинспециа анапхгаҩыс дҟаҵоуп Иракли Харчлаа.  

Уаанӡа ари амаҵураҭыԥ аҿы иҟаз Авҭандил Џьынџьолиа хаҭала иалеиҵаз арзаҳал ала имаҵураҭыԥ аҟынтәи ихы дақәиҭтәуп.

ахысырҭатә ҭыԥ "Ҵабал" аҟны Атәылахьчара аминистрра адҵа-штабтә мобилизациатә зыҟаҵарақәа дырҭааит.

Аԥсны Аҳәынҭқарра Ахада Арбџьар мчқәа рыдҵаҟаҵаҩ Аслан Бжьаниа ахысырҭатә ҭыԥ "Ҵабал" аҟны Атәылахьчара Аминистрра адҵа-штабтә мобилизациатә зыҟаҵарақәа рҳәаақәа ирҭагӡаны аибашьратә хысрақәа рымҩаԥгашьа дахәаԥшуан  аԥшьаша, жьҭаарамза 27 рзы.

Аибашьратә хысрақәа рхы рыладырхәит Тҟәарчалтәи актәи аполк арезервистцәа, Аҟәатәи иреиҳаӡоу азеиԥшархәҭатә дҵаҟаҵаратә ҵараиурҭа акурсантцәа, артиллериатә архәҭақәа, арра-ҳаиртә мчқәа, атәыла амчратә усбарҭақәа рхаҭарнакцәа. Азыҟаҵарақәа раан аус рыдулан азеиԥш усмҩаԥгатәқәа, ихәыцу аӷа ижәылара аҭак иҭаразы.

Аҟәа. Жьҭаарамза 27, 2022 шықәса. Аԥсныпресс. Имҩаԥысит Аԥсны Жәлар Реизара – Апарламент Аиҳабы Лаша Ашәба хантәаҩра ззиуаз изаамҭанытәиу ҭагалантәи асессиа аилатәара. 

Ирыхәаԥшит, аҵыхәтәантәи аԥхьараан ирыдыркылеит Аԥсны Аҳәынҭқарра азакәанқәа:

«2002 шықәсазтәи Ареспубликатә биуџьет азы» Аԥсны Аҳәынҭқарра Азакәан аԥсахрақәа ралагаларазы».

Ажәахәҟаҵаҩ- Абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы Беслан Ҳалуашь

«Аԥсны Жәлар Реизара – Апарламент  адепутатцәа ралхразы» Аԥсны Аҳәынҭқарра Аконституциатә закәан аԥсахрақәа ралагаларазы».

Ажәахәҟаҵаҩ - Аҳәынҭқарра-зинтә политиказы аилак ахантәаҩы Дауҭ Хәытаба.

«Аҳәынҭқарратә ҳазазы «Аԥсны Аҳәынҭқарра Азакәан аԥсахрақәа ралагаларазы».

«Аԥсны Аҳәынҭқарра асоциалтә фондқәа рышҟа «Аԥсны Аҳәынҭқарра ибиуџьеттәым асоциалтә фондқәа рахь аԥгаԥсатә лагаламҭақәеи ашәатәқәеи рзы» «Аԥсны Аҳәынҭқарра Азакәан аԥсахрақәа ралагаларазы».

«Анхарҭатә ҭыԥқәа қьырала ирызҭо хазхаҭалатәи анаплакҩцәа ирмарианы аҳәынҭқарратә шәҟәы рҭагаларазы «Зымч зцәыӡыз Аԥсны Аҳәынҭқарра Азакәан ҳәа азхаҵаразы».

Ажәахәҟаҵаҩ – Аԥсны Ахада Иадминистрациа аҳәынҭқарра-зинтә усбарҭа аиҳабы Н. Р. Ломиа.                                                           

Ирыхәаԥшит, актәи аԥхьараан ирыдыркылеит азакәанапроектқәа:

«Административтә зинеилагарақәа рзы Аҧсны Аҳәынҭқарра Азакәанеидкыла аԥсахрақәа ралагаларазы».

«Аӡыргаразы» Аԥсны Аҳәынҭқарра Азакәан аԥсахрақәа ралагаразы»

«Аԥсны Аҳәынҭқарра Атәылауаҩратә Закәанеидкыла аҩбатәи ахәҭа аԥсахрақәа ралагаларазы».

Ажәахәҟаҵаҩ – Абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы ихаҭыԥуаҩ Дмитри Маршьан.

«Аҧсны Аҳәынҭқарра азакәанԥҵаратә актқәак аԥсахрақәа ралагаларазы».

Аҟәа. Жьҭаарамза 26, 2022 шықәса. Аԥсныпресс. Аҳәаахьчаратә пункт «Адлер» аужьҭратә лшара аизырҳара хықәкыс иҟаҵаны, Урыстәыла атранспорт Аминистрреи Афедералтә ҳәынҭқарратә аказентә усбарҭеи «Росгранстрой» Урыстәылаҟа ииасуа автомашьынақәа рзы иназыцҵоу ацәаҳәақәа еиқәдыршәеит. Абри атәы аанацҳауеит Урыстәылатәи Афедерациа атуризм Аминистрра.

Ацәаҳәақәа аҳәынҭқарратә гәаҭаратә усбарҭақәа русуреи аҳәаа аҿы агәаҭаратә процедурақәа рымҩаԥгареи рзы иахәҭоу аиқәыршәагақәа зегьы рыла еибыҭоуп. Уи зегьы аҳәаахьчаратә ыиасырҭа «Адлер» аужьҭратә лшара уахыки-ҽнаки рыла зқьы машьына рҟынӡа аизырҳара алнаршоит.

Аҟәа. Жьҭаарамза 26, 2022 шықәса. Аԥсныпресс. Аԥсны аԥыза-министр Алеқсандр Анқәаб Аԥсны анаукақәа ракадемиа иатәу аексперименталтә паталогиеи атерапиеи рзы Аҟәатәи аҭҵаара-дырратә Институт анапхгараҭареи аколлективи Аинститут 95-шықәса ахыҵра аиубилеи рыдиныҳәалеит.

Адныҳәалараҿы, ахәҭакахьала иазгәаҭоуп:

«Ҳаҭыр зқәу аҩызцәа, иԥхьагылоу аинститут 95-шықәса ахыҵра инамаданы адныҳәаларақәа шәыдышәкыл!

Иналукааша асовет ҵарауаа Николаи Семашко, Илиа Иванов, Иаков Тоболкин раԥшьгаралеи хаҭала рылахәхареи рыла нанҳәамза 27, 1927 шықәса рзы иаԥҵаз аексперименталтә паталогиеи атерапиеи рзы Аҟәатәи аҭҵаара-дырратә Институт ахьӡ-аԥша ахара инаҩхьеит. Уи жәларбжьаратәи аҩаӡара змоу априматологиа аҵара ацентрны иҟалеит, акьыба чымазарақәа рҿагылара азы акыр аҵак ду змоу базаны ишьақәгалеит. Акыр аамҭа иалагӡаны ари аинститут напхгара аиҭон академик Борис Лапин.

Аҟәа. Жьҭаарамза 26, 2022 шықәса. Аԥсныпресс. Апарламент аҿы имҩаԥысит Рашида Аибеи Сергеи Филатови реиԥылара.

Асоциалтә политикеи, аџьеи, агәабзиарахьчареи, адемографиеи, аибашьра аветеранцәеи аинвалидцәеи русқәа рзы аилак ахантәаҩы Рашида Аиба Азанааҭеидгылақәа Жәларбжьаратәи Реидгыла «АКРА» ахантәаҩы Сергеем Филатов дызлахәыз аиԥылара мҩаԥылгеит.

Аҟәа. Жьҭаарамза 25, 2022 шықәса. Аԥсныпресс.  90-шықәса дшырҭагылаз иԥсҭазаара далҵит аҵарауаҩ-аҭоурыхдырҩы, аԥсуа жәлар рмилаҭ-хақәиҭратә қәԥара аветеран Ермолаи Аџьынџьал.  

Ермолаи Кесыгә-иԥа Аџьынџьал диит рашәарамза 28, 1933 шықәса рзы Очамчыра араион Ԥақәашь ақыҭан.

Ԥақәашьтәи абжьаратәи ашкол даналга ашьҭахь, арратә уалԥшьа нагӡаны даныхынҳә, 1957 шықәсазы дҭалеит А. М. Горки ихьӡ зху Ставропольтәи аҳәынҭқарратә арҵаҩратә институт аԥсуа ҟәша, дагьалгеит уи 1961 шықәсазы.

Адәаӡаҿы активла аусуразы акомсомол Анагӡаратә Комитет Хадеи Казахсҭан Иреиҳаӡоу Асовети раҳаҭыртә шәҟәқәа ианашьан.

Иреиҳаӡоу аҵараиурҭа даналга ашьҭахь Ермолаи Аџьынџьал аус иуан Д. И. Гәлиа ихьӡ зху аԥсуаҭҵааратә Институт аҿы. Уи напхгаҩыс диман аҟазарадырра адоктор  Лео  Шервашиӡе.

Еиуеиԥшым аамҭақәа рзы Ермолаи Аџьынџьал аус иуан Ҭҟәарчал ақалақь аҿы апионерцәеи ашколхәыҷқәеи Рыҩны адиректорс, Очамчыратәи араионтә газеҭ «Акоммунизм ахь» алитературатә усзуҩыс, Ҭҟәарчалтәи ашахта № 2 адгьылаҵантәи ашьхаусзуҩыс.

Аҵарауаҩ инысымҩа аҿы акыр аҭыԥ ааннакылоит Аԥснытәи аҳәынҭқарратә музеи. 1968 шықәса инаркны иара араҟа, абжьаратәи ашәышықәсақәа рҭоурых аҟәша аиҳабы имаҵураҭыԥгьы уахь иналаҵаны, еиуеиԥшым амаҵураҭыԥқәа рҿы анаука-ҭҵааратә усура мҩаԥигон. Аҵарауаҩ илагала дууп аҭыԥантәи амузеитә усура аҿиара аҿы.

Аҟәа. Жьҭаарамза 25, 2022 шықәса. Аԥсныпресс.  Жьҭаарамза 23, 2022 шықәса рзы аҳазылхратә Ԥыԥшырҭа «Ԥсоу» аконтрабандеи аҳазылхратә еилагарақәа рҿагылара аҟәша аусзуҩцәа Пицунда ақалақь аҿы аоператив-профилактикатә усмҩаԥгатәқәа рымҩаԥгараан афатәҭирҭа адқьан гәарҭеит.  

Аԥсны аҳәынҭқарратә ҳазылхратә Еилакы аофициалтә саит иҟанаҵо адыррақәа рыла, агәаҭара аан иԥшаан, анаҩс ирылхын 38 цыра рҟынӡа иҟоу Қырҭтәыла абираҟи ахсаалеи рыла ишьақәгылаз ақырҭуа символика зныз, аконсерв зҭаз абанкақәа.  Иарбоу аалыҵ уаанӡа иҟоу аҳазылхратә закәанԥҵара аилагарала Аԥсны иааган.

Аҟәа.  Жьҭаарамза 24, 2022 шықәса. Аԥсныпресс. С.Ҷанба ихьӡ зху Аԥснытәи аҳәынҭқарратә драматә театр аԥсуа-дыгатә театрқәа VII Жәларбжьаратәи афестиваль «Кавказский меловой круг» ахы аланархәуеит. Афестиваль мҩаԥысуеит жьҭаарамза 24 -29 Маиҟәаԥ ақалақь аҿы.

Афестиваль «Кавказский меловой круг» — ари идуу арегионбжьаратәи афорум ауп. Уи аидкыларатә арҿиаратә ҟазшьа аҵоуп. Афестиваль амҩаԥгара арегионқәеи атәыла-алахәылацәа рзанааҭтә театралтә ҟазара арбеиара, амилаҭтә бызшәақәа, акультуратә традициақәа реиқәырхара иацхраауеит.

Афестиваль аиҿкаара рхахьы иргеит Урыстәылатәи Афедерациеи Адыгеиеи ркультура аминистррақәа, Ареспублика Адыгеиа атеатралтә усзуҩцәа Реидгыла.

Афестиваль рхы аладырхәуеит:

• И.С. Цеи ихьӡ зху Ареспублика Адыгеиа Амиалаҭтә театр.
• С. Ҷанба ихьӡ зху Аԥснытәи аҳәынҭқарратә драматә театр (ақ. Аҟәа).

Аҟәа. Жьҭаарамза 25, 2022 шықәса. Аԥсныпресс. Аԥсны аԥыза-министр Алеқсандр Анқәаб Аԥсны астатистика азы Аҳәынҭқарратә еилакы анапхгараҭара алархәны аусуратә еиԥылара мҩаԥигеит, аминистрцәа Реилазаара апресс-маҵзура.

Кама Гогиа жьҭаарамза 19 рзы Москваҟа лусуратә ҭаара алҵшәақәа ртәы далацәажәеит, иара убас знапаҵыҩра мҩаԥысыз 2022-2024 шш. Аԥсны астатистика азы аҳәынҭқарратә Еилаки Урыстәыла аҳәынҭқарратә статистика азы афедералтә Маҵзуреи рыла еицымҩаԥгахо аусмҩаԥгатәқәа Рыплан атәы еиҭалҳәеит.  

Урыстәылатәи рколлегацәа рыҽцәажәарақәа ахәшьара ҳарак аҭо, Аԥсны астатистика азы аҳәынҭқаррратә Еилакы ахантәаҩы иазԥхьагәаҭоу аусмҩаԥгатәқәа инарҭбааны дрылацәажәеит.