Аҟәа. Жьҭаарамза 11, 2022 шықәса. Аԥсныпресс. Иахьа Аԥсны Арбџьармчқәа раԥҵара амш 30 шықәса ахыҵит.

Шьыжьы инаркны атәылахьчара аминистр Владимир Ануа инапхгарала Аԥсны атәылахьчара Аминистрра аруаа  Аҟәа, Ахьӡ –аԥша апарк аҿы игылоу, 1992 – 1993 шш. Аԥсны жәлар рџьынџьтәылатәи еибашьра аҿы иҭахаз афырхацәа рбаҟа амҵан ашәҭ шьыҵәрақәа шьҭарҵеит.

Аҟәа. Жьҭаарамза 10, 2022 шықәса. Аԥсныпресс. Ақәоурақәеи Егры аӡиаси уи аӡымахәқәеи рҿы аӡы аҩаӡара акыр ашьҭыҵреи инарымаданы, Гал араион Ахадара ауааԥсыра аӡиас азааигәара имнеирц, агәҽанызаара аадырԥшларц азы алаҳәара ҟанаҵеит.

Гал араион аҳәаа иаԥну аиланхарҭатә ҭыԥқәа рҿы Егры аӡиас азааигәара иҟоу ахархәаратә аарыхырҭақәеи арахәҳәырҭақәеи ақәаарыхырҭақәеи ахьырацәоу инамаданы, аӡхыҵра  иахҟьаны адгьылҳәазареи аҿыбгареи ҟалар алшоит. Уи  аҭыԥантәи ауааԥсыреи арахәи  рзы хымԥада ашәарҭара ацуп.

Аҟәа. Жьҭаарамза 7, 2022 шықәса. Аԥсныпресс. Агәабзиарахьчара аминистр Едуард Быҭәба Ареспубликатә хәышәтәырҭа аусура гәеиҭеит.

Аҵыхәтәантәи амызқәа ирылагӡаны ари амедицинатә усбарҭа аҿы агәабзиарахьчара Аминистрра иҟанаҵаз ацхыраара иабзоураны, иара убас ахатәы мчқәеи рыла имаҷымкәа аиҭашьақәыргыларатә усурақә мҩаԥган, иҿыцу аиқәыршәагақәа аахәан, аштат аиҵатәра, уҳәа алыршахеит.

Аҟәа. Жьҭаарамза 7, 2022 шықәса. Аԥсныпресс.  Баҭал Кациа Аԥсны агәабзиарахьчара Аминистрра ахәышәтәра-профилактикатә Усбарҭа анапхгаҩыс дҟаҵоуп.  

Агәабзиарахьчара аминистр Едуард Быҭәба аколлектив ахәышәтәра-профилактикатә Усбарҭа аколлектив  анапхгаҩы ҿыц  Баҭал Реваз-иԥа Кациа дыдирдырит. 

«Шәара агәабзиарахьчара асистема аҿы аусуратә ԥышәа ду шәымоуп, сара агәра ганы сыҟоуп иҿыцу амаҵураҭыԥ аҿы Шәара Аминистрра аусура аҿы ацхыраара шашәҭо»,- ҳәа иазгәеиҭеит Едуард Быҭәба.

Аҟәа. Жьҭаарамза 7,  2022 шықәса. Аԥсныпресс.  Аҳәынҭқарра Ахада Аслан Бжьаниа Урыстәылатәи Афедерациа Ахада Владимир Путин 70- шықәса ихыҵра идиныҳәалеит.

Адныҳәалара атекст иаҳәоит: 

Ҳаҭыр зқәу Владимир Владимир-иԥа! Аԥсны жәлар рыхьӡала, хаҭала сара сҟынтә ишәыдысныҳәалоит шәира Амш. Гәык-ԥсыкала ишәзеиӷьасшьоит агәабзиареи аизҳазыӷьареи ахирреи! 

Ари аҭагылазаашьа бзиа схы иархәаны, иазгәасҭар сҭахуп Урыстәылатәи Афедерациа амилаҭтә интересқәа рыхьара аус аҿы Шәара иаашәырԥшуа ахьаҳәхьачарада, аполитикатә ахарахәыцра,  иԥышәоу, иуадаҩу аӡбамҭақәа рыдкыларала урыстәылатәи ажәлар рыхьчара, иҭышәынтәалоу атәыла аҿиара алыршахоит. Еилаҵәоу, милаҭрацәала еилоу Урыстәыла ажәлар Шәара шәнапхгарала аглобалтә қәыӷәӷәарақәеи ашәарҭарақәеи рҿагылара рылшоит.

Аҟәа. Жьҭаарамза 7, 2022 шықәса. Аԥсныпресс /Алеқсеи Шамба/.  Иахьа амультимедиатә пресс-центр Sputnik Аԥсны аҿы Жәларбжьаратәи аинформациатә Агентра «Урыстәыла иахьа» анагӡратә директор Кирилл Вышински ареспублика амассатә информациатә хархәагақәа русзуҩцәа рзы амастер-класс мҩаԥигеит. Амастер-класс атема: «Ажәабжь ҿыц арепортаж даара аинтерес аҵаны иҟаларц азы иҟаҵатәузеи. Афырхаҵа дызлаху асиужет».

Еицырдыруа ажурналист ҳаамҭазтәи ажәабжьҿыцтәи ажурналистика  аҿы акырӡа аҵанакуеит излауа ала ирццакны адырраҭара аҟаҵара, аха зегьы раԥхьа уи аҟаҵара есымша изалыршахом ҳәа инаҵшьны иазгәеиҭеит. Ус анакәха зегьы иреиӷьны адырраҭара хымԥадатәиуп, даҽакала иуҳәозар, зегьы еиҭарҳәахьо ажәабжь зегьы раасҭа аинтерес аҵаны азнагара алыршатәуп.

Кирилл Вышински иажәақәа рыла, аинформациатә репортаж акырӡа аинтерес аҵалоит уи зхатәы ҭоурых еиҭазҳәо афырхаҵа далагалазар, избан акәзар, ауаа реиҳараҩык рзы зегьы раасҭа аинтерес аҵоуп, ус иуҳәар алшозар, «ацаԥха ҭаҵарҭа ала» егьырҭ рышьклаԥшра.

Аҟәа. Жьҭаарамза 6, 2022 шықәса. Аԥсныпресс. Аманда Касланӡиа/. Гагра араион Қырҭтәыла аҳәынҭсовет архәҭақәа рҟынтәи ахақәиҭтәра амш 30-шықәса ахыҵра инамаданы, Гагра ақалақь аҿы имҩаԥысит  1992–1993 шш. Аԥсны жәлар рџьынџьтәылатәи еибашьра аҿы иҭахаз рбаҟа амҵан ашәҭ шьыҵәрақәа рышьҭаҵара иазку ацеремониа.  

Иҭахаз афырхацәа ргәаладыршәарц арахь иааит Аҳәынҭқарра Ахада Аслан Бжьаниа, Ахада Ихаҭыԥуаҩ Бадра Гәынба, Апарламент Аиҳабы Лаша Ашәба, атәыла Аԥыза-министр Алеқсандр Анқәаб, Аҳәынҭқарра Ахада Иусбарҭа Анапхгаҩы Џьансыхә Нанба, ашәарҭадара Ахеилак Амаӡаныҟәгаҩ Сергеи Шамба, Гагра араион ахада Иури Ҳагәышь, Апарламент адепутатцәа, атәыла Анапхгара алахәылацәа, Аԥсны иҟоу Урыстәыла Ацҳаражәҳәаҩ Михаил Шургалин, аибашьра аветеранцәа, ауаажәларра рхаҭарнакцәа.

Аҟәа. Жьҭаарамза 6, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны Аџьынџьтәылатә еибашьраҟны Гагра  ахақәиҭтәраан иҭахаз аибашьцәа рбаҟа амҵан ашәҭшьыҵәрақәа рышьҭаҵара иазкыз аусмҩаԥгатә далахәын.

Иҭахаз ргәаладыршәарц уахь инеит Ахада Ихаҭыԥуаҩ Бадра Гәынба, аԥыза-министр Алеқсандр Анқәаб,  Аԥсны Жәлар Реизара - Апарламент Аиҳабы Лаша Ашәба, Ахада Иубарҭа Анапхгаҩы Џьансыхә Нанба, Иреиҳаӡоу аӡбарҭа Ахантәаҩы Саида Быҭәба, Аԥсны Аҳәынҭқарраҟны иҟоу Урыстәылатәи Афедерациа Ацҳаражәҳәаҩ Михаил Шургалин,

Аҟәа. Жьҭаарамза 6, 2022 шықәса. Аԥсныпресс. Аԥсны Жәлар Реизара-Апарламент Аиҳабы Лаша Ашәба Гагра ақалақь ахы иақәиҭуижьҭеи 30 шықәса аҵра инамаданы ҳауаажәлар дрыдныҳәалеит.

Адныҳәалараҟны иҳәоуп:

«Акыр иаԥсоу Гаграа, Гагра арион иқәынхо ҳауаажәлар зегьы! Аԥсны Жәлар Реизара-Апарламент ахьӡала ишәыдысныҳәалоит Гагреи Гагра араиони рхы иақәиҭуижьҭеи 30 шықәса аҵра арыцхә.

1992 шықәса жьҭаарамза 2 инаркны 6-нӡа имҩаԥсыуаз Гагратәи операциа ашьҭахь Гагра араион ахақәиҭтәра хыркәшан.

Жьҭаарамза 6 рзы, ашьыжь ҳаԥсадгьыл ахьчаҩцәа аҩадакавказтәи хатәгәаԥхаралатәи аибашьцәа рываргыланы имҩаԥыргаз аоперациа иалҵшәахеит Ԥсоу аӡиас иаԥну аҳәааҿы Аԥсны Аҳәынҭқарра абираҟ ахаргылара.

Аҟәа. Жьҭаарамза 6, 2022 шықәса. Аԥсныпресс. Аԥсны адәныҟатәи аусқәа Рминистрра аҿы имҩаԥысит аминистр  ихаҭыԥуаҩ  Одиссеи Бигәааи Урыстәыла аԥшааратә отриадқәа Рхеидкыла ахаҭарнакцәеи реиԥылара.

Аиԥылара далахәын Алада Новгород иҟоу Аԥсны Аҳаҭыртә консул Владимир Литвинчук.

Аиԥылара иазҵаара хаданы иҟан Аџьынџьтәылатә еибашьра Ду аан Аԥсны аҵакыраҿы иҭахаз асовет еибашьцәа ргәалашәара анаӡаӡатәразы аиҿкаара аусура.

Аԥсны Атәылахьчара аминистрра, Адәныҟатәи аусқәа рминистрра, Россотрудничество рақәшаҳаҭрала иазыԥхьагәаҭоуп хара имгакәа Аџьынџьтәылатә еибашьра Ду аан Аԥсны аҵакыраҿы иҭахаз асовет еибашьцәа ргәалашәара анаӡаӡатәразы ауснагӡатәқәа рымҩаԥгара.