Аҟәа. Жьҭаарамза 11, 2022 шықәса. Аԥсныпресс. Аԥсны Аҳәынҭқарра Арбџьармчқәа аԥҵоижьҭеи 30-шықәса аҵра инамаданы имҩаԥысыз аныҳәатә еилатәараҿы Аҳәынҭқарра Ахада Аслан Бжьаниа изаамҭанытәиу арратә хьыӡқәа ранеишьеит атәылахьчара Аминистрра аусзуҩцәа гәыԥҩык.

Аҳәынҭқарра Ахада иҭижьыз Аусԥҟа инақәыршәаны, изаамҭанытәиу арратә хьӡы «аполковник» ианашьоуп аподполковник атәылахьчара аминистр актәи ихаҭыԥуаҩ, арратә морал-психологиатә зыҟаҵара аусбарҭа анапхгаҩы – Џьоџьуа Роланд Владимир-иԥа.

Аҟәа. Жьҭаарамза 11, 2022 шықәса. Аԥсныпресс. Аԥсны аԥыза-министр Алеқсандр Анқәаб иахьа дидикылеит змаҵуратә уалԥшьа анагӡара хзыркәшаз Натан Реиес имыцхәрас иҟарҵаз Аԥсны иҟоу Жәларбжьаратәи Аџьар Ҟаԥшь Акомитет Амиссиа ахада ҿыц  Родриго де Резенде.

Аԥсны иҟоу Жәларбжьаратәи Аџьар Ҟаԥшь Амиссиа ԥыхьатәи ахада   аԥыза-министр иҭабуп ҳәа еиҳәеит «атәыла анапхгара Жәларбжьаратәи Аџьар Ҟаԥшь Амиссиа есымша ианаҭоз ацхыраареи адгылареи рзы», ҳәа адырра ҟанаҵоит Аԥсны аминистрцәа Реилазаара аофициалтә саит.  

Аҟәа. Жьҭаарамза 8, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниа Урыстәылатәи Афедерациа Ашәарҭадара ахеилак Амаӡаныҟәгаҩ ихаҭыԥуаҩ Рашид Нургалиев иира Амш инамаданы дидныҳәалеит.

Адныҳәаларатә цҳамҭаҟны, ҷыдала, иҳәоуп:

«Ҳаҭыр зқәу Рашид Гумар-иԥа! 

 Шәара шәыԥсҭазаара аофицер гәымшәа изы иҿырԥшыганы иҟоуп. Еиуеиԥшым аҳәынҭқарратә маҵзурақәа рыҟны Шәара ҭакԥхықәра дула шәрызнеиуан шәнапы ианыз аҳасабтәқәа, есқьынгьы алҵшәа дуқәа раарԥшра шәылшон. Шәара шәҳәынҭқарра аинтересқәа рыхьчара шәшазыҟоу, шәыпрофессионализм, азҵаарақәа рыӡбараҟны хьаҳәа-ԥаҳәарада аус шәазнеишьа хамеигӡарада Аԥсадгьыл амаҵзуразы иҿырԥшыга бзиоуп.

Аҟәа. Жьҭаарамза 10, 2022 шықәса. Аԥсныпресс.  Аԥсны аҳәынҭқарратә хьчара Амаҵзура 9-тәи аҟәша аиҳабы  Руслан Чепи-иԥа аусеилыргара амҩаԥгара аамҭа иалагӡаны имаҵураҭыԥ аҟынтәи ихы дақәиҭтәуп. Абри азы адырра ҟанаҵоит Аԥсны аҳәынҭқарратә хьчара Амаҵзура апресс-маҵзура.

Аҟәа.  Жьҭаарамза 11,  2022 шықәса. Аԥсныпресс. Аҳәынҭқарра Ахада Аслан Бжьаниа ианашьоуп  «Аԥсны Аҳәынҭқарра Атәылахьчара аминистрра 30 шықәса ахыҵра» иазку амедаль.

Аԥсны атәылахьчара аминистрра аԥҵоижьҭеи 30 шықәса аҵра инамаданы, атәылахьчара аминистр Владимир Ануа Аслан Бжьаниа ианеишьеит «Аԥсны Аҳәынҭқарра Атәылахьчара аминистрра 30 шықәса ахыҵра» иазку амедаль.

Аҟәа.  Жьҭаарамза 11, 2022 шықәса. Аԥсныпресс. Аԥсны аҩныҵҟатәи аусқәа Рминистрра аофициалтә саит аҿы икьыԥхьхеит 1990 шықәса инаркны 2022 шықәса жәымз ирылагӡаны иҟалаз амҩатә машәырқәа рыстатистика адиаграмма. Аинформациа ыҟаӡам мацара 1992 – 1993 шш. рзы. Убас, 1990 шықәса рзы  428 амҩатә машәыр хҭыс ҟалеит, урҭ рҿы иҭахеит  156-ҩык, 451-ҩык  еиуеиԥшым ахәрақәа роуит.  

Аибашьрашьҭахьтәи Аԥсны зегьы реиҳа амҩатә машәыр ҟалеит 2015 шықәсазы – 220 хҭыс.

Иара убри ашықәсан 327- ҩык еиуеиԥшым ахәрақәа роуит.

Аиҳарак авариақәа рҿы иҭахеит 2016 шықәса рзы – 80-ҩык.

Аҟәа. Жьҭаарамза 11, 2022 шықәса. Аԥсныпресс. Аҳәынҭқарра Ахада  жьҭаарамзазы иҟаз ақәыршыҩқәа ирхырҟьаны Очамчыра араион иаиуз аԥхасҭа инамаданы, араион ақыҭақәа дырҭааит

Аԥсны Аҳәынҭқарра Ахада Аслан Бжьаниа жьҭаарамзазы иҟаз ақәыршыҩқәа ирхырҟьаны Очамчыра араион иаиуз аԥхасҭа инамаданы, араион ақыҭақәа дырҭааит.

Аҳәынҭқарра Ахада ақыҭақәа Аӡҩыбжьа, Кындыӷ, Маркәыла, Очамчыра ақ. Дырҭааны ибеит. Уи ицын аԥыза-министр актәи ихаҭыԥуаҩ, ақыҭанхамҩа аминистр Беслан Џьопуа, аҷыдалкаатә ҭагылазаашьақәа рзы аминистр Лев Кәыҵниа, Очамчыра араион  Администрациа ахада Беслан Бигәаа, ШЬАУ аиҳабы Ҭемыр Агрба.

Арҭ аиланхарҭа ҭыԥқәа рыҟны аҩнқәа аӡы рыҵалеит, амҩақәа аӡәӡәеит. Аԥсабаратә рыцҳара иахҟьаны ахатәы ҩнқәа акыр аԥхасҭа роуит.

Аҟәа. Жьҭаарамза 11, 2022 шықәса. Аԥсныпресс. Аԥыза-министр Алеқсандр Анқәаб Арбџьармчқәа рнапхгараҭареи хаҭалатәи аилазаареи риубилеи – Аԥсны Арбџьармчқәа аԥҵоижьҭеи 30 - шықәса аҵра рыдиныҳәалеит.

«Ҳаамҭазтәи аетап аҟны ари афлоти рҿаԥхьа– аҳәынҭқарра арратә потенциал арӷәӷәара, ҳаамҭа иақәшәо атәылахьчара амчқәа рышьақәгылара,  ззанааҭтә ҩаӡара ҳараку акадртә резерв аԥҵара, уҳәа ахыдҵа ҿыцқәа ықәгылоуп. Ҳәара аҭахума, аибашьра адәы иаӡрыжәхьоу, иҟарҵаз аҭоубеи руалԥшьеи ламысцқьала иназыгӡо Арбџьармчқәа, атәыла анапхгареи ажәлари рыцхыраарала арҭ ахыдҵақәа шьахәлаҵәҟьа рынагӡара рылшоит, - ҳәа иазгәаҭоуп адныҳәаларатә шәҟәы аҿы.

***   *** Аԥсны Аҳәынҭқарра Арбџьармчқәа ркомандаҟаҵаҩцәеи хаҭалатәи аилазаареи рахь.

Аԥсуа жәлар зегьи шәареи Аԥсны Арбџьармчқәа аԥҵоижьҭеи 30 - шықәса аҵра шәыдысныҳәалоит! 1992 шықәсазы, ақырҭуа мпыҭахалыҩцәа бџьаршьҭыхрала ҳаԥсадгьыл рақәлара иахҟьаны ҳажәлар арыцҳара ду ианҭагылаз аамҭазы, акыр зҵазкуа аусшәҟәқәа рыдкылара мҩаԥган – «Аԥсны Аҳәынҭқарра Атәылахьчара аԥҵаразы», «Аԥсны Аҳәынҭқарра Арбџьар Мчқәа р-Штаб хада аԥҵаразы», «Аԥсны Аҳәынҭқарра Арбџьар мчқәа рзы» Аԥсны Аҳәынҭқарра Иреиҳаӡоу Асовет Апрезидиум Ақәҵарақәа. 

Аҟәа. Жьҭаарамза 11, 2022 шықәса. Аԥсныпресс. Жьҭаарамза 11 - Аԥсны Аҳәынҭқарра Арбџьар мчқәа ирымшуп

Аԥсны Жәлар Реизара - Апарламент Аиҳабы Лаша Ашәба  АԥсныАҳәынҭқарра Арбџьар мчқәа рымш азы  Атәылахьчара аминистр Ануа В. И. ихьӡала адныҳәалара ишьҭит.

Адныҳәалараҟны иҳәоуп:

"Ҳаҭыр зқәу Атәылахьчара аминистрра аррамҵзурауаа, Аԥсны Аҳәынҭқарра Арбџьар Мчқәа рветеранцәа! 

Аԥсны Жәлар Реизара – Апарламент ахьӡала Аԥсны Аҳәынҭқарра Арбџьар Мчқәа  хаҭалатәи аилазаареи аветеранцәеи ирыдысныҳәалоит Аԥсны Аҳәынҭқарра Арбџьар Мчқәа рымш.

Ҳара ҳрызгәдууп Аԥсны Аҳәынҭқарра Арбџьар Мчқәа хьӡи-ԥшеи змоу рҭоурых адаҟьақәа. Ари аҭоурых аҟны аҭыԥ ҷыда ааникылоит Аԥсны Аҳәынҭқарра Иреиҳаӡоу Асовет Ахантәаҩы Владислав Арӡынба  – 30 шықәса раԥхьа, Аԥсны жәлар рзы илахьынҵаӡбаганы иҟалаз Аԥсны Аџьынџьтәылатә еибашьраан Атәылахьчара аминистрреи Аштаб хадеи раԥҵаразы Иреиҳаӡоу Асовет Апрезидиум Аусԥҟа знапы  аҵазҩыз.

Хашҭра рықәым, ҳгәалашәараҿы наунагӡа иаанхоит Аԥсуа ар аиҿкаареи ашьақәгылареи рус аҟны злагаламҭа дуу Владимир Аршба – Аԥсны Аҳәынҭқарра Атәылахьчара актәи аминистр, Султан Сосналиев – Аштаб хада аиҳабы, атәылахьчара аминистр актәи ихаҭыԥуаҩ.

Ҳаҭырла иаҳгәалаҳаршәоит уинахыстәи Аԥсны Аҳәынҭқарра атәылахьчара аминистрцәа зегьы. 

Аҟәа.  Жьҭаарамза 11, 2022 шықәса. Аԥсныпресс.  Аԥсны Аҳәынҭқарра Ахада Аслан Бжьаниа Аԥсны Аҳәынҭқарра Арбџьар мчқәа рымш азы адныҳәалара ҟаиҵеит.

Ҳаҭыр зқәу Аԥсны Аҳәынҭқарра Арбџьар Мчқәа аррамҵзурауаа, аветеранцәа, ишәыдысныҳәалоит Аԥсны Аҳәынҭқарра Арбџьар мчқәа аԥҵоижьҭеи 30 шықәса аҵра рымш.

Ҳара ҳажәлар атәылазы иуадаҩыз аамҭақәа раан – 1992-1993 шш. Аԥсны Аџьынџьтәылатә еибашьра анцоз ишьақәгылаз Арбџьар мчқәа ирызгәдууп.

1992 шықәса жьҭаарамза 11 рзы Аԥсны Аҳәынҭқарра Иреиҳаӡоу Асовет Ахантәаҩы, ҳажәлар рԥыза ду Владислав Григори-иԥа Арӡынба «Аԥсны Аҳәынҭқарра Атәылахьчара аԥҵаразы», «Аԥсны Аҳәынҭқарра Арбџьар Мчқәа р-Штаб хада аԥҵаразы», «Аԥсны Аҳәынҭқарра Арбџьар мчқәа рзы» Аԥсны Аҳәынҭқарра Иреиҳаӡоу Асовет Апрезидиум Ақәҵарақәа инапы рыҵаиҩит.