Асолдаҭ иԥсыбаҩ Новороссиск ақалақь ахь иргоит, уаҟа уи иаԥылоит Аԥснытәи аделегациа. Уажәраанӡа ари асолдаҭ хабарда ибжьаӡыз рхыԥхьаӡараҿы дыҟан.
«Ҳара 1942 шықәсазы ҳара зегьы иаҳзеиԥшу аԥсадгьыл ахьчараан иҭахаз аибашьҩы иԥсыбаҩи, уи данҭахоз ицыз ихатәы маҭәақәеи иԥсадгьыл ахь идәықәаҳҵоит. Аԥсны иалҵыз аибашьҩы иԥсыбаҩ иԥсадгьыл аҿы ҳаҭырла анышә иамардоит», – ҳәа адырра ҟаиҵеит Ленин ихьӡ зху араион Ахеилак ахантәаҩы Олег Водопианов.
Уаҵәы, абҵарамза 9 рзы, Аҟәа ақалақь аҿы Ризбеи Хьыбба иԥсыбаҩ анышә иамардоит. Ацеремониа рхы аладырхәуеит афырхаҵа иуацәеи иҭынхацәеи.
