Аҟәа. Мшаԥымза 14, 2023 шықәса. Аԥсныпресс. Аекономика Аминистрра Адҵа ала Џьынџьал Ҭемури Иван-иԥа Ареспубликатә Унитартә Наплакы «Амшынеиқәафымцамч» адиректор Хадас дҟаҵоуп. Ҭемыр Аџьынџьал 2007 шықәса раахыс Аҟәа ақалақь Ахадара Амуниципалтә Унитартә Наплакы  «Аҟәатәи афымцатә Станциа» адиректорс аус иуан, афымцамч аусхкы аҿы – 1996 шықәса инаркны. Абри азы адырра ҟанаҵоит Аԥсны аекономика Аминистрра апресс-маҵзура.

Рамин Зингишвили «Амшынеиқәафымцамч» адиректор Хада инапынҵақәа рынагӡара аҟынтәи ихы дақәиҭтәуп. Уи «Амшынеиқәафымцамч» адиректор Хада инапынҵақәа рынагӡара аҟынтәи ихақәиҭтәра азы изныкымкәа аҳәара ҟаиҵахьан, мшаԥымза, 2023 шықәсазы иҟаиҵаз аҳәарагьы уахь иналаҵаны. Ари аӡбамҭа Аӡфымцастанциа-2 Аихшарҭа қьырала аҭара азҵаара акала иадҳәаланы иҟам.  

Иҟоу афымцамч адефицит ҳасаб азуны, Аӡфымцастанциақәа - (1, 2, 3) Аихшарҭақәа реиҭашьақәыргылара хадара злоу зҵаараны иҟоуп.  

Аҟәа. Мшаԥымза 14, 2023 шықәса. Аԥсныпресс. Аҳәынҭқарра Ахада Аслан Бжьаниа Дамир Кәыҵниа изаамҭанытәиу акласстә чын ианашьаразы Аусԥҟа инапы аҵаиҩит.

Аусԥҟа атекст аҟны, ҷыдала, иҳәоуп:

«Ианашьазааит «аиустициа 3 акласс иаҵанакуа аҳәынҭқарратә абжьгаҩ» ҳәа изаамҭанытәиу акласстә чын Аԥсны Аҳәынҭқарра Апрокурор Хада  актәи ихаҭыԥуаҩ Кәыҵниа Дамир Геннади-иԥа».

Аҟәа. Мшаԥымза 14, 2023 шықәса. Аԥсныпресс. Аҳәынҭқарра Ахада Аслан Бжьаниа Адгәыр Агрба  изаамҭанытәиу акласстә чын ианашьаразы Аусԥҟа инапы аҵаиҩит.

Аусԥҟа атекст аҟны, ҷыдала, иҳәоуп:

«Ианашьазааит «Аиустициа 3 акласс иаҵанакуа аҳәынҭқарратә абжьгаҩ» ҳәа изаамҭанытәиу акласстә чын Аԥсны Аҳәынҭқарра Апрокурор Хада  Агрба Адгәыр Ныгәзар-иԥа».

Аҟәа. Мшаԥымза 14, 2023 шықәса. Аԥсныпресс. Аминистрцәа Реилазаара аамҭа кьаҿ иҭагӡоу анапхгаратә хықәкытә программа «2023 шықәсазы Аԥсны имаҷууи ибжьаратууи аусдкылара адгылара аҭара Апрограмма» шьақәнарӷәӷәеит.  

Иарбоу апрограмма инақәыршәаны, имаҷууи ибжьаратәууи аусдкылара асубиектқәа рекономикатә еффективра ашьҭыхра хықәкыс иҟаҵаны, аҳәынҭқарра аҟынтәи афинанстә цхыраара роулоит, ҳәа адырра ҟанаҵоит Аԥсны аекономика Аминистрра апресс-маҵзура.  

Апрограмма ала иалкаахоит аҳынҭқарратә финанстә цхыраара аҭара аҭагылазаашьақәа зегьы.

Аҟәа. Мшаԥымза 14, 2023 шықәса. Аԥсныпресс.  2023 шықәса хәажәкырамза 1, лаҵарамза 31 аҟынӡа Аԥсны еиҭамҩаԥысуеит атәанчаҩцәа  рышәҟәҭагалара. Уи азы Ақәҵара рыдыркылеит аҩаша, мшаԥымза 28 рзы имҩаԥысыз аминистрцәа Реилазаара аилатәара аҿы.  Асоциалтә еиқәыршәареи адемографиатә политикеи рминистр Руслан Аџьба аиҭашәҟәҭаҩра аихшьаалақәа рзы адырра ҟаиҵеит.  

Уи ишазгәеиҭаз ала, хәажәкырамза 1, 2023 шықәсазы ашәҟәҭагалара иахысыз атәанчаҩцәа рхыԥхьаӡара 49 573-ҩык рҟынӡа инаӡеит. Зынӡа мшаԥымза  13 аҟынӡа аиҭашәҟәҭара иахысит   30 889-ҩык.  

Аиҳарак атәанчаҩцәа Аҟәа ақалақь аҿы ауп иахьынхо.

«Аҟәа ақалақь аҿы инхоит 11 457-ҩык атәанчаҩцәа, урҭ рахьынтә иахьазы аиҭашәҟәҭаҩра иахысит 6 609, мамзаргьы даҽакала иуҳәозар 57,7%. Аҩбатәи аҭыԥ аҿы иҟоуп Гагра араион, араҟа иҟоуп 7 848-ҩык атәанчаҩцәа, урҭ рахьынтә аиҭашәҟәҭаҩра иахысит  5 628-ҩык, мамзаргьы даҽакала иуҳәозар 71,7%», - ҳәа иҳәеит иара.

Аҟәа. Мшаԥымза 14, 2023 шықәса. Аԥсныпресс.  Мшаԥымза 14 инаркны «2022-2025 шш. Аԥсны асоциал-економикатә ҿиара» азы аҳәынҭқарратә программа алахәхара азы Аԥсны атәылауаа рҟынтәи азыҳәамҭақәа рыдкылара иалагоит.  

Апрограмма Аԥсны инагӡахо аинвестициатә проектқәа аҳәынҭқарратә дгылара рыҭара азԥхьагәанаҭоит, ҳәа иаанацҳауеит Аԥсны аекономика Аминистрра асаит.  

Аҟәа. Мшаԥымза 14, 2023 шықәса. Аԥсныпресс. Аԥсны аҳәынҭқарратә ҳазылхратә Еилакы аҿы уаанӡа аҳазылхратә шәҟәҭагалара азы аспециалист иаттестат аиуразы азыҳәамҭақәа алазҵахьаз аброкертә еилазаарақәа рхаҭарнакцәа рзы аквалификациатә ԥышәара мҩаԥысит, ҳәа адырра ҟанаҵоит Аԥсны аҳәынҭқарратә ҳазылхратә Еилакы аофициалтә саит.  

Аквалификациатә ԥышәара х-етапкны ишьақәгылан — актәи аетап аҿы акандидатцәа ҿырҳәала аҳазылхратә деклорациа ахарҭәаара иадҳәалоу азҵаарақәа рҭак ҟарҵон, анаҩс  иҩны атестқәа иахысуан, аҵыхәтәаны акандидатцәа аидарамҩангаратә ҳазылхратә декларациа хадырҭәаауан.

Аҟәа. Мшаԥымза 11, 2023 шықәса. Аԥсныпресс. Аԥсны апрокуратура Хада ахаҭарнакцәа аҳәаанырцәтәи аҳәынҭқаррақәа рзинхьчаратә усбарҭақәа рхаҭарнакцәа рзы азанааҭтә дырра аҩаӡара ашьҭыхра апрограммақәа рыла аҽазыҟаҵарақәа ирхысит, ҳәа адырра ҟанаҵоит Аԥсны Аҳәынҭқарра апрокуратура Хада аофициалтә саит.

Ҳазҭоу ашықәс, хәажәкырамза 27 инаркны  31 аҟынӡа, Аусеилыргаратә усбарҭа анапхгаҩы ихаҭыԥуаҩ, Апрокуратура Хада аусеилыргаратә ҟәша аиҳабы Амҷба И.Ш. Урыстәылатәи Афедерациа Аусеилыргаратә комитет Санкт-Петербургтәи академиа аҿы апрограмма «Ацифратә валиутеи ацифратә финанстә активқәеи рхархәарала инагӡаз ацәгьоурақәа раарԥшреи реилыргареи» ала аҿазыҟаҵара дахысит.

Аҟәа. Мшаԥымза 8,  2023 шықәса. Аԥсныпресс. Мшаԥымза 8 рзы Аҟәа ақалақь аҿы аусура иалагеит астолтә ԥкьаҭмпыл азы аклубтә чемпионат I атур. Уи иалахәхоит  12 командак: «Аҟәа», «ААУ,» «Ҭҟәарчал», «Очамчыра», «Аҳабла Ҿыц», «Ахәмаррақәа рзы Ареспубликатә ахәыҷтәы-қәыԥштә спорттә школ», «Гал», «Гагра», «Ауарашршыга зауад» «Самырзакан», «Апрогресс», Арацәаҵхҩы», ҳәа иаанацҳауеит Аҿари аспорти русқәа рзы аҳәынҭқарратә Еилакы аофициалтә саит.

Аҟәа. Мшаԥымза 8, 2023 шықәса. Аԥсныпресс. Аԥсны агәабзиарахьчара аминистр Едуард Быҭәба мшаԥымза 24-25 рзы имҩаԥысраны иҟоу  актәи аԥснытәи амедицинатә форум амҩаԥгара аҽазыҟаҵара иазкны аусуратә еилатәара мҩаԥигеит.

Агәабзиарахьчара Аминистрра апресс-маҵзура иҟанаҵо адыррақәа рыла, аилатәара аҿы иалкаахеит асасцәа рсиа, иара убас афорум амҩаԥгара аҭыԥ, атехникатәии аиҿкааратәи азҵаарақәа ирылацәажәеит.