Аҟәа. Абҵарамза 8, 2023 шықәса. Аԥсныпресс. Аԥснытәи амузыкант Асхад Воуба раԥхьаӡа акәны иуникалтәу, идуӡӡоу амузыкатә проект #ВСЕОНИ ихы алаирхәуеит.
2022 шықәсазы иаԥҵаз Урыстәылазегьтәи аҿартә амилаҭтә инструментқәа роркестр #ВСЕОНИ – ари «аоркестр-академиа» ауп, уи иалаху зегьы жәлар ринструментқәа рҿы ихәмаруеит. 85 - ҩык аоркестр иалаху – амузыкатә ҵараиурҭақәа роужьҭымҭацәеи рыстудентцәеи роуп, урҭ Урыстәыла ҩажәижәаба регион рҟынтәи, иара убас Монголиа, Аԥсны, Белорусь ахаҭарнакра руеит. Аоркестр аҿы иуаҳар алшоит аԥснытәи аҿырпын, монголиатәи морин хуур, аурыс балалаикеи амырзаҟани, башкириатәи кураи кыл-кубызи, карелиатәи кантеле, белорусстәи цимбала, ауаԥстәи амырзаҟан (гармоника), уҳәа убас иҵегьы.
Аԥснытәи амузыкант апроект – Санкт-Петербургктәи аҳәынҭқарратә биуџьеттә акультура аусбарҭа «Петербург-концерт» (СПбГБУК «Петербург-концерт») ааԥхьарала Урыстәылаҟа ддәықәлеит Аԥснытәи аҳәынҭқарратә филармониа ахаҭарнак иаҳасабала. Апроект алахәхаразы Ахсад Воуба идгалара мҩаԥигеит О.Хәынцариа ихьӡ зху жәлар ринструментқәа Роркестр асахьаркыратә напхгаҩы Денис Арухаа.
Асхад Воуба – хкы рацәала аинструменталист, Аҳәынҭқарратә акультура аҵараиурҭа аушьҭымҭа (2021 ш.), Нхыҵкавказтәи аҳәынҭқарратә аҟазара Аинститут астудент (ақ. Нальчик, Ҟабарда-Балкариа). Апроект #ВСЕОНИ аҿы иара аҿырпын аҿы дыхәмаруеит.
Сынтәа акыр игәылҭәааз арепетициатә мчыбжьы ашьҭахь – абҵарамза 4 рзы, Москва ақалақь П.И. Чаиковски ихьӡ зху аконцерттә зал Ду аҿы амузыкантцәа раԥхьаӡа акәны ахәаԥшцәа рҟазара дырбараны иҟан. Уаҵәы, абҵарамза 9 рзы, Санкт-Петербургтәи Академиатә филармониа азал Ду аҿы Агала-концерт мҩаԥгахоит.
