Аҟәа. Абҵарамза 9, 2023 шықәса. Аԥсныпресс. Амҵәышәмпыли 3х3 (арԥарцәеи аҭыԥҳацәеи) анапылампыли (аҭыԥҳацәа) рзы Аԥсны еизгоу акомандақәа Ихьыԥшым Аҳәынҭқаррақәа Реиҩызара атәылақәа рыбжьара ашколтә спорт Х Жәларбжьаратәи афестиваль рхы аладырхәуеит, ҳәа адырра ҟаҵоуп Аԥсны аҿари аспорти русқәа рзы аҳәынҭқарратә Еилакы аофициалтә саит.
Аԥснытәи акомандақәа азыҟарҵоит Николаи Гушьин, Дмитри Џьынџьал, Рузанна Никулина.
Афестиваль абҵарамза 7 инаркны абҵарамза 12 аҟынӡа Москва ақалақь аҿы имҩаԥысуеит.
Афестиваль – абар шьҭа традициала 10 шықәса раахыс, 2013 шықәса инаркны Урыстәыла еиуеиԥшым арегионқәа рҿы имҩаԥысуа Ихьыԥшым Аҳәынҭқаррақәа Реиҩызара атәылақәа рыбжьара ашколтә спорт Жәларбжьаратәи афестиваль иацу ауп.
Афестиваль рхы аладырхәуеит 12 тәыла: Урыстәыла, Аԥсны, Азербаиџьан, Ермантәыла, Беларуссиа, Казахсҭан, Кыргызсҭан, Молдова, Приднестровие, Ҭаџьыкьысҭан, Туркменисҭан, Узбекисҭан акомандақәеи, иара убас Урыстәылатәи Афедерациа иахьаҵанакуа инхо Ихьыԥшым Аҳәынҭқаррақәа Реиҩызара атәылақәа рдиаспорақәа ркомандақәеи рҟынтәи 530-ҩык рҟынӡа аспортсменцәа.
Аицлабрақәа аспорт ахкқәа фба рыла еиҿкаахеит. Аицлабрақәа рнаҩс афестиваль иалаху рзы еиҿкаауп инарҭбаау акультура-гәырҿыхаратә программа, аспорттә мастер-классқәа, иара убас еиуеиԥшым егьырҭ хра злоу аусмҩаԥгатәқәа.
«Ихьыԥшым Аҳәынҭқаррақәа Реиҩызара атәылақәа – рыбжьара ашколтә спорт Жәларбжьаратәи афестиваль афедералтә проект «Детский спорт» ихадоу аусмҩаԥгатәқәа иреиуоуп. Аспортсменцәа ас еиԥш иҟоу аицлабрақәа рылахәхрала иҿыцу аҩызцәа рырҳара анаҩс, егьырҭ атәылақәа ркультура атәы еилыркаауеит бызшәак ала ацәажәара, иара убас ҳаиҩызаратә еизыҟазаашьақәа рырӷәӷәара рҵоит», – ҳәа еиҭалҳәеит афедералтә проект «Детский спорт» акоординатор Ирина Роднина.
Афестиваль аиҿкааҩцәаны иқәгылоит Урыстәылатәи Афедерациа аспорт Аминистрра, Урытәылазегьтәи ауаажәларратә бҩарҵәыра-спорттә еиҿкаара «Ашколтә спорт Урыстәылазегьтәи афедерациа», аҳәынҭқаррақәа – Ихьыԥшым Аҳәынҭқаррақәа Реиҩызара атәылақәа - алахәылацәа ргуманитартә усеицуразы Аҳәынҭқаррабжьаратәи афонд, Москва ақалақь аспорт Адепартамент.
