Заанаҵтәи аусеилыргара аубарҭала Георги Зыхәба 50 млн. мааҭ рҟынӡа инаӡо аҿыхԥса ацәгара гәҭакыс иҟаҵаны Мерцхәлаа Омар Даҭикәа-иԥа иԥаара азы ахара идҵахеит. Ауаҩы иԥаара иадҳәалоу ацәгьоура ҟалеит мшаԥымза 17, 2019 шықәсазы Аҟәа араион Гәымсҭа ақыҭан.
Георги Зыхәба иара убас атәылауаҩԥҳәыс Џьелиа И.И. илтәыз амазара аӷьычреи ицынхоз аԥҳәыс Ҭыжәба З.З. ашьразы лықәмақарреи иҭҟьо амцабџьари аџьаԥҳани изакәанымкәа раахәареи рыҵәахреи рзы ахара идҵоуп.
Ахашшааратә коллегиа Зыхәба Георги иганахьала уаанӡа иалхыз ҭакрала ахьырхәра аԥыхреи уи аҩнытә баандаҩтәра ала аԥсахреи рзы аӡбамҭа аднакылеит. Герги Зыхәба аӡбарҭа азал аҿы ахьчаҩцәа рҟынтәи ихы дақәиҭтәын.
Иарбоу ашьауӷатә ус Гәылрыԥшьтәи араионтә ӡбарҭа аҿы иахәаԥшуеит, уи аҳәынҭқарратә харадҵара аганахьала ашьақәырӷәӷәагақәа рыҭҵаара астадиа аҿы иҟоуп.
