Аҟәа. Абҵарамза 6, 2023 шықәса. Аԥсныпресс. Аԥсны ажурналистцәа Реидгыла Аԥснытәи аҳәынҭқарратә Телееилахәыра аколлектив Аԥсуа телехәаԥшра аԥҵара Амш инамаданы ирыдныҳәалоит.
«1978 шықәса, абҵарамза 6 рзы Аԥсуа телехәаԥшра раԥхьатәи адырраҭара аефир ахь иҭыҵит. Ари амш Аԥсуа телехәаԥшра аусзуҩцәа рзы еиԥш зықьҩыла ҳтәыла ателехәаԥшцәа рзы акыр иззыԥшыз мшны иҟалеит.
Ателехәаԥшра аԥҵара аԥсуа жәлар рзинқәа рзы рықәԥара иалҵшәахеит, амилаҭтә ҵысра ашьҭыҵреи аҿиареи рус акырӡа иацхрааит.
Ҷыдала иазгәаҭатәуп 1992 -1993 шш. Аԥсны Аџьынџьтәылатә еибашьраан Аԥснытәи ателехәаԥшра аусзуҩцәа русура. Урҭ апрофессионализми агәымшәареи аарԥшуа иӷәӷәоу ақырҭуа пропаганда иаҿагылеит. Аԥсуа журналистцәа риаша ақырҭуа пропагандистцәа имцырку рхыҭҳәаақәа ириааит.
Хашҭра рықәым Аԥсадгьыл ахьчара зхы ақәызҵаз ҳколлегацәа, аԥсуа телехәаԥшра аусзуҩцәа. Урҭ рыхьӡқәа ззанааҭ гәык-ԥсыкала азнеиреи афырхаҵареи ахамеигӡареи рҿырԥшы аҳасабала аԥсуа журналистика аҭоурых ианылеит.
Ателехәаԥшра ҳаамҭазтәи ауаажәларра аҿгьы еиҳа анырра змоу амассатә информациа ахархәагақәа иреиуоуп. Аԥсуа телехәаԥшра ҳауаажәларра ҳтәыла аҿы имҩаԥысуа аҵак ду змоу ахҭысқәа рзы адыррақәа рыҭарара иадҳәалоу ароль хада нанагӡоит.
Ҳколлегацәа агәабзиара, аинтерес зҵоу апроектқәа, арҿиаратә қәҿиарақәеи аефир аҿы аманшәалареи рзеиӷьаҳшьоит!
Руслан Ҳашыг, Аԥсны Аҳәынҭқарра ажурналистцәа Реидгыла ахантәаҩы!»
