Аҟәа. Лаҵарамза 27, 2025 шықәса. Аԥсныпресс. Аԥсны Аҳәынҭқарратә ҳазалхратә Еилакы аоперативтә ҟәша аусзуҩцәеи Аҟәа ақалақь аҩныҵҟатәи аусқәа Русбарҭа аусзуҩцәеи лаҵарамза 24 рзы Аҟәа ақалақь аҿы ирыԥшааит  еиуеиԥшым ахьӡқәа змаз акриптовалиута арҳара иазкыз 72 цыра аппарат. 5 аппаратк афымцацәаҳәа иаҿакын, ҳәа адырра ҟанаҵоит Аҳәынҭқарратә ҳазалхратә Еилакы апресс-маҵзура.

Аҟәа. Лаҵарамза 27, 2025 шықәса. Аԥсныпресс. Ԥхынгәымза  1 инаркны аҳәаанырцәтәи аҳәынҭқарра атәанчахәы змауа хазы игоу акатегориақәа ирыҵанакуа атәанчаҩцәа ртәанчахәы ацҵа 1000 мааҭ рыла ацҵара азԥхьагәаҭоуп.  Абри азы Аԥсныпресс ахь адырра ҟаиҵеит Аԥсны Атәанчаҩратә Фонд ахантәаҩы Денис Гәылариа.

«Зтәанчахәы ацҵа иацырҵо атәанчаҩцәа рзеиԥш хыԥхьаӡара 15 795-ҩык рҟынӡа инаӡоит. Уи  10 категориак ирыҵанакуа атәанчаҩцәа роуп. Ацҵақәа ршәаразы ихымԥадатәхо иназыцҵоу аԥаратә хархәагақәа шықәсык азы 189 млн. 540 нызықь мааҭ рҟынӡа инаӡоит», –  ҳәа еиҭеиҳәеит Денис Гәылариа.

Аҟәа. Лаҵарамза 28, 2025 шықәса. Аԥсныпресс. Урыстәылатәи Афедерациа атранспорт аминистр актәи ихаҭыԥуаҩ Валентин Иванов Краснодартәи атәылаҿацә ахь иусуратә ҭаара аҳәаақәа ирҭагӡаны аԥсны-урыстәылатәи аҳәынҭқарратә ҳәәа аҿы иҟоу Ганрацәалатәи автомашьынақәа роушьҭра-гәаҭаратә Ҭыԥ «Адлер» даҭааит.

Аҟәа. Лаҵарамза 28, 2025 шықәса. Аԥсныпресс. Аминистрцәа Реилазаара ақәҵарала Аԥсны имаҷуи ибжьаратәуи анаплакра адгылара иазку 2025 шықәсазтәи апрограмма шьақәдырӷәӷәахеит. 2025 шықәсазы апрограмма иазоужьхоит 326 млн. мааҭ.

Апрограмма иалахәылацәахар рылшоит: атуризм, ауаажәларратә крыфара, ааглыхра аусхкқәа рҿы аус зуа анаплакыҩцәа. Урҭ рнаплакқәа реиҭарҿыцразы, ма аҿыцқәа раԥҵаразы ирҭаху амаругақәа раахәара иақәдырӡуа ахарџь рзыршәоит.  

Апрограмма афинансыркра ахыҵхырҭаны иҟоуп ареспубликатә биуџьет аҟынтәи аԥаратә хархәагақәа. Урҭ рахьтә 200 миллион ареспубликатә биуџьет аҟынтәи иазоушьҭуп, 126 миллион — Урыстәылатәи афинанстә цхыраароуп, ҳәа иаанацҳауеит Аминистрцәа Реилазаара апресс-маҵзура.

Аҟәа. Лаҵарамза 28, 2025 шықәса. Аԥсныпресс. Аԥыза-министр Владимир Делба инапынҵала Аҟәа ақалақь, Аиааира апроспект ала игылоу аҩны №170 ашҭа аиқәыршәазаара иазкыз аусурақәа мҩаԥган. Ари аҩны аҿы инхо ауаа рышҭа аиқәыршәазаара иазкыз аусурақәа рымҩаԥгара 30 шықәса иреиҳаны иазыԥшын. Иқәсхьоу акоммуникациақәа, иажәхьоу аканализациатә система иахҟьаны ес-қәоураан араҟа инхо ауаа акыр изыргәамҵуаз аҭагылазаашьақәа ҟалон. Уажәшьҭа ари апроблема ӡбахеит. 

Аҟәа. Лаҵарамза 30, 2025 шықәса. Аԥсныпресс. Нижни Новгорд Ахадареи ақалақьтә Думеи рофициалтә делегациа Нижни Новгород Амшқәа Аҟәа рымҩаԥгара аҳәаақәа ирҭагӡаны аиашьаратә қалақь Аҟәа иаҭааит.

Аҟәа ақалақь Ахадараҿы имҩаԥысит ақалақь ахада Ҭемыр Агрбеи уи урыстәылатәи иколлега Иури Шалабаеви реиԥылара.  Ҭемыр Агрба апрограмма аҭбаареи алахәылацәа рхыԥхьаӡареи уи амаҵ азызуа аиҿкаарақәеи рганахьала Нижни Новгород Амшқәа рымҩаԥгара амасштаб дазааҭгылеит.

Аҟәа. Лаҵарамза 30, 2025 шықәса. Аԥсныпресс. Атуризм аминитстр Асҭамыр Логәуа аԥыза-министр ихаҭыԥуаҩ, атуризм Аминистрра ахылаԥшра азҭо Вараздат Миносиан диԥыло ааиагәа имҩаԥысыз Мрагыларатәи Аԥсны аҭаара аихшьаалақәа дрылацәажәеит. Ирылацәажәеит иара убас иарбоу арегион аҿы атуризм аҿиара аперспективақәас иҟоу.

Аминистр убасгьы Аԥсны абизнес маҷ ахаҭарнакцәа акыр агәҭынчымра рызцәырызго аԥсшьаҩцәа рыдкылара аобиектқәа рҿы ахәԥсақәа рдемпинг иадҳәаланы иҟоу апроблемагьы дазааҭгылеит.

Асҭамыр Логәуеи Вараздат Миносиани атуристтә џьармыкьа алахәылацәа зегьы ринтерессқәа ҳасаб азуны адемпинг аҿагыларазы иҟаҵатәу иалацәажәеит.

Аҟәа. Лаҵарамза 30, 2025 шықәса. Аԥсныпресс. Аԥсны Аконституциатә ӡбарҭа аӡбаҩ Диана Ԥлиа Сибратәи азиндырратә Университет аҿы имҩаԥысуа анаука-практикатә конференциа лхы алалырхәуеит.

Аконференциа  атема — «Административтә ӡбамҭа аӡбаратә хылаԥшра аҭара: атеориа, азакәанԥҵара, азинхархәаратә практика» («Судебный контроль над административным усмотрением: теория, законодательство, правоприменительная практика»).

Диана Ԥлиа Аконституциатә ӡбарҭа аусуразы ари атема актуалра азгәалҭеит.

Аӡбара — ари Аконституциатә ӡбарҭа ала азыӡбақәа рыдкылара апроцесс иузаҟәымҭхо хәҭоуп. Уи азинтә система адаптациатә лшара шьҭнахуеит, ауаажәларра рҿы иҟало аиҭакрақәа иашьашәаланы азхьаԥшреи акала ишьаҭаркым аҳәынҭқарра аганахьала рус аҽалагалара аҟынтәи  атәылауаа ринтерессқәа рыхьчареи алнаршоит.

Аҟәа. Лаҵарамза 30, 2025 шықәса. Аԥсныпресс. Аҳәынҭқарра Ахада Бадра Гәынба Аԥсны Аҳәынҭқарратә шәарҭадара Амаҵзура ахантәаҩы ихаҭыԥуаҩцәа раҭара азы Аусԥҟақәа инапы рыҵаиҩит.

Аҟәа. Лаҵарамза 30, 2025 шықәса. Аԥсныпресс. Атәыла аԥыза-министр Владимир Делба аԥшьаша, лаҵарамза 29 рзы аҵара аминистр Хана Гәынба дылԥылеит. Аҵарашықәс ахыркәшара иадҳәалаз азҵаарақәа рылацәажәара ашьҭахь, аҵарадырра асистема аҿиара азҵаарақәа шьҭыхын.

Аиԥылараҿы иара убас абжьаратә школқәа алагарҭатә классқәа ркомплектациатә ҭагылазаашьа иалацәажәеит.