Аҟәа. Жәабранмза 21, 2023 шықәса. Аԥсныпресс. Аԥсуааи абелорусцәеи еизааигәоу, игәакьоу уааны ирыԥхьаӡоит, ҳәа Белоруссиа Ахада иԥылара ашьҭахь ажурналистцәа дрыҿцәажәо абас аҳәамҭа ҟаиҵеит Аԥсны Аҳәынҭқарра Ахада Аслан Бжьаниа, ҳәа адырра ҟанаҵоит Белоруссиа Ателегарафтә Маҵзура (БЕЛТА).     

«Абелорусцәа ҳара ҳҿы акыр иаҳзааигәоу, иҳазгәакьоу уааны ирыдыркылоит. Ҳтәылауа рӷьырак макьана асоветаамҭазтәи агәалашәарақәа рыла инхоит. Мрагыларатәи аҳәынҭқаррақәа рҟынтәи иалагалаз асанкциақәа ирыхҟьаны ҳара акыр аамҭа аизолиациа аҿы ҳаҟан. Урыстәыла ацхыраарала ҳара ҳтәылаҿы аизолиациа алҵра иазку апроцессқәа мҩаԥысуеит. Иарбоу ахырхарҭа ала Белоруссиа аимадара абжьаҵара акыр аҵак ду аманы иҟоуп. Ҳара иаҳҭахуп аимабзиаратә еизыҟазаашьақәа ҳабжьаларц, акцент зызухо – аекономикатә усеицура ауп», - ҳәа иҳәеит Аслан Бжьаниа.

Аҟәа. Жәабранмза 21, 2023 шықәса. Аԥсныпресс. Белоруссиеи Аԥсни рыбжьара аусеицура аҿиара азҵаарақәа ирылацәажәеит Минск ақалақь аҿы имҩаԥысыз Белоруссиа Ахада Алеқсандр Лукошенкои Аԥсны Аҳәынҭқарра Ахада Аслан Бжьаниеи реиԥылара аҿы, ҳәа адырра ҟанаҵоит Белоруссиатәи Ателеграфтә Агентра (БЕЛТА).

Алеқсандр Лукашенко Белоруссиа есымша Аԥсни Белоруссиеи аусеицура абжьаҵара иадгылон, уи Алеқсандр Лукашенко цәыббрамза,  2022 шықәсазы Аԥсныҟа иаара аҳәаақәа ирҭагӡаны имҩаԥгаз аиԥыларақәа рҿы иалацәажәахьан.

«Сара акызаҵәык акәын схаҿы исзаамгоз, избан иара Қырҭтәыла анапхгара абас изаргәамҵуеи ҳара ҳаиԥыларақәа ҳәа хәыцырҭас исыман.  Ауаа, ажәларқәа рыбжьара иҭышәынтәалоу, аиҩызаратә еизыҟазаашьақәа ҟалар алымшаӡои? Усҟангьы ишысҳәаз еиԥш, арҭ аизыҟазаашьақәа аԥсуа жәлари ақырҭуа жәлари рыбжьара аҭынчреи аҭышәынтәалареи шьақәнаргылар алшозар. Сымҩашьозар, ҳара ахаангьы Қарҭ аганахьала изеиԥшразаалак акциақәа азԥхьагәаҳҭо иҟамлаӡацызт», - ҳәа Белоруссиа Ахада иажәақәа аанагоит Белоруссиатәи Ателеграфтә Агентра (БЕЛТА).

Алеқсандр Лукашенко ишазгәеиҭаз ала, иара Қырҭтәыла ашьақәгылара иаҿу аҭагылазаашьа дацклаԥшуеит. Иаагозар, Қырҭтәыла ԥыхьатәи Ахада Михаил Саакашвили идҳәаланы иҟоу аҭагылазаашьа. Иара уеизгьы Аҳәынҭқарра Ахадас дшыҟаз ҳасаб азуны уахәаԥшуазар,  иахьа ишизныҟәо зынӡа иԥшӡаӡам, уимоу иԥхашьароуп ҳәа исыԥхьаӡоит. Уи зхысҳәаауа, ҳара ари аҭагылазаашьа аума, аиԥш-зеиԥшу егьырҭ аҭагылазаашьақәа роума рганахьала ҳгәаанагара ҳамҳәаӡеит, ҳҽалаҳамгалаӡеит. Ҳара излауа ала Қырҭтәыла ибзианы ҳазыҟоуп, аимабзиаратә еизыҟазаашьақәа рыбжьаҵара ҳадгылоит. Убри инамаданы исзеилкаауам, избан дара Аԥсни Белоруссиеи рыбжьара аизыҟазаашьақәа рышьақәгылареи рыҿиареи ас изыргәамҵуа. Сгәы иаанагоит Шәара ари азҵаара аҭак аиураҿы ацхыраара сышәҭап ҳәа», - иҳәеит Алеқсандр Лукашенко.

Аҟәа. Жәабранмза 21, 2023 шықәса. Аԥсныпресс.  Жәабранмза 21 рзы иазгәарҭоит аҟыбаҩ ду злаз аԥсуа сахьаҭыхҩы Леуарса Быҭәба иира Амш (21.02.1960 - 17.09.2007).

Аԥсны асахьаҭыхыҩцәа Реидгыла иатәу ацәыргақәҵатә зал Хада адиректор Феисбук иҟоу лдаҟьа аҿы аҟазарадырҩы Алеқсандра Панфилова иааџьаушьаратәы ииашаны асахьаҭыхыҩ иԥсҭазаареи иҟазареи аазырԥшуа лажәақәа аалгеит:

«…Леуарса Быҭәба – акы иаламҩашьо агәырӷьара зцу аҟыбаҩ злоу, аха убри аан зыԥсынҵры кьаҿхаз асахьаҭыхыҩ иоуп. Ус ишыҟалоз идыруан иара. Убри азыҳәан акәхап ас  иҷыданы изыҟаз уи идунеи. Уи дахьӡар акәын уи инапы иҵыҵуаз, иара иблала иибоз анашанара ауаа рызнагара…

Иаанхаз уи рзааныжьра. Ацәаҟәа-Анасыԥ цҳаҵас адунеи ахҵара, егьырҭ идырым аблақәа  иара Иԥрашхәа баны насыԥ рхыларц. Ҭагалантәи аллеиа иаҵоу аҭынчреи араҳаҭреи знырыз   атәым, идырым агәы уажәаԥхьа хара инеиҩуа агәеисыбжь  еихсыӷьырц.

Аҟәа. Жәабранмза 21, 2022 шықәса. Аԥсныпресс. Ажьырныҳәамза 1 инаркны жәабранмза 20, 2023 шықәса аҟынӡа аӡиа Риҵа иаҭааит  16 224-ҩык. Афинанстә лагалақәа реизак  10 млн. 672 нызықь 300 мааҭ рҟынӡа инаӡеит. Абри азы Аԥсныпресс ахь адырра ҟарҵеит атуризм Аминистрра аҿы.   

Аиԥш-зеиԥшу аамҭахәҭа, 2022 шықәсазы Риҵа иаҭааз рхыԥхьаӡара 20 802-ҩык рҟынӡа инаӡон, афинанстә лагалақәа реизак –  6 млн 940 нызықь 450 мааҭ.

Аҟәа. Жәабранмза 21, 2023 шықәса. Аԥсныпресс. Гәдоуҭа араион Апрокуратура Аԥсны Ашьаусеилыргаратә Закәеидкыла ахәҭаҷ 164, ахәҭа 2 (ԥжәарыла атәым мазара гәҭакыла аԥхасҭа аҭара), ахәҭаҷ 217, ахәҭа 1 (иҭҟьо амцабџьар, аџьаԥҳаны, арҭҟәыцгақәа изакәанымкәа аҵәахра, аиҭарсра) рыла  ишьақәыргылам ахаҿы иганахьала аусеилыргара хацнаркит.

Жәабранмза 18 рзы 3 сааҭки 30 минуҭи 4 сааҭки 10 минуҭи рыбжьара, ишьақәыргылам ахаҿы атәым мазара аԥхасҭа аҭара гәҭакыс иҟаҵаны, Гәдоуҭа ақалақь, Арӡынба имҩа, аҩны №7 ашҭаҿы игылаз автомашьына макьаназы зыхкы шьақәыргылам арҭҟәацга аҵеиҵеит.  

Аҟәа. Жәабранмза 21, 2023 шықәса. Аԥсныпресс. Аԥсны агәабзиарахьчара аминистр Едуард Быҭәбеи аминистр ихаҭыԥуаҩ Саида Делбеи згәабзиара алшарақәа ԥку ахәыҷқәа Рреабилитациатә Центр аусура гәарҭеит, ҳәа адырра ҟанаҵоит агәабзиарахьчара Аминистрра апресс-маҵзура.

Ареабилитациатә Центр аҳақьым хада Лиана Емухвари ари амедусбарҭа аусура атәы еиҭалҳәеит.

Лара ишазгәалҭаз ала Ацентр згәабзиара ԥку ахәыҷқәа комплексла ртерапиа амҩаԥгара азы алшарақәа зегьы амоуп. Иарбоу амедусбарҭа аҿы есымша аус руеит апсихологцәа, адефектологцәа, алор-ҳақьымцәа, апедиатрцәа, алогопедцәа, арҵаҩы-ааӡаҩ, Ахәышәтәратә бҩарҵәыра аинструктор (ЛФК).

Едуард Быҭәба акабинетқәа дрыҩнысны игәеиҭеит, аусзуҩцәа дрыҿцәажәеит, Ацентр агәабзиарахьчара Аминистрра аҟынтәи иарбан цхыраароу иаҭаху дазҵааит.

Аҟәа. Жәабранмза 21, 2023 шықәса. Аԥсныпресс. Жәабранмза  21 рзы – Аԥсуа литература ашьаҭаркҩы Дырмит Иасыф-иԥа Гәлиа иира Амш азгәарҭоит (21.02.1874 – 07.04.1960). Иахьа Аҟәа ақалақь, Р.Гәынба ихьӡ зху Аԥснытәи аҳәынҭқарратә филармониа ашҭаҿы, ашәҟәыҩҩы анышә дахьамадоу ашәҭ шьыҵәрақәа рышьҭаҵара ацеремониа мҩаԥысит.  

Аҟәа. Ажьырныҳәамза 20, 2023 шықәса. Аԥсныпресс. Аҳәынҭқарратә автоинспекциа аусзуҩцәа аплан «Ишәарҭам ақалақь» ала апрофилактикатәии ареидтәи аусмҩаԥгатәқәа рынагӡараан  амҩаҿы аныҟәара аԥҟарақәа реилагаразы еиқәыдыршәеит   411 ԥкаанҵа, ҳәа адырра ҟанаҵоит Telegram-канал аҿы иҟоу Аԥсны аҳәынҭқарратә автоинпекциа адаҟьа.

Еиқәыршәоу 411 пкаанҵа рҟынтәи:

Ижәны амашьына аԥсҟы акра азы – 56,

Автомашьына асаркьақәа рыԥшшәахәыркра аԥҟарақәа реилагара азы – 44.

Аплан «Ишәарҭам араион» ала апрофилактикатәии ареидтәи аусмҩаԥгатәқәа мҩаԥыргеит аҩныҵҟатәи аусқәа Рминистрра аҳәынҭқарратә автоинспекциа араионтә ҟәшақәа русзуҩцәа.

Аҟәа. Ажьырныҳәамза 20, 2023 шықәса. Аԥсныпресс. Амуниципалтә наплакы «Ицқьоу ақалақь» амчала Очамчыра ақалақь амшын аԥшаҳәа иахьаҵанакуа изызҳауа аҵлақәеи ачықьқәеи реилыхра мҩаԥысуеит.

Аԥсаҵлақәа иҩаз амахәқәа рхырффареи аолеандр ачықьқәа реилыхреи мҩаԥысуеит.

Аҟәа. Ажьырныҳәамза 20, 2023 шықәса. Аԥсныпресс. Аԥсны Иҷыдоу аҭагылазаашьақәа рзы Аминистрра аҿы 2022 шықәсазы имҩаԥгаз аусура азы аихшьаалақәа ҟарҵеит, ҳәа адырра ҟанаҵоит аиқәырхаратә хылаԥшырҭа апресс-маҵзура.

Иҳаҩсыз ашықәс азы инагӡаз аусура аихшьаалақәа рыҟаҵара иазкыз аилатәара рхы аладырхәит аппарат Хада аҟәшеиҵақәа зегьы рнапхгаҩцәа реиԥш, араионтә былрацәыхьчара-еиқәырхаратә ҟәшақәа рнапхгаҩцәагьы.  

2022 шықәсазы арбага хадақәа абас иҟоуп. Иҳаҩсыз ашықәс азы аԥсеиқәырхаҩцәа 1837-нтә иҷыдоу аҭагылазаашьақәа ахьыҟалаз аҭыԥқәа рахь инеит. 979 инарзынаԥшуа абылрақәеи амцакрақәеи ҟалеит. Рыԥсы еиқәырхан 9-ҩык, 6-ҩык ҭахеит.  167-нтә аиқәырхаҩцәа амҩа-транспорттә машәыр хҭысқәа ахьыҟалаз аҭыԥқәа рахь ааԥхьара роуит. Урҭ рҿы иҭахеит ф-ҩык, еиқәырхахеит  28-ҩык.

Аӡы аҟны иҟоу обиектқәа рҿы иҟалеит 23 машәыр хҭыс. 8-ҩык рыԥсы аиқәырхара алыршахеит, 13-ҩык аӡы иагеит.

2022 шықәсазы аԥсеиқәырхаҩцәа ҩынҩажәижәабантә ашьха иаԥну аҭыԥқәа рҿы иҟьалаз ауаа рыԥшаара рхы аладырхәит. 32-ҩык рыԥшаара алыршахеит, аха аԥшаарақәа раан иара убас ирыԥшааит аа-ҩык хабарда ибжьаӡны иҟаз ауаа рыԥсыбаҩ.  

2022 шықәсазы 63-ҩык атәылауааи ареспублика иаҭааз асасцәеи Иҷыдоу аҭагылазаашьақәа рзы Аминистрра аҳақьымцәа раԥхьатәи амедицинатә цхыраара рырҭеит.

Иҳаҩсыз ашықәс азы аиқәырхаратә хылаԥшырҭа аусзуҩцәа иԥшааны еиҵырхит 60 инарзынаԥшуа арҭҟәацгақәеи  20 рҟынӡа ахимиатә шәарҭадара змоу амаҭәашьарқәеи рԥыхагадатәра алдыршеит.

Аминистр, аинрал-леитенант Лев Кәыҵниа иажәақәа рыла, 2022-тәи ашықәс ахылаԥшырҭа ала жәларбжьаратәи агуманитартә операциақәа рынагӡара аганахьала иҷыдоу ашықәсны иҟалеит. Жәабранмза 2022 шықәсазы иҷыдоу арратә операциа алагара инаркны, Аԥсныҟа аконфликт азона аҟынтәи раагара алыршахеит 132-ҩык ахҵәацәа. ЛЖәР, ЛЖәР, иара убас Херсонтәии Запорожтәии аобластқәа рҿы инхо ауааԥсыра рзы 200 тонн рҟынӡа, иара убас милаҭрацәала еилоу абаталион  «Пиатнашка» аизаараҿы Иҷыдоу арратә операциа зхы алазырхәо Аԥсны атәылауаа рзы 20 тонн рҟынӡа агуманитартә цхыраара дәықәҵахеит.