Аҟәа. Жәабранмза 27, 2024 шықәса. Аԥсныпресс. Дырмит Гәлиа ипиеса «Аԥҳәызбеи арԥызбеи рышәҟәы» ала иқәыргылаз аспектакль «Иареи лареи» аԥхьарбара мҩаԥысит ашәахьа, жәабранмза 27 рзы, С. Ҷанба ихьӡ зху Аԥснытәи аҳәынҭқарратә драматә театр аҿы. Аспектакль ақәыргылара аԥсуа литература ашьаҭаркҩы Дырмит Галиа диижьҭеи 150-шықәса аҵра азгәаҭара иадҳәалахеит.
Аспектакль арежиссиор – Аԥсны зҽаԥсазтәыз артистка Мадина Аргәынԥҳа Аԥсныпресс акорреспондент диҿцәажәо аспектакль ақәыргылара атема хаданы иҟоу абзиабара ауп ҳәа иазгәалҭеит.
«Аспектакль асиужет аҿы ишьҭоу арԥызбеи аԥҳәызбеи ирыбжьоу асаламшәҟәқәа рыла аимадара ауп. Зынӡа зхыԥхьаӡара ааба рҟынӡа инаӡоз ашәҟәқәа, иуадаҩугьы уахь иналаҵаны, еиуеиԥшым аҭагылазаашьақәа раан афырхацәа реизҟазаашьақәа зеиӷьаҟам ала иаадырԥшуеит. Асиужет аклассикатә ҟазшьа амоуп. Уи иаанарԥшуеит абзиабара цқьа амч, уи иабзоураны иарбан уадаҩразаалакгьы изықәшәо ириааины арԥызбеи аԥҳәызбеи еицаанхоит, насыԥла иҭәу аԥсҭазааратә мҩа ду еицанылоит», – ҳәа инаҵшьны иазгәалҭеит лара.
Мадина Аргунԥҳа лажәақәа рыла, аспектакль атеатр арепертуар хада иалаларатәы аҟаҵара азы агәҭакқәа рымоуп.
«Ари аспектакль ақәыргылара ипланнҭыҵтәины иҟоуп, аха аҳара уи ихадоу арепертуар алагалара азы ҳалацәажәоит. Уи аиҳарак изыдҳәалахо ахәаԥшцәа уи шрыдыкыло ауп», – ҳәа еиҭалҳәеит лара.
Арольқәа нарыгӡоит: Аԥсны жәлар рартистцәа Виолетта Маан, Кьиасоу Ҳагба, иара убас Аԥсуа театр артистцәа - Гәында Ажьиба, Гәыдиса Ҭодуа, Циала Инаԥшьба, Кристина Цымцба, Алхас Шамба.
Аԥхьарбара аҩбатәи амш – жәабранмза 27, асааҭ 19:00 рзы имҩаԥгахоит..
Афото Ельза Ҷанба.
