Амедицинатә форум рхы аладырхәуеит урыстәылатәи академикцәа, апрофессорцәа, амедицинатә наукақәа ркандидатцәа, амедицинатә наукақәа рдокторцәа, аԥснытәии урыстәылатәии амедицинатә еилазаарақәа рхаҭарнакцәа. Аусмҩаԥгатә ахь ааԥхьара роуит: Аахыҵ Уаԥстәыла агәабзиарахьчара аминистр Томас Џьигкаев, Самаркандтәи амедицинатә университет (Узбекьысҭан) ахаҭарнакцәа. Аусмҩаԥгатә аиҿкаара иадҳәалоу азҵаарақәа ирызкын атәыла агәабзиарахьчара Аминистрра аҟны агәабзиарахьчара аминистр Едуард Быҭәба ихантәаҩрала имҩаԥысыз аилацәажәара, ҳәа адырра ҟанаҵоит иарбоу Ахылаԥшырҭа апресс-маҵзура.

 Едуард Быҭәба ишазгәеиҭаз ала, амедицинатә цхыраара аҟаҵара аиӷьтәра иазырхоу аусмҩаԥгатәқәа реиҿкаара иазку аӡбамҭақәа рыдкылареи актуалра злоу апроблеақәа рылацәажәареи рзы агәабзиарахьчара анапхгараҭаратә усбарҭақәа рхаҭарнакцәеи аус зуа аҳақьымцәеи агәабзиарахьчара асистема апрофильтә специалистцәеи аиҿкааҩцәеи, иара убас аексперт-аналитикцәеи азиндырҩцәеи   џьарак реидкылара  афорум ахықәкы хаданы иҟоуп. 

Ҷыдала ахшыҩзышьҭра аҭахоит агәабзиарахьчара аусхкы аҿы, иара убас актуалра злоу егьырҭ ахырхарҭақәа рыла Аԥсни Урыстәылеи русеицура аҩаӡара ашьҭыхра.