Аҟәа. Абҵарамза 8, 2023 шықәса. Аԥсныпресс.  Зҭакԥхықәра Ҳәаақәҵоу Аилазаара «Самшитовая роща» ашәахтәқәеи аизгақәеи Рминистрра ахь ашәахтә усбарҭа иаднакылаз аӡбамҭа азинмчы  аԥыхразы азыҳәамҭа Абжьаҟазаратә ӡбарҭа ахь идәықәнаҵеит.  

Мышқәак раԥхьа Telegram-канал https://t.me/respublicaabh аҿы  «Самшитовая роща» аҵыхәтәантәи хышықәса рзы  аҳәынҭқарратә биуџьет ахь 380 миллион инарзынаԥшуа, инҭкааны иуҳәозар, ашәахтә шәатәқәа раҳасабала 368,4 млн. мааҭи, ақьыратә хәыԥса аҳасабала  11,4 млн. мааҭи  аланагалеит ҳәа адырра анылеит.  

Аинформациатә Агентра Аԥсныпресс  Аԥсны идуу акурорттә обиектқәа хәба аҵыхәтәантәи ашықәсқәа рзы иҟарҵаз ашәахтә лагалақәа рзы адырра аиура азы иҟанаҵаз аҳәара аҭак аҳасабала абарҭ арбагақәа ҳауит.

2021 шықәса инаркны жьҭаарамза 31, 2023 шықәанӡа Аԥсны акурорттә обиект дуқәа хәба ашәахтә шәатәқәа раҳасабала иҟарҵаз алагалақәа реицҵалыҵ 571 млн. мааҭ иреиҳауп.  

Аҟәа. Абҵарамза 8, 2023 шықәса. Аԥсныпресс. Абиуџьети акредиттә еиҿкаарақәеи ашәахтәқәеи афинансқәеи рзы апарламенттә Еилакы аҿы абҵарамза 8 рзы «2023 шықәсазы Ареспубликатә биуџьет азы» Аԥсны Аҳәынҭқарра Азакәан аиҭарақәа ралагаларазы» азакәан апроект  иахәаԥшит. Аилак инарҭбаау аилатәара мҩаԥигон уи ахантәаҩы Беслан Ҳалуашь.  

Абҵарамза 2 рзы актәи аԥхьараҿы ирыдыркылаз  азакәан апроект,  Аԥсны  Аҳәынҭқарра  2023 шықәсазы Ареспубликатә  биуџьет  ихадоу апараметрқәа аиҭакрақәа ралагалара азԥхьагәанаҭоит.  

Аҟәа. Абҵарамза 8, 2023 шықәса. Аԥсныпресс. Ҟрым имҩаԥысит Аџьынџьтәылатәи Еибашьра Дуӡӡа афырхаҵа, Аԥсны иалҵыз аибашьҩы  Ризбеи Хьибба иԥсыбаҩ иԥсадгьыл ахь адәықәҵара аламҭалазтәи алахьеиқәҵаратә церемониа  мҩаԥысит.  Аволонтиорцәа афырхаҵа иԥсыбаҩ данҭахоз ицыз ихатәы маҭәақәа ацны иԥсадгьыл ахь аашьҭра алдыршеит. Алахьеиқәҵаратә усмҩаԥгатә мҩаԥгахеит асолдаҭ-афырхаҵа иԥсыбаҩ ахьырыԥшааз Ленин ихьӡ зху араион аҿы, ҳәа адырра ҟанаҵоит «Вести Крым» асаит.

Аҟәа. Абҵарамза 8, 2023 шықәса. Аԥсныпресс.  Абҵарамза 12 – 16, 2023 шықәсазы аинвалидра змоу ахәыҷқәа рыцхырааразы агәыҳалалратә фонд  «Движение вверх» (ақ. Москва, Урыстәыла) амедицинатә реабилитациа ацентр «Экзарта» (ақ. Нижни Новгород, Урыстәыла), иара убас  амедицнатә реабилитациа азы Жәларбжьаратәи академиа рыцхыраарала Аԥсны имҩаԥгахоит асоциалтә ҵакы змоу аҵаратә проект «Аинвалидра змоу ахәыҷқәа рреабилитациа азы ҳаамҭазтәи аеффективра злоу аметодқәа» анагӡара мҩаԥгахоит.

«Апроект ҷыдала Аԥсны амедицинатә еилазаара ахаҭарнакцәа рзы  еиқәыршәоуп, уи аинвалидра змоу ахәыҷқәеи урҭ рҭаацәеи  амедицинатә цхыраара рыҭареи аԥышәеи адыррақәеи рыла аимадареи иазырхоуп», – ҳәа иазгәаҭоуп апроект апресс-релиз аҿы.

Апроект аҳәаақәа ирҭагӡаны алекциақәа, амастер-классқәа, иара убас аҳақьымцәа рзы еиԥш аинвалидра змоу ахәыҷқәа рҭаацәеи рзы хазхаҭалатәи аконсультациақәа рымҩаԥгара азԥхьаҵәаҭоуп.  

Урҭ мҩаԥыргалоит амедицинатә реабилитациа иазку Урыстәыла иреиӷьу ацентрқәа иреиуоу ацентр аспециалистцәеи аекспертцәеи.   

Апроект аусмҩаԥгатәқәа Ҵандрыԥшь аҳаблеи Аҟәа ақалақьи рҿы имҩаԥыслоит.

Аҟәа. Абҵарамза 8, 2023 шықәса. Аԥсныпресс. Абжьаҟазаратә ӡбарҭа Зҭакԥхықәра Ҳәаақәҵоу Аилазаара «Самшитовая роща» ашәахтәқәеи аизгақәеи Рминистрра ахь азашра ала аус №АС-62/2023 ахәаԥшразы аӡбаратә еилатәара амҩаԥгара арыцхә шьақәнаргылеит, ҳәа адырра ҟанаҵоит Абжьаҟазаратә ӡбарҭа аофициалтә саит.  

Зҭакԥхықәра Ҳәаақәҵоу Аилазаара «Самшитовая роща» ашәахтәқәеи аизгақәеи Рминистрра ахь ашәахтә усбарҭа иаднакылаз аӡбамҭа азинмчы  аԥыхразы азыҳәамҭа ахәаԥшразы аӡбаратә еилатәара абҵарамза 29, 2023 шықәса, 11 сааҭи 00 минуҭи рзы имҩаԥгахоит.

Азыҳәамҭа ахәаԥшра аӡбаҩ Алиса Чамагәуа лхантәаҩрала имҩаԥгахоит. 

Аҟәа. Абҵарамза 8, 2023 шықәса. Аԥсныпресс. Краснодартәи аҳазылхыҩцәа 2600 пачка инарзынаԥшуа асигареҭ изакәанымкәа Урыстәылантәи Аԥсныҟа раагара аԥхьырҟәҟәаара алдыршеит, ҳәа адырра ҟанаҵоит Урыстәылатәи Афедерациа афедералтә ҳазылхратә Маҵзура апресс-маҵзура.  

Ганрацәалатәи автомашьынатә аужьҭра-гәаҭаратә Пункт Адлер аҳазылхратә ԥыԥшырҭа аусзуҩцәа изакәанымкәа аҭаҭын аалыҵ аиагаразы зҽазызшәоз ҩ-машьынак ааныркылеит.

Автомашьына HYUNDAI амобилтә инспекциа-гәаҭаратә комплекс ахархәарала аҳазылхратә гәаҭараан, абензинмқьаҭи аԥсахга гьежьи ахьыҟоу аҭыԥ азааигәара атәым маҭәахәқәа рыҟазаара шалшо арбан.

«Иарбоу атранспорттә хархәга агәаҭараан аҭаҭын аалыҵ зҭаз имаӡоу аҭаҵәахқәа аарԥшхеит, – ҳәа иҳәеит Краснодартәи аҳазылхырҭа Ганрацәалатәи автомашьынатә аужьҭра-гәаҭаратә Пункт Адлер аҳазылхратә ԥыԥшырҭа аиҳабы  Алеқсеи Быков. – Асигареҭқәа рыхәҭак амашьына аҵа ахҟьа абжьара иҟаз, зыԥшра еиҭакыз абензинмқьаҭ иҭаҵәахын, егьи – асанҭыр змамыз аԥсахга гьежьы аҩныҵҟа иҭан». Ари амашьынала  1100 пачка асигареҭ аиагара рҽазыршәеит.

Аҟәа. Абҵарамза 8, 2023 шықәса. Аԥсныпресс. Аԥснытәи аделегациа жьҭаарамза анҵәамҭазы Тамбовтәи аобласть Петровтәи аокруг аҿы иҟан. Арегион абара аҳәаақәа ирҭагӡаны асасцәа аҭыԥантәи абаҳчааӡаратә наплакы иаҭааит.  Араҟа урҭ ҳамҭас ирырҭеит 100 шьапык ԥшь-сортк рҟыӡа иҟоу аҵәаҵлақәа реиҭаҳатәқәа.  Абри азы адырра ҟаҵоуп асаит https://tambov.mk.ru. аҿы.

Араион ахада Сергеи Ефанов ишеиҭеиҳәаз ала, аԥсуа қалақь Гал аҿы Аиҩызара ахьӡала аҵәаҵлақәа раллеиа аиҭаҳара азԥхьагәаҭоуп. Уи ҳамҭас ирырҭо аҵлақәа аԥсуа дгьыл шанаало, ишыӷьацо азы  агәыӷра ааирԥшит.

Аҟәа. Абҵарамза 8, 2023 шықәса. Аԥсныпресс. Аҳәынҭқарратә бызшәатә политика азы аҳәынҭқарратә Еилакы аҿы хы-шықәса инадыркны жәа-шықәса рҟынӡа зхыҵуа ахәыҷқәа рзы аԥсышәала ицәажәо ԥшь-ҭыжьымҭак аӡыргара мҩаԥысит.   

Уи –  асахьақәа рыла еиқәыршәоу ажәар «Сара раԥхьатәи сышәҟәы», А. Мықәба ахәыҷқәа рзы ииҩыз алакә-апиеса «Ажьа-афырхаҵа», Г. Сақаниа авторс дызмоу, ԥшшәы еилаԥсала ашәыгақәа зцу ажәеинраалақәа реизга «Ашәҭқәа рашәа», иара убас Г. Кәыҵниа авторс дызмоу ашколнӡатәи ақәра иаҵанакуа ахәыҷқәа рзы сахьала еиқәыршәоу аизга «Асааҭи аамҭеи» роуп.   

Ажәар «Сара раԥхьатәи сышәҟәы»  – ари даара ибзианы асахьақәа рыла еиқәыршәоу ҭыжьымҭоуп. Еиуеиԥшым аԥшшәқәеи урҭ рахь аҵаҩырақәеи аилыркаагақәеи ахәыҷқәа имарианы ирласны иарбоу амаҭәарқәеи ацәырҵрақәеи рыхьӡқәа ргәынкылараҿы хра злоу цхыраагӡаны иҟалоит.

Ԥшшәы еилаԥсала ашәыгақәа зцу ажәеинраалақәа реизга «Ашәҭқәа рашәа» еиуеиԥшым ашәҭқәа ирызку ажәеинраалақәа ирызку ажәеинраалақәа рыла еиқәыршәоуп.

Ашәҟәы «Асааҭи аамҭеи» аԥхьаҩ хәыҷы ашьыжьтәи абҩарҵәыреи шьыжьхьафареи инадыркны иҵатәқәа рыҟаҵара аҟынӡа ихадоу  иусқәа рзы иаамҭа ииашаны азыԥҵәара иҵарц азы ацхыраара инаҭоит. Ари ашәҟәы аҿы еизгоуп асахьақәеи игәырҿыхгоу ажәеинраалақәеи.

«Ажьа-афырхаҵа» –  ари А. Мықәба ахәыҷқәа рзы ииҩыз алакә-апиеса ауп.

Ашәҟәқәа реиҳарак Аԥсны араионқәа зегьы рахь ашколқәеи ахәыҷбаҳчақәеи рахь идәықәҵахоит. Ашәҟәқәа ааухәар ҟалоит ашәҟәҭирҭатә дәқьанқәа рҿы.

Аҳәынҭқарратә бызшәатә политика азы аҳәынҭқарратә Еилакы аспециалистцәа рнапхгарала фымз ирылагӡаны иарбоу аҭыжьымҭақәа аус рыдырулон аԥсуа бызшәа аспециалистцәа, аметодистцәа, ааԥхьара зауз асахьаҭыхыҩцәа.  

Ашәҟәқәа зегьы ааизакны ртираж –  3500 екземплиар рҟынӡа инаӡоит.

Аҟәа. Абҵарамза 7, 2023 шықәса. Аԥсныпресс. 2023 шықәса жәымз рыла Аԥсны иахьаҵанакуа абанктә хсаалагақәа зку рыла имҩаԥгаз атранзакциақәа реицҵалыҵ  26,3 млрд. мааҭ рҟынӡа инаӡеит, ҳәа адырра ҟаҵоуп Аԥсны Абанк аофициалтә саит аҟны. 2022 шықәса аиԥш-зеиԥшу аамҭахәҭа иаҿырԥшны уахәаԥшуазар, имҩаԥгаз аоперациақәа рзеиԥш еицҵалыҵ   16% (3,6 млрд) рыла еизҳаит.

Зынӡа ахсаалагақәа «АԤРА» ала имҩаԥгаз атранзакциақәа 38,4% рҟынӡа инаӡоит, ашәаратә система «МИР» ахсаалагақәа рыла – 33,5%, жәларбжьаратәи ашәаратә системақәа рыхсаалагақәа рыла – 28,1%.

Урыстәылатәи абанктә хсаалагақәа рыла Амилаҭтә шәаратә Система «АԤРА» аҿы имҩаԥгаз аоперациақәа рымҽхак 2023 шықәса жәымз ирылагӡаны  22,6% (3,0 млрд. мааҭ) рыла иазҳаит. Уи 16,1 млрд. мааҭ рҟынӡа инаӡеит.  Убри аан «МИР» ахсаалагақәа рыла ашықәс алагамҭа инаркны имҩаԥгаз аоперациақәа 8,8 млрд. мааҭ рҟынӡа инаӡоит, уи  74,8% (3,8 млрд. мааҭ) рыла 2022 шықәсатәи арбагақәа раасҭа еиҳахеит.

2023 шықәса жәымз ирылагӡаны Аԥсны абанктә хсаалагақәа рыла атуарқәеи амаҵзурақәеи рыхәԥсақәа ршәара 9,9 млрд. мааҭ рҟынӡа инаӡеит. Уи 125% рыла иҳаҩсыз ашықәс азы арбага аасҭа еиҳауп. (4.4 млрд. мааҭ).

Аҟәа. Абҵарамза 7, 2023 шықәса. Аԥсныпресс.  Аԥсны акультура аминистр инапынҵақәа назыгӡо Динара Смыр напхгара зылҭо аԥснытәи аделегациа абҵарамза 16-18, 2023 шықәса рзы Санкт-Петербург ақалақь аҿы имҩаԥысуа IX Жәларбжьаратәи акультуратә форум аусура ахы аланархәуеит.

Акультура Аминистрра апресс-маҵзура иҟанаҵо адыррақәа рыла, аԥснытәи аделегациа аилазаара иалалеит С.Ҷанба ихьӡ зху Аԥснытәи аҳәынҭқарратә драматә театр адиректор Алхас Ҷолокуа, Ф.Искандер ихьӡ зху Аурыс драматә театр адиректор Хада Иракли Хьынҭәба, А. Чычба ихьӡ зху Аҟәатәи аҳәынҭқарратә музыкатә ҵараиурҭа адиректор Нинель Бжьаниа, Ареспублика Аԥсны Аҳәынҭқарратә камератә оркестр асахьаркыратә напхгаҩы, адерижиор Давид Терзиан, жәларбжьаратәи аусеицуреи амассатә информациа ахархәагақәа рымадареи рзы акультура Аминистрра аҟәша анапхгаҩы Сариа Маршьан.

2023 шықәсазы Афорум ҩаԥхьа азанааҭтә еилазаара — акультура аусзуҩцәа, атәылеи адунеи рҿы иҟоу акультуратә еиҿкаара дуқәа рнапхгаҩцәа, зыхьӡ нагоу аекспертцәа, иара убас абизнеис-еилазаареи аҳәынҭқарратә мчра аусбарҭақәеи рхаҭарнакцәа.