Аекспедициа активла рхы аладырхәуеит аҩ-ҵараиурҭак рҟынтәи арҵаҩцәа, астудентцәа- аволонтиорцәа, амагистрантцеи аспирантцәеи, иара убас Аԥсны анаукақәа Ракадемиа аекологиа Аинститут аусзуҩцәа.

Иҳаҩсыз ашықәс азы аиԥш-зеиԥшу аекспедициа мҩаԥысуан Пицундатәи ақәацәреи Мысратәи аҳаракыреи рҵакыраҿы.  Уажәы аҭҵаарақәа мҩаԥысуеит Аҟәа ақалақь иахьаҵанакуа, иара убас атәыла мрагыларатәи араионқәа рҿы.

«Иарбоу експедициа ихадоу анаукатә хықәкны иҟоуп  – амшынтә ҟәарақәа рдинамика аҭҵаара, ақәыӡәӡәаара атемпқәа ахәшьара рыҭара, иҳаҩсыз ашықәс азы имҩаԥгаз агеодезиатә усурақәеи сынтәа имҩаԥгаз аусурақәеи рылҵшәақәа реиҿырԥшра, Аԥсны мрагыларатәи ахәҭа иахьаҵанакуа аҟәара аморфологиа аҭҵаара»,  – ҳәа иазгәалҭеит аекспедициа анапхгаҩы, агеографиатә наукақәа ркандидат, адоцент Екатерина Ериоменко.

ААУ актәи апроректор, абиологиатә наукақәа ркандидат, Аԥсны Анаукақәа Ракадемиа аекологи Аинститут адиректор Роман Дбар ААУ  абазаҿы иҟоу  Москватәи Аҳәынҭқарратә Университет анаукеи аҵарадырреи Рцентр аусура аҵакы ахадарара инаҵшьны иазгәеиҭеит. Уи иабзоураны  иицымҩаԥгахоит анаукатәи анаука-ҵарадырратәи аусмҩаԥгатәқәа жәпакы, ҳәа иазгәеиҭеит иара.

«Аԥсны амшынтә тәылоуп, уи аԥшаҳәа 200 км. инареиҳаны амҽханакуеит. Аӡцара азеимш мҽхакы – ԥшьнызқьи бжаки рҟынӡа инаӡоит.  Арҭ адинамикатә процессқәа зегьы, жәаҳәарада, анхамҩатә усура анырра анаҭоит… Ҳара ҳколлегацәа ҳаамҭазтәи анаукатә ҭҵааратә методқәа рхы иадырхәоит, уи ҳаспециалистцәа рзы еиԥш ҳастудентцәагьы рзы даара хра злоу акакәны иҟоуп», – ҳәа еиҭеиҳәеит Роман Дбар.

Аҵарауаа ражәақәа рыла, имҩаԥгаз аусурақәа рылҵшәақәа акыр анаукатәи ахархәаратәи аҵак ду амоуп.

Зынӡа аекспедициа рхы аладырхәуеит 60-ҩык инарзынаԥшуа ауаа.