Аҟәа.  Ԥхынгәымза 28, 2024 шықәса. Аԥсныпресс. Аԥснытәи Аиашахаҵаратә Уахәама ахада аиереи Виссарион (Аԥлиаа) Ауахәаматә Хеилак аилатәара аҿы ҩаԥхьа Аԥснытәи Аиашахаҵаратә Уахәама азинтә шьаҭа аганахьала агәҭынчымра ааирԥшит. Аилатәара аартуа иара Аԥсны аканонтә дгылара азхом ҳәа инаҵшьны иазгәеиҭеит.

«Шәааи ааԥхьарак ҟаҳҵап ҳнапхгаҩцәа рҟынӡа инеиуа, аиашахаҵаратә дин ныҟәызго зегьы рҟынӡа инеиуа … Уи ҟаҳамҵар, аиашахаҵаратә дин ныҟәызго ҳажәлар хра злам аҭаглазаашьа роур ҟалоит», - ҳәа адинмаҵзуҩцәа рахь ихы рханы иҳәеит Аиашахаҵаратә Уахәама ахада.

Аигумен Игнати (Киут) – Каман ақыҭан игылоу аԥшьаҩыцқьа Иоанн Ахьҿы ихьӡ зху аберҭыԥ аиҳабы – Аԥсны Аиашахаҵаратә Уахәамеи Урыстәыла Аиашахаҵаратә Уахәамеи аимадара ӷәӷәа рыбжьоуп ҳәа инаҵшьны иазгәеиҭеит.

«Ҳара аԥшьаҩцәас ҳҟалон, доуҳала ҳазҳауан аурыс уахәама аҿы», - ҳәа инаҵшьны иазгәеиҭеит аигумен Игнати.

Аҟәа. Ԥхынгәымза 28, 2024 шықәса. Аԥсныпресс. Иахьа лиубилеи азгәалҭоит Ареспублика Аԥсны Зҽаԥсазтәыз ажурналист,   Аԥсны ажурналистцәа Реидгылеи ажурналисттә Еидгыларақәа Жәларбжьаратәи аконфедерациеи   рлахәыла Заира Иасон-иԥҳа Ҵәыџьба.

Заира Иасон-иԥҳа Ҵәыџьба диит ԥхынгәымза 28, 1949 шықәса рзы. Лара далгеит Ҟазантәи аҳәынҭқарратә Университет ажурналистика афакультет.  

1968 – 1971шш. ақ. Ҟазань иҭыҵуаз агазеҭ  «Советская Татария» аҿы, 1973 - 1980 шш. – Гәдоуҭатәи араионтә газеҭ «Бзыԥ» аҿы аус луан.

1980 шықәса инаркны 1987 шықәсанӡа  – агазеҭ «Советская Абхазия» Гәдоуҭеи Гагреи араионқәа рҿы ахатәы корреспондентс аус луан, 1987 шықәса инаркны 1991 шықәсанӡа – ари агазеҭ алитературеи аҟазареи рыҟәша аиҳабыс аус луан.

1991 шықәса инаркны иахьа уажәраанӡа аус луеит агазеҭ «Республика Абхазия» аҿы. Лара агазеҭ аҳәаанырцәтәии аҩныҵҟатәи аинформациеи  рыҟәша аиҳабысгьы агазеҭ апарламенттә коррепондентсгьы дыҟоуп.

1992-1993 шш. Аԥсны жәлар Рџьынџьтәылатәи еибашьра аан Заира Ҵәыџьба аибашьратә хҭысқәа ирызкны аматериалқәа лыҩуан, амацәаз иҭакыз Ҭҟарчал ақалақь ахь дцаны аҭыԥ аҿы аинформациа еизылгон.

Ԥхынҷкәынмза, 2001 шықәса инаркны нанҳәамза, 2003 шықәсанӡа Заира Ҵәыџьба  Аԥсны аминистрцәа Реилазаара аҿы аԥыза-министр ипресс-маӡаныҟәгаҩыс, амассатә информациа ахархәагақәа рзы ареферентс аус луан.  

Заира Иасон-иԥҳа лзанааҭдырра аҩаӡара ҳараки лнапы злаку ажурналисттә усура  абзиабареи ҭакԥхықәрала азнеиреи рыла далыркаауеит. Лара лнапы иҵыҵхьоу агазеҭтә публикациақәа тематикала реиԥшымзаара азгәоумҭар залшаӡом – акультура, ақыҭанхамҩа, аекономика, атәыла аҩныҵҟатәии адәныҟатәи аполитика, аибашьреи аҭынчреи,атәыла ашәарҭадареи рызҵаарақәа.

Аҟәа. Ԥхынгәымза 26, 2024 шықәса. Аԥсныпресс. Ахәаша, ԥхынгәымза 26 рзы, С. Иа. Ҷанба ихьӡ зху Аԥсуа драматә театр ахыбраҿы Аԥсны Жәлар Реизара адепутатцәеи ауаажәларреи злахәыз аилатәара мҩаԥысит. Уи ареспублика аҿы аҵыхтәантәи аамҭазы ишьақәгылаз ауаажәларра политикатә ҭагылазаашьа иазкын.

Аизара рхы аладырхәит Аԥсны жәлар Рџьынџьтәылатәи еибашьра аветеранцәа, Абыргцәа Рхеилак алахәылацәа, еиуеиԥшым аполитикатәи ауаажәларратә еиҿкаарақәа рхаҭарнакцәа.

Аизара аҿы иқәгылеит Аԥсны абыргца Рхеилак ахантәаҩы Апполон Думаа, Аԥсны Жәлар рартист Кьасоу Ҳагба, Аԥсны аинтеллигенциа Рассоциациа анапхгаҩы Нодар Ҷанба, акультура зҽаԥсазтәыз аусзуҩ, ААУ аҟазара афакултет адекан Ныгәзар Логәуа,  аҭоурыхтә наукақәа ркандидат Гәырам Гәымба, Жәлар Реизара-Апарламент адепутат Кан Кәарҷиа, ауаажәларратә еиҿкаара «Аԥсуа жәлар реиҿкаара» анапхгаҩы Адгәыр Арӡынба,  Аԥсны Афырхацәа Леуан Миқаиеи Вианор Аршбеи.

Еизаз ԥхынгәымза 25 рзы Жәлар Реизара-Апарламент Аиҳабы «Очамчыра, Тҟәарчал, Гал араионқәа рсоциал-економикатә ҿиара аҩаӡара ашьҭыхраз ауснагӡатәқәа рзы» азакәан апроект архынҳәразы инапы зҵеиҩыз аусшәҟәы иалацәажәеит.

Аҟәа. Ԥхынгәымза 27, 2024 шықәса. Аԥсныпресс. Амҵәышәмпыл 3х3 азы ахәбатәи аиубилеитә Ахраҿагара мҩаԥысит Пицунда ақалақь аҿы.

Сынтәа Ахраҿагара С.У.Багаԥшь диижьҭеи 75-шықәса аҵреи Аԥснытәи амҵәышәымпыл 100-шықәса ахыҵреи иазкуп.

Аицлабрақәа рхы аладырхәит арԥарцәеи аҭыԥҳацәеи ркомандақәа.

Аҟәа. Ԥхынгәымза  27, 2024 шықәса. Аԥсныпресс. Аҟәа ақалақь аҿы имҩаԥысит аӡсаҩцәа реицлабрақәа «Ареспублика Аԥсны Ахраҿа агара». Урҭ рхы аладырхәит Аԥсны ақалақьқәеи араионқәеи рҟынтәи 60-ҩык инарзынаԥшуа аспортсменцәа. 

Аицлабрақәа мҩаԥысуан 7-8, 9-10, 11-12, 13-14, 15-16 шықәса зхыҵуаз аспортсменцәа рыбжьара. Аспортсменцәа 25 метра инаркны 200 метра рҟынӡа иӡысыр акәын. Дара адистанциа брасс, баттерфлиаи, бӷала, зхы иақәиҭу, уҳәа астильқәа рыла иахысуан.

Аиааирақәа ргеит:  Ирена Бебиа, Василиса Егупова (актәи аҭыԥқәа хԥа), Иван Шалин (актәи аҭыԥқәа хԥа), Нарсоу Ладариа (актәи аҭыԥқәа хԥа), Драгомир Журавлиов, Мира Кишмариа (актәи аҭыԥқәа ҩба), Изабелла Иванова, Наала Џьопуа (актәи аҭыԥқәа ҩба), Даниил Егупов (актәи аҭыԥқәа хԥа), Уасхит Гәажәба (актәи аҭыԥқәа хԥа), Кристина Геркен, Дариа Шалина (актәи аҭыԥқәа ҩба), Никита Головиатенко (актәи аҭыԥқәа хԥа), Алеқсандр Кравец, Даниела Кашковскаиа, Нестор Жьиба, Софиа Жьиба (актәи аҭыԥқәа ҩба), Иури Степанов. 

Аҟәа. Ԥхынгәымза 26, 2024 шықәса. Аԥсныпресс.  Аԥсны Аҳәынҭқарра Ахада Аслан Бжьаниа Феридун Аҟәысба (Аксои) иԥсҭазаара дахьалҵыз инамаданы адышшылара ҟаиҵеит. 

«Гәалсра дула иҳадаҳкылеит Ҭырқәтәыла иҟоу аԥснытәи акультуратә центрқәа Рфедерациа аиҳабы Феридуп Аҟәысба иԥсҭазаара далҵит ҳәа иҳауз ажәабжь хьанҭа.  

Феридун Аҟәысба иԥсадгьыл ԥхьаҟатәи аԥеиԥши алахьынҵеи хәыцырҭас иман. Иара Ҭырқәтәыла иҟоу аԥсуа диаспореи Аԥсни рыбжьара аимадара арӷәӷәара азы иҟаиҵаз даараӡа ирацәоуп.  Иара амҳаџьыраа рхылҵышьҭрақәа рҭоурыхтә Ԥсадгьыл ахь рырхынҳәра азы мҽхакы ҭбаала аусура мҩаԥигон.

Аҟәа. Ԥхынҷкәнмза 26, 2024 шықәса. Аԥсныпресс. Дмитри Кәычбериа Аԥсны Аҳәынҭқарратә шәарҭадара амаҵзура ахантәаҩы инапынҵақәа рынагӡаҩыс дҟаҵоуп.  

Уи азы Аусԥҟа инапы аҵаиҩит Аҳәынҭқарра Ахада Аслан Бжьаниа.

Уиаанӡа Дмитри Кәычбериа Аԥсны Аҳәынҭқарратә шәарҭадара амаҵзура ахантәаҩы ихаҭыԥуаҩыс дыҟан.

Аҟәа. Ԥхынгәымза 26, 2024 шықәса. Аԥсныпресс. Темыр Ахьиба Ашәарҭадара Ахеилак амаӡаныҟәгаҩ ихаҭыԥуаҩыс дҟаҵоуп.

Уи азы Аусԥҟа инапы аҵаиҩит Аԥсны Аҳәынҭқарра Ахада Аслан Бжьаниа.

«Ахьиба Ҭемыр Иосиф-иԥа Аԥсны Аҳәынҭқарра Ашәарҭадара Ахеилак амаӡаныҟәгаҩ ихаҭыԥуаҩыс даҭазааит», - ҳәа иаҳәоит адҵа.

Ахада Иусԥҟала Ҭемыр Ахьиба «аинрал-маиор» ҳәа изаамҭанытәиу ахьӡ ихҵоуп.

Аҟәа. Ԥхынгәымза 26, 2024 шықәса. Аԥсныпресс. Гәылрыԥшь араион Ахадара  акоммуналтә техника аиҳарк арҿыцит, иара убас ҳаамҭа иақәшәо аиқәыршәагақәа рыла еиқәыршәоу агараж ҿыц аргылара иалагеит. 2023 – 2024 шш. рзы иаахәан  8 цыра иҷыдоу атехника, уи акоммуналтә  маҵзурақәа русура аеффективра  акыр ишьҭнахит.

Ҿыц иаархәаз рахь иаҵанакуеит - ассенизатортә машьына, уи амуниципалтә обиектқәа рҿы ахархәара адагьы хазхаҭалатәи ахаҿқәа қьырала ирыҭахалоит. Иаахәоуп иара убас аканализациа аҭрыцқьаара иазку агидродинамикатә шьақәгылага, ҩ-тракторк «Беларусь», ақәҵага- аекскаватори еиуеиԥшым акоммуналтә усурақәа рзы ақәҵага-маҷи. «Иҳамоу атехника маҷӡам, аха инацҵаны даҽа техника хкқәак раахәара азԥхьагәаҭаны иҳамоуп. Ҷыдала актуалра аҵоуп уажәы аӡиасқәа рӡышьҭрақәа ррыцқьара аҿы акыр ихәарҭахо идуу аихеихаԥсатә ескалатор», – ҳәа адырра ҟарҵеит араион Ахадара аҿы.

Аҟәа. Ԥхынгәымза 26, 2024 шықәса. Аԥсныпресс. Аԥсны Аӡбарҭа анагӡаҩцәа Рмаҵзура 2024 шықәса актәи азыбжа азы аусура аихшьаалақәа рыҟаҵара иазкын аиустициа аминистр ихаҭыԥуаҩ Руслан Лагәлаа ихантәаҩрала имҩаԥысыз аилатәара, ҳәа адырра ҟанаҵоит аиустициа Аминистрра апресс-маҵзура.     

Убас, арҭ амзақәа ирылагӡаны аӡбаратә анагӡаҩцәа ауалқәа дыршәара иазкны  инарыгӡаз аусура иалҵшәаны 257, 509 693  млн. мааҭ зыртәоз 841 ус хыркәшан. Фактла фымз рыла 111, 696 014 млн мааҭ рылгоуп.

2023 шықәса актәи азыбжа иаҿырԥшны уахәаԥшуазар, аизҳара 12 364 853 мааҭ рҟынӡа инаӡеит.  

2024 шықәса фымз рыҩныҵҟа ирылгаз, анаҩс аҳәынҭқарратә биуџьет ахь ахыԥхьаӡалара иазку  аԥаратә хархәагақәа рзеиԥш еицҵалыҵ 73 869 162 мааҭ рҟынӡа инаӡоит. Уи иҳаҩсыз ашықәс аиԥш-зеиԥшу аамҭахәҭа азы абиуџьет иалагалаз аицҵалыҵ аасҭа акыр еиҳауп.

2024 шықәса аҳасабырбатә аамҭахәҭа азы  аиуристтә хаҿқәеи хазхаҭалатәи ахаҿқәеи рзы иалгаз аԥаратә хархәагақәа реицҵалыҵ 37 826 852 рҟынӡа инаӡоит,  уи 12 034 214 мааҭ рыла еиҳауп иҳаҩсыз ашықәс арбагақәа раасҭа.