1933 шықәсазы атехникум аҿы аусура иалагеит асимфониатә оркестр, аҳәынҭқарратә квартет, жәлар ринструментқәа роркестр. 2002 шықәсазы еицырдыруа аԥсуа композитор Алықьса Чычба ихьӡ ахырҵеит.

Иахьа араҟа аус руеит: афортепиано, ахыцтә инструментқәа, жәлар ринструментқәа, авокал, ахортә дирижиорра, амузыка атеориа, жәлар рхортә ҟазара, аестрада рыҟәшақәа.

Аԥсны зҽаԥсазтәыз акультура аусзуҩ, амузыкадырҩы  Асида Царгәыш Facebook аҿы лдаҟьа аҿы ишазгәалҭаз ала, ас еиԥш аформат змоу аусмҩаԥгатә амузыкадырратә еилазаара аҿы иҟаз акадртә дефицит инамаданы  Аԥсны акыр шықәса ҵуеит имҩаԥымсиижьҭеи:

«Насыԥны, аҵыхәтәантәи ашықәсқәа рзы, ҳаилазаара иалалеит аԥсуа музыка аҭҵааҩцәа ҿарацәа, уи ҳара ас еиԥш иҟоу аконференциа амҩаԥгаразы алшара ҳанаҭеит».

Асида Царгәыш лажәа иацҵо, иарбоу аусмҩаԥгатә хәҩык  аспикерцәа рхы аладырхәит ҳәа иазгәалҭеит. Урҭ еиҭарҳәеит аиубилиар ирҿиаратә усура еиуеиԥшым ганрацәалатәи аспектқәа ртәы. Амузыкадырҩы, амузыкатә теориа амаҭәарқәа рырҵаҩы Таисиа Пигуль акомпозитор иуадаҩу иԥсҭазааратәи ирҿиаратәи мҩа атәы еиҭалҳәеит. Аԥсны зҽаԥсазтәыз артистка, амузыкадырҩы Есма Џьениа ХХ  ашәышықәса  50-70-тәи ашықәсқәа рзы аепохеи Аԥсны акультуратә ҿиара аҷыдарақәеи ранализ аҳасабала аиубилиар ипортрет аалырԥшит.  Атәылахьчара Аминистрра аԥсыԥтә оркестр адирижиор, ареспублика Аҳәынҭқарратә камертә оркестр адирижиор иассистент, Аҟәатәи амузыкатә ҵараиурҭа амузыкатә теориа амаҭәарқәа рырҵаҩы Адам Ҳагба акомпозитор исимфониатә ҟазара атәы еиҭеиҳәеит.

Аконференциа ахыркәшамҭаз аҵараиурҭа атеориатә ҟәша аҩбатәи акурс астудентка Мариа Иамакова Алықьса Чычба икантата «Аԥсны» аилыргара ҟалҵеит.

«Аконференциа анаукатә ҟазшьа мацара акәымкәа арҿиаратә цәаҩа аиура азы аспикерцәа ражәахәқәеи акомпозитор иаԥҵамҭақәа рыла ишьақәгылаз аконцерттә қәгыларақәеи рыбжьара иқәгылеит Аҳәынҭқарратә хортә капелла (адирижиор Барас Куџба), ахәыҷтәы ахыцтә инструментқәа рансамбль (апедагог Ирина Окуджава), Аҟәатәи амузыкатә ҵараиурҭа аҩбатәи акурс астудентка Елизавета Хьышба (жәлар рартистка Манана Шамба лакадемиатә вокал акласс) аконцертмеистер Ева Магдесиан длыцны.

Аҵыхәтәан, аҵараиурҭа аконцерттә зал аҿаԥхьа афоие аҿы имҩаԥысит амузыкантә иҭаацәа аҵараиурҭа ҳамҭас иарҭаз акомпозитор ибиуст аартра ацеремониа. Абиуст аскульптор қәыԥш, Аҟәатәи асахьаҭыхратә ҵараиурҭа аушьҭымҭа, еицырдыруа аԥсуа скульптор Амиран Адлеиба иҵаҩы  Ҭемыр  Аҳәба иҟаҵамҭоуп.

«Иазгәасымҭар ауам аскульптор зеиӷьаҟам иусура аҩаӡара. Уи, сара сгәаанагарала, иналукааша ҳџьынџьуаҩ адәахьалатәи иеиԥшзаара анаҩс, даараӡа ибзианы иаанарԥшуеит уи илаз аинергиа, иҟазшьа, ихаризма», - ҳәа лпубликациа аҿы инаҵшьны иазгәалҭеит Асида Царгәыш.