Аԥсны ахьӡала аконгресс аусура ихы алаирхәуеит И.Г. Папасқьыр ихьӡ зху Амилаҭтә библиотека адиректор Борис Ҷолариа.
Ари аконгресс абиблиотекатә ус азҟазацәа рзы ашықәсан акыр зҵазкуа хҭысны иҟоу, абиблиотекақәа, анапхгаратә усбарҭақәеи апартниорцәеи рыбжьара аимадара ашьақәыргылареи арӷәӷәареи алзыршо платформаны иҟоу усмҩаԥгатәуп. Ари аусмҩаԥгатә иарбоу аусхкы аҿы иреиӷьу аԥышәақәа рыла аимадара иацхраауеит.
Аконгресс аҳәаақәа ирҭагӡаны иара убас иазԥхьагәаҭоуп Урыстәылеи ИАР рмилаҭтә библиотекақәа Рсаммити Урыстәыла-Индиатәи абиблиотекатә диалоги.
Борис Ҷолариа аконгресс иалахәхара Амилаҭтә библиотека абиблиотекатә ус амилаҭтә еиԥш, жәларбжьаратәи аҩаӡара аҿы аҿиара азы инанагӡо акыр зҵазкуа ароль аанарԥшуеит, ҳәа аҳәамҭа ҟарҵеит Аԥсны акультура Аминистрра аҿы.
