Аҟәа. Абҵарамза 10, 2022 шықәса. Аԥсныпресс.  Аҳәынҭқарра Ахада Аслан Бжьаниа иахьа атәыла ауажәларра рҿаԥхьа атәыла Ахадас иҟазаара аамҭа иҭагӡаны имҩаԥгаз  аусура азы аҳасабырба ҟаҵо, «акоронавирустә ҿкы чымазара иақәҳарџьыр акәхеит абазатә инфраструктура ахь алагалақәа ираҟароу аԥаратә хархәагақәа реицҵалыҵ», ҳәа иазгәеиҭеит.

Аслан Бжьаниа иарбоу аԥаратә хархәагақәа рныхра ахырхарҭас иаиуз инарҭбааны еиҭеиҳәеит.  Убас, амедицинатә усзуҩцәа руалафхәы ацҵа ахь ахарџь 281,3 млн. мааҭ рҟынӡа инаӡеит.

Аковидтә хәышәтәырҭа Хада афункциақәа назыгӡоз Гәдоуҭатәи араионтә хәышәтәырҭа Хада аусура аиҿкааразы идәықәҵан 102,1 млн. мааҭ.  Уахь  иаҵанакуеит акомпиутертә томографиа азы ахыбра аҿакы аҭара, апациентцәа рыкрыфара аиҿкаара, апациентцәа цәарҭамаҭәала реиқәыршәара, арентгентә аппарат азы аиқәыршәагақәеи амедицинатә ҵыҵәри раахәара, абиотехникатә маҵзурақәа рымҩаԥгара, адизельтә генератори егьырҭ аиқәыршәагақәеи раахәара, уҳәа убас ирацәаны.

Амедицинатә еиқәыршәагақәа, ахәшәқәеи аныхтә маҳәахәқәеи раахәаразы зынӡа иазоужьхеит 503,9 млн. мааҭ.

Аҵараиурҭақәеи егьырҭ асоциалтә инфраструктура иаҵанакуа аобиектқәеи рҿы излауа ала аасанитар-епидемиологиатә шәарҭадара алыршара азы аҳауа азҩыдатәра иазку аппаратқәа: аҳау азҩыдатәра иазку аультра-дәыкрынԥшратә шәахәаркыга-рециркулиаторқәа  раахәара мҩаԥган. Уи иақәхарџьхеит  3,45 млн. мааҭ, 30 аҵәыҵәритә еизакыгақәеи арыԥҳақәа рыҩныҵҟа аҳауеиҭарсразы аппаратқәеи (ИВЛ) раахәаразы иныхыз аԥаратә хархәагақәа рзеиԥш еицҵалыҵ 23,3 млн. мааҭ иреиҳахеит.  

Аҟәа. Абҵарамза 10, 2022 шықәса. Аԥсныпресс. Аҳәынҭқарра Ахада Аслан Бжьаниа аҩныҵҟатәи аусқәа Рминистрра аусбарҭақәа аусзуҩцәеи аветеранцәеи рзанааҭтә ныҳәа – амилициа Амш рыдиныҳәалеит.

«Амилициа Амш – ари зыԥсҭазаара зегьы зыԥсадгьыли зыуаажәлари азакәани рыхьчара иазызкыз ауаа рныҳәа ауп.  Аԥсны амилициа аҭоурых абар шьҭа шәышықәса ирхысит, арҭ ашықәсқәа ирылагӡаны аҩныҵҟатәи аусқәа Рминистрра аусбарҭақәа русзуҩцәа рыжәлари Рыԥсадгьыли рыхьчара аус гәыкала ишазнеиуа изныкымкәа ишьақәдырӷәӷәахьан. Абџьар кны ҳхақәиҭреи ҳхьыԥшымреи рыхьчон, ҳауаажәлар рҭыч бзазара алыршара азы ацәгьоура иаҿагыланы иқәԥон.

Иахьа аҩныҵҟатәи аусқәа Рминистрра, уи аҟәшеиҵақәеи аструктурақәеи, азакәанреи азинлеишәеи рыхьчара иазку хадара злоу аҳәынҭқарратә институтны иҟоуп. Акриминал, акоррупциа аҿагылара, ауааԥсыра рзинқәеи рхақәиҭреи, иара убас рмазареи рыхьчареи ҳаԥсҭазаара аусхкқәа зегьы рҿы азакәан аԥыжәара ашьақәырӷәӷәареи рганахьала  шәара инашәыгӡо аусура арбагақәа зеиӷьаҟам ала иаадырԥшуеит шәзанаааҭдырра аҩаӡара ҳаракы. Аҳәара ҟасҵоит аринахысгьы ареспубликеи уи ауааԥсыреи ринтересқәа рыхьчара иазку аусура хьаҳәхьачарада инашәыгӡаларц. Аҳәынҭқарраҿы шәара шәмаҵуратә уалԥшьа анагӡараан иаашәырԥшуа ахамеигӡара акар аҳаҭыр рзақәуп, аха акырӡагьы аҵанакуеит аҩныҵҟатәи аусқәа Рминистрра аусбарҭақәа русура ҳаамҭазтәи ахыдҵақәеи аҭаххрақәеи ирықәшәо аҟаҵара.  

Аҟәа. Абҵарамза 10, 2022 шықәса. Аԥсныпресс. Аԥсны Жәлар Реизара - Апарламент Аиҳабы Лаша Ашәба Апарламент ахьӡала Аԥсны Аҳәынҭқарра Аҩныҵҟатәи аусқәа Рминистрра асистема аусзуҩцәа Амилициа амш рыдиныҳәалеит.

Адныҳәалараҟны иҳәоуп:

«Ҳаҭыр зқәу Вальтер Сергеи-иԥа!

Шәаргьы, Аԥсны Аҳәынҭқарра аҩныҵҟатәи аусқәа Рминистрра асистема аусзуҩцәа зегьи аветеранцәеи ишәыдаҳныҳәалоит шәзанааҭтә ныҳәа!

Аԥсуа милициа аветеранцәа иаԥырҵаз аҵас бзиақәа рықәныҟәарала, ҳаамҭазтәи ашәарҭарақәа ҳасаб рзуны, аҩныҵҟатәи аусқәа Рминистрра аппарат хада аколлективқәеи Аԥсны Аҳәынҭқарра ақалақьқәеи араионқәеи русбарҭақәеи рнапы алакуп иуадаҩу, аҭакԥхықәра зцу ауснагӡатәқәа рыӡбара.

Аҟәа. Абҵарамза 10, 2022 шықәса. Аԥсныпресс. Аҳәынҭқарреи ауаажәларреи иҭышәынтәалоу рыԥҭсҭазаара иашьаҭаны иҟоуп – амҩақәа, афымцамчмҩангагақәа, ӡыла аиқәыршәара, уҳәа егьырҭ акоммуникациақәа, ҳәа ҩы-шықәсеи бжаки рыла, атәыла Ахадас иҟазаара аамҭа иҭагӡаны имҩаԥгаз аусура азы аҳасабырба ҟаҵо иҳәеит Аҳәынҭқарра Ахада Аслан Бжьаниа.

Аҳасабырбатә аамҭа азы Аԥсны ақалақьқәеи араионқәеи рҿы амҩатә инфраструктура аиӷьтәра азы иҟаҵоу маҷӡам.

Еиҭашьақәыргылоуп 106 километр рҟынӡа амҩақәа, ацҳақәа 6, адгьылҳәазара аганахьала  акыр ашәарҭара зцу  аучасткақәа 5 аҵаргәатә ҭыӡқәа рыла ишьақәыргылоуп. Иарбоу ахықәкқәа рынагӡара иақәхарџьхеит  240 млн. мааҭ.  

Аҵыхәтәантәи ашықәсқәа рзы, амҩақәа реиҭашьақәыргылара иалагаанӡа аӡымҩангагатә, аӡҩаршьҭратә, уҳәа уи иадҳәалоу аинфраструктура ишахәҭоу ала аус ауа аҟаҵаразы аусмҩаԥгатәқәа мҩаԥыргон, анаҩс ауп амҩақәа реиҭашьақәыргылара ианалагоз, ахәҭакахьала акаҭран анышьҭарҵоз.  «Ас еиԥш аус азнеишьа ахәшьара арҭахьеит Аҟәа аԥшаҳәа иаԥну аҭыԥқәа рҿы инхо ауааԥсыра. Урҭ аибашьрашьҭахьтәи ашықәсқәа зегьы рзы ақәоурақәеи ақәыршыҩи раан акыр ауадаҩрақәа ирықәшәон, ҳазҭоу ашықәс азы уи аҩыза ауадаҩрақәа рызцәырымҵӡеит, избан акәзар еизо ацәықәбар зегьы ишахәҭоу ала аӡҩаршьҭрақәа рыла ицоит», - ҳәа иҳәеит Аҳәынҭқарра Ахада.

Аҟәа. Абҵарамза 10, 2022 шықәса. Аԥсныпресс.  Аҳәынҭқарра Ахада Аслан Бжьаниа ҩы-шықәсеи бжаки рыла, атәыла Ахадас иҟазаара аамҭа иҭагӡаны имҩаԥгаз аусура азы аҳасабырба ҟаҵо дықәгылоит. Аҳәынҭқарра Ахада иҟаиҵаз аилыркаарақәа рыла, Урыстәылантәи афымцамч аашьҭра аанкылан иазԥхьагәаҭаз аҽҳәара 15 мшы шыбжьаз, убри иахҟьаны ацәаҳәа аҟны ианаамҭаз аиҭашьақәыргыларатә усурақәа рынагӡара залмыршахеит.

«Афымцамч аҿыхра  аграфик алагалара, ари зда ԥсыхәа ыҟам усуп» ,- ҳәа иҳәеит Аслан Бжьаниа. 

Аҳәынҭқарра Ахада атәыла Анапхгара ала  аҳәынҭқарра арратә шәарҭадара аизырҳара азы ихымԥадатәиу ауснагӡатәқәа зегьы мҩаԥнагоит ҳәа инаҵшьны иазгәеиҭеит. 

Аҟәа. Абҵарамза 10, 2022 шықәса. Аԥсныпресс. «Аԥсни Урыстәылеи реимабзиаратә еизыҟазаашьақәа рырӷәӷәара – еицакра змам, хьаҳәа-ԥаҳәарада имҩаԥысуа апроцесс ауп», - ҳәа ҩы-шықәсеи бжаки рыла, атәыла Ахадас иҟазаара аамҭа иҭагӡаны имҩаԥгаз  аусура азы аҳасабырба ҟаҵо иҳәеит Аҳәынҭқарра Ахада Аслан Бжьаниа. 

«Аԥсны Кавказтәи арегион аҿы аҭышәынтәалареи ашәарҭадареи рырӷәӷәара иадҳәалоу апроцесс аҿы хадара злоу обектны ишыҟац иаанхоит. Ҳара –  Урыстәыла адгылаҩцәа ҳауп, аринахысгьы аҩ-ҳәынҭқаррак рыжәларқәа рзы хра злоу аԥсны-урыстәылатәи аизыҟазаашьақәа рыҿиареи рырӷәӷәареи рзы иҳалшо зегьы ҟаҳҵалоит», - ҳәа иазгәеиҭеит Аҳәынҭқарра Ахада.

Уи иара убас атәыла иазаарту, азинқәа азхазҵо, аус ацуреи акыр аамҭа ирҭагӡоу, узықәгәыӷыртә иҟоу, иаарту аизыҟазаашьақәеи иазхиоу зегьы рзы иаартызароуп ҳәа иазгәеиҭеит.

Аҟәа. Абҵарамза 12, 2022 шықәса. Аԥсныпресс. Аԥсны Аҳәынҭқарра Ахада Аслан Бжьаниеи аҳәынҭқарратә шәарҭадара Ахеилак Амаӡаныҟәгаҩ Сергеи Шамбеи асабшаҽны, атәылахьчаратә ҵакы змоу аобиектқәа рҭаареи рыхәаԥшреи мҩаԥыргеит.

Аҳәынҭқарра Ахада Аслан Бжьаниа аҳәынҭқарратә шәарҭадара Ахеилак Амаӡаныҟәгаҩ Сергеи Шамба дицны, абҵарамза 7 рзы Аҳәынҭқарра Ахада Иусбарҭа аҿы имҩаԥгаз аҵыхәтәантәи аилатәара аҿы ирыдаркылаз аӡбамҭақәа рынагӡара инамаданы, атәылахьчаратә ҵакы змоу аобиектқәа ргәаҭара иазкны анҭыҵтәи аусмҩаԥгатә мҩаԥыргеит.

Аҟәа. Абҵарамза 11, 2022 шықәса. Аԥсныпресс. Аҟәатәи ахазхатәы школ «Алашара» аҿы есышықәса еиҿкаахо «Абзиара иазку ахәаахәҭратә цәыргақәаҵа" мҩаԥысит.

Ашкол ахыбра аҿаԥхьа, адәаҿы астолқәа дыргылеит, урҭ шәҭылеи иаҵәаралеи, иара убас еиуеиԥшым аԥшшәқәа змоу анкьапышҭақәеи  рыла идырхиеит. Астолқәа рҿы иқәдыргылеит еиуеиԥшым атәылақәа рмилаҭтә чыс хкқәа, уи аиҳарак ачалыхқәеи ахаачысқәеи ракәын. Амилаҭтә костиумқәа зшәыз ахәыҷқәа асасцәа ачысхкқәа ргьамақәа рбара ахь ааԥхьара рырҭон.

Еиуеиԥшым атәылақәа ирызкыз астолцыԥхьаӡа ааигәара ахәыҷқәа рнапала иҟаҵоу аплакатқәа, ус иуҳәар ауазар, атәыла атрадициатә фатәқәеи аҭыԥ ԥшӡарақәеи, иара убас аҳәынҭқарратә символикеи афотосахьақәеи зну аинформациатә банерқәа кнаҳан.

Аҟәа. Абҵарамза 11, 2022 шықәса. Аԥсныпресс. Аԥсны Аҵәахырҭатә Банк абҵарамза, 2022 шықәсазы Аԥсны инхо Урыстәылатәи Афедерациа атәылауаҩра змоу ауааԥсыра урыстәылатәи атәанчахәқәа рызшәаразы аграфик шьақәнарӷәӷәеит. Ианиз ашықәс инамаданы атәанчаҩцәа х-гәыԥкны еихшоуп. Атәанчаҩқәа ршәара иалагоит абҵарамза 16 инаркны.

• Абҵарамза 16, 17,18, 21 рзы атәанчахәқәа рыҭахоит 1-тәи агәыԥ иаҵа

Аҟәа. Абҵарамза 11, 2022 шықәса. Аԥсныпресс. Алашарабага аҳаблаҿы ақәаршҩытә ҭҳәаа ҿыц ашьҭаҵара иазкны имҩаԥысуа аусурақәа ахыркәшамҭахь инеит.

Аҟәа ақалақь, Алашарбага аҳабла, Адлеиба имҩаду ала ақәаршҩытә ҭҳәаа ҿыц ашьҭаҵара иазкны имҩаԥысуа аусурақәа ахыркәшамҭахь инеит.

Алашарбага аҳаблахь инагоу ари амҩа ахәҭа аҳҭнықалақь автомашьынарныҟәцаҩцәа даара ибзианы ирдыруеит. Араҟа ақәыршҩы анауаз есымша аӡы ықәлон, аиасргьы акыр иуадаҩхон. Уи зыхҟьоз араҟа иҟаз абетон иалхыз ақәаршҩытә ҭҳәаа афункциақәа рынагӡра ахьзалымшоз ауп.  Аколлектор аамҭа-аамҭала идрыцқьон, аха уи ала иҟоу апроблема инагӡаны аӡбара залыршахомызт. Уажәы аҳҭнықалақь Ахадара ажәытә коллектор апластик иалху аҿыц ала аԥсахразы алшарақәа аԥшааит.

«Адлеиба ихьӡ зху амҩа иарбоу ахәҭа аҿы, аӡиас Аӡаԥшь иху ацҳа азааигәара, Аҟәа ақалақь Ахадара иатәу Амҩатә аиҭашьақәыргылара-ргыларатә Усбарҭа Ахадара адҵа ала иҿыцу ақәаршҩытә ҭҳәаа ашьҭаҵара иазку аусурақәа мҩаԥнагоит. Ишьҭаҳҵоит апластик иалху зыгәҭаӡа 500 мм, зоура 50 м. иреиҳау ашәырақәа. Ари аҭыԥ аҿы ақәаурақәа рышьҭахь шамахамзар есымша аӡы ҭатәон, избан акәзар, иажәыз аӡҩаршьҭра абетон иалхын, уи  60 шықәса еиҳаны иахыҵуан, насгьы уи ааигәа-сигәа игылоу аҵлақәа рдацқәа рыла аԥхасҭа аиухьеит, урҭ иара аканал ахаҭа иҭыиааны аӡцара иаԥырхаган. Иарбоу ақәаршҩытә ҭҳәаа алгара ашьҭахь ари апроблема нагӡаны иӡбахоит», - ҳәа иҳәеит Аҟәа ақалақь Ахадара иатәу Амуниципалтә Унитартә Наплакы Амҩатә аиҭашьақәыргылара-ргыларатә Усбарҭа адиректор Дмитри Аҳәба.