Аҟәа. Рашәарамза 8, 2023 шықәса. Аԥсныпресс. Аԥыза-министр ихаҭыԥуаҩ Сергеи Пустовалов аҳәынҭқарратә хықәкытә программа «Анхарҭаҭыԥ 2023-2025 шш.» анагӡаразы Анапхгарабжьаратәи анагӡара-еиҿкааратә Комиссиа аилатәара мҩаԥигеит, ҳәа адырра ҟанаҵоит Аԥсны аминистрцәа Реилазаара апресс-маҵзура.
Акомиссиа анхарҭаҭыԥ аахәаразы афинанстә цхыраара аҭара азы Ареестр иалагалоу 10-ҩык атәылауаа рҟынтәи азыҳәамҭақәа рынагӡара иақәшаҳаҭхеит. Урҭ рахьынтә:
Аинвалид ма зхәыҷаахыс зхы иамыхәо ахәыҷы знапы дану аҭаацәа – азыҳәамҭақәа 7;
Хәҩык ма инареиҳаны ахәыҷы рацәа змоу аҭаацәарақәа – 1 азыҳәамҭа;
Аԥсны Аџьынџьтәылатәи еибашьра аҿы иҭахаз иҭаацәа – 1 азыҳәамҭа;
Зҭаацәа рҩыџьагь зцәыӡыз – 1азыҳәамҭа.
Ирыдыркылаз аӡбамҭақәа рынагӡаразы ахарџьқәа рзеиԥш еицҵадыҵ 9 млн 100 нызықь мааҭ рҟынӡа инаӡоит.
Акомиссиа аӡбамҭа ала 15-ҩык азыҳәамҭа алазҵаз Апрограмма алахәхаразы ашәҟәҭагалараҿы мап рыцәкын.
Анапхгарабжьаратәи анагӡара-еиҿкааратә Комиссиа аусура иацҵахоит.
