Аҟәа. Жәабранмза 10, 2023 шықәса. Аԥсныпресс.  Атуризм аминистр Ҭеимураз Хишба апарт-отельқәа рыргылара ҳәа иҟоу атуристтә усхкы аҿиара ахырхарҭа аперспективра алоуп, насгьы апарт-отельқәеи аппартаментқәеи рзинтә шьаҭа ашьақәыргылара азы анормативтә актқәа  хымԥадтәиуп ҳәа иазгәеиҭеит. Абри атәы иара Аҳәынҭқарра Ахада Аслан Бжьаниеи атәыла абизнес еилазаара ахаҭарнакцәеи реиԥылара аҿы иҳәеит.

Аминистр аҵыхәтәантәи ашықәсқәа рзы Аԥсны атуризм аҿиара амҽхак иааубаратәи иазҳаит ҳәа иазгәеиҭеит.

«Уажәы ареспублика аҿы аԥсшьаҩцәа раангыларазы  788 ҭыԥи  39 нызықь инареиҳаны ашьҭаларҭа ҭыԥи ыҟоуп. 2021 шықәсазы ҳара атуристцәа ррекордтә хыԥхьаӡара ҳадаҳкылеит –  миллионки бжаки инареиҳаны, 2022 шықәсазы ҳара иҳадаҳкылеит 1 млн. 145 нызықьҩык аԥсшьаҩцәа. Уи еиҳа имаҷуп, аха аԥхьа иргыланы лаҵарамзеи рашәарамзеи рзы иҟаз аԥсабаратә ҭагылазаашьақәа ирыдҳәалахеит.   Атуристтә усхкы аҿы аус руеит 30 нызықьҩык инареиҳаны ҳтәылауаа. Атуристтә усхҟы иҟан, иҟоуп, ааигәатәи аамҭазгьы акыр зҵазкуа усхкны, акыр зҵазкуа ҳауаажәлар рыԥсҭазаара иахәҭакны иҟалоит», –  ҳәа иҳәеит иара.

Аҟәа. Жәабранмза 10, 2023 шықәса. Аԥсныпресс. Аԥсны аԥыза-министр актәи ихаҭыԥуаҩ, ақыҭанхамҩа аминистр  Беслан Џьопуа аӡахәааӡара, ацитрус шәырқәа раарыхра, арԥхагатә нхамҩақәа рыҿиара, еиуеиԥшым ашәырқәа реиҭаҳара, уҳәа  аинвестициақәа ралагалара ахәҭаны иҟоу аперспектива злоу ақыҭанхамҩа ахырхаҭқәас иԥхьаӡоит.  Абри атәы Аслан Бжьаниеи абизнес еилазаара ахҭарнакцәеи реиԥылара аҿы дықәгыло иҳәеит иара.

Уи зыдҳәалоу атәыла аҿы ацитрустә шәырқәа рааӡара азы адгьылқәа рҟызаара ауп.

Аԥсны иааизакны ақыҭанхамҩа дгьылқәа  – 200  622 гектар рҟынӡа инаӡоит, урҭ рахьынтә 30 445 гектар  – ари еиуеиԥшым амзызқәа ирыхҟьаны акыраамҭа изқәымаарыхуаз дгьылқәоуп.

«6 нызықь гектар рҟынӡа акыраамҭа изқәымаарыхуаз адгьыл ацитрустә шәырқәа раарыхра азы ахархәара ҟалоит».  90-тәи ашықәсқәа рзы 11 гектар рҟанӡа адгьыл аҿы ацитрустә плантациақәа ыҟан.  Иахьа акәзар, уи 3 нызықь гектар рҟынӡа ауп  иахьынаӡо. Аҽаҩра бзиа аан азеиԥш еизга  55 тонн рҟынӡа инаӡоит, гектарк аҟынтәи 5 тоннак еиҳамкәа еизгахоит. Аибашьра ҟалаанӡа 120  нызықь тонн ацитрустә шәырқәа анеизыргоз еиԥш иҟаларц азы ихымԥадатәны иҟоуп даҽа   6 нызықь гектар адгьыл ахархәара», - ҳәа адырра ҟаиҵеит Беслан Џьопуа.

Ақыҭанхамҩа азы Аҭҵаарадырратә Институт адыррақәа рыла, гектарк аҿы ацитрустә шәырқәа реиҭаҳара  иартәоит  645 нызқьи 243 мааҭ, уи ахылаԥшра – 200 нызықь мааҭ.  

«Ҳара ҳинститут ааиҭаҳатәқәа рааӡарҭа аиҿкаара иазхиоуп. Урҭ 6-шықәса рыҩныҵҟа раԥхьатәи ашәыр рҿало иалагоит. Ари аҵан ҵлақәа рыхкы ауп. Аплантациақәа рышьақәыргылараан иҟаҵаз ахарџь ашәоит 9 шықәса рыла», - ҳәа иҳәеит Беслан Џьопуа.

Аҟәа. Жәабранмза 10, 2023 шықәса. Аԥсныпресс.  Ҭырқәтәыла иҟоу Аԥсны аҷыдалкаатә зинмчы змоу ахаҭарнак Ибрахим Аҩӡба Аԥсны адәныҟатәи аусқәа Рминистрра ахь иҟаиҵаз адыррақәа рыла, иҟалаз адгьылҵысра иахҟьаны ҩыџьа ҳџьынџьуаа ҭахеит.

«Аҵыхәтәантәи адыррақәа рыла уаҳа ҳџьынџьуаа рҟынтәи аӡәгьы дҭамхаӡеит, аӡәгьы ахәрақәа имоуӡеит», - ҳәа иҳәеит Ибрахим Аҩӡба.

Аҟәа. Жәабрамза 10, 2023 шықәса. Аԥсныпресс.  Аԥсны Аҳәынҭқарра Ахада Аслан Бжьаниа Урыстәылатәи Афедерациа Адәныҟатәи аусқәа рминистр Сергеи Лавров Адипломатиатә усзуҩы Имш идиныҳәалеит.

 Адныҳәаларатә цҳамҭаҟны иҳәоуп:

«Ҳаҭыр зқәу Сергеи Виктор-иԥа! Гәык-ԥсык ала ишәыдысныҳәалоит шәзанааҭтә ныҳәа   – Адипломатиатә усзуҩы Имш.

Адәныҟаполитикатәи уснагӡатәқәа есҽны рыӡбараан Урыстәыла адипломатцәа адунеи аҟны ашәарҭадареи аҭышәынтәалареи рырӷәӷәара иазку акырӡа зҵазкуа амиссиа рыдуп. Урыстәылатәи адипломатцәа раҳаҭыри, рыпрофессионализми, азинеиҟарареи рпартниорцәа рҳәынҭқарратә хьыԥшымра ҳаҭырла азнеиреи рыпринципқәа рықәныҟәара иалдыршоит ишәоу-изоу, лыҵшәа змоу Урыстәылатәи Афедерациа адәныҟатәи аполитика амҩаԥгара.

Аҟәа. Жәабранмза 10, 2023. Апсныпресс.  Аҟәа ақалақь аҿы Адипломатиатә усзуҩ Имш аҽны Аԥсны иршьыз урыстәылатәи адипломатцәа Дмитрии Ольгеи Вишерниоваа ргәаладыршәеит.  

Аԥсны иҟоу Урыстәыла Ацҳаражәҳәарҭа аҿы имҩаԥысыз аусмҩаԥгатә рхы аладырхәит Аԥсны ашәарҭадара Ахеилак Амаӡаныҟәгаҩ Сергеи Шамба, адәныҟатәи аусқәа рминистр Инал Арӡынба,  Аԥсны иҟоу Аахыҵ Уаԥстәыла ацҳаражәҳәаҩ Олег Боциев, Аԥсны иҟоу Приднестровтәи Молдавтәи Ареспублика Ахаҭарнакра ахада Гарри Кәпалба, Аԥснытәи Аиашахаҵаратә уахәама ахада Виссарион Аԥлиаа.  

«Вишернев иԥшәмаԥҳәыси иареи зынӡа иқәыԥшқәан, урҭ гәымбылџьбарала ирықәланы иршьит цәыббрамза, 2013 шықәса рзы. Вишерниоваа рҭаацәа рҭахара – адипломатиатә усура егьа иҭынчу занааҭны ахы унарбозаргьы, уи уеизгьы ашәарҭара ацны иҟалар шалшогьы лабҿаба иунарбоит.  Аԥсни ҳара ҳҳәынҭқарреи аимабзиаратә еизыҟазаашьақәа рыбжьоуп, аха атәылақәа жәпакы рҿы, аиҳарак мраҭашәаратәи атәылақәа рҿы, ҳдипломатцәа ҳусура адискридитациа иазкны мҽхакыҭбаала имҩаԥысуа аурысҿагыларатә усура иарҿиаз аҭагылазаашьа аҿы аус рулар акәхоит.  

Аԥсны адәныҟатәи аусқәа рминистр Урыстәыла Ацҳаражәҳәарҭа аусзуҩцәа Адипломатиатә усзуҩ Имш рыдыиныҳәалеит.

Аҟәа. Жәабранмза 10, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны иҟоу Урыстәылатәи Афедерациа Аҷыдалкаатә зинмчы змоу Ацҳаражәҳәаҩ Михаил Шургалин Адипломатиатә усзуҩы имш идиныҳәалеит.

Аслан Бжьаниа ахә ҳаракны ишьеит Урыстәыла Аҷыдалкаатә зинмчы змоу Ацҳаражәҳәаҩ Михаил Шургалин Аԥсны Аҳәынҭқарреи Урыстәылатәи Афедерациеи реидгыларатә еизыҟазаашьақәа рырӷәӷәараҟны илагаламҭа.

Адныҳәалараҟны иҳәоуп: 

«Ҳаҭыр зқәу Михаил Александр-иԥа! Азин сышәҭозар, Шәаргьы Аԥсны Аҳәынҭқарраҟны иҟоу Урыстәылатәи Афедерациа Аҷыдалкаатә зинмчы змоу Ацҳаражәҳәарҭа аусуҩцәагьы ишәыдысныҳәаларц сҭахуп шәзанааҭтә ныҳәа – Адипломатиатә усзуҩы имш.

Аҟәа. Жәабранмза 9, 2023 шықәса. Аԥсныпресс.  1992-1993шш. Аԥсны жәлар рџьынџьтәылатәи еибашьра аветеранцәа еидызкыло Ареспубликатә уаажәларратә еиҿкаара «Аруаа» ахантәаҩы Ҭемыр Гәлиа аҳәынҭқарратә ҳәаа аделимитациеи Урыстәылеи Аԥсни рыбжьара амшынтә ҵакырақәа реизшареи рзы аҳәынҭқарратә Комиссиа аилазаара далагалоуп. Уи азы Адҵа инапы аҵаиҩит Аҳәынҭқарра Ахада Аслан Бжьаниа.

Аҟәа. Жәабранмза 9, 2023 шықәса. Аԥсныпресс. Аҳәынҭқарратә шәарҭадара Амаҵзуреи аҩныҵҟатәи аусқәа Рминистрреи аихамҩатәии аенергетикатәии аинфраструктура аобиектқәа рганахьала адиверсиақәа рымҩаԥгара азы ироуз аинформациа агәаҭара азы аоператив-ԥшааратә усмҩаԥгатәқәа мҩаԥыргоит, - ҳәа адырра ҟанаҵоит Аҳәынҭқарратә шәарҭадара Амаҵзура апресс-маҵзура.

Аҟәа. Жәабранмза 9, 2023 шықәса. Аԥсныпресс. Урыстәылатәи Афедерациа  Аҳәынҭқарратә Дума аҿы аидарамҩангагатә транспорт ала аҳәаа ахысра аамҭа аркаара азы азакәан рыдыркылеит.  

Атәыла Анапхгара зхысра азы аамҭеи арыцхәи аркаара ахәҭоу аҳәаа ахысра апунктқәа рсиа шьақәнарӷәӷәоит,  ҳәа адырра ҟанаҵоит Аҳәынҭқарратә Дума аофициалтә саит.

Ҿыц иалагалоу аԥҟарақәа аидарамҩангагатә машьынақәа роуп изызку, урҭ «аҳәаа аҿы аиасра апунктқәа рҿы агәараанқәа рышьақәгылара аԥхьырҟәҟәаара» алдыршоит.

Аҟәа. Жәабранмза 9, 2023 шықәса. Аԥсныпресс. Аԥсны аԥсылманцәа Иаку рдоуҳатә Усбарҭа амыфҭы Ҭемыр Ӡыба Ҭырқәтәыла адин аусқәа рзы Аусбарҭа ала Аҳәынҭқарра Ахада Реџьеԥ Ҭаиип Ердогани аҭырқәа жәлари рыхьӡала зықьҩыла ауаа рыԥсҭазаара ҿахызҵәаз адгьылҵысрақәа рганахьала адышшыларатә шәҟәы ишьҭит, ҳәа адырра ҟанаҵоит Аԥсны аԥсылманцәа Иаку рдоуҳатә Усбарҭа апресс-маҵзура.

Адышшыларатә шәҟәы атекст аҟны ахәҭакахьала иазгәаҭоуп:

«Аԥсны аԥсылманцәа Иаку рдоуҳатә Усбарҭа анапхгареи ареспублика иқәынхо аԥсылманцәеи зегьы рыхьыӡала Ҭырқәтәыла Ахада Реџьеп Ҭаиип Ердоган, Ҭырқәтәыла адин аусқәа рзы Аусбарҭа анапхгаҩы, адоктор Али Ербаши аҭырқәа жәлар зегьи ари иуадаҩу аамҭа азы, иҟалаз адгьылҵысра ду иахҟьаны хыԥхьаӡара рацәала ауаа рҭахара инамаданы ироуз ахьаа шрыцеиҩаҳшо азгәасҭарц сҭахуп.

Иҭахаз рыуацәеи рҭынхацәеи гәык-ԥсыкала срыдышшылоит. Ҳара зегьы Зегь Зымчу Аллаҳ инапы ҳануп, аҵыхәтәаны иара иахь ауп ҳахьыхынҳәуа..