Аҟәа. Нанҳәамза 18, 2023 шықәса. Аԥсныпресс. Цәыббрамза 10 инаркны 14-нӡа С.И.Ҷанба ихьӡ зху Аԥснытәи аҳәынҭқарратә драматә театр Уфа ақалақь аҿы агастрольқәа мҩаԥнагалоит. Башкортосҭан аҳҭнықалақь ахәаԥшцәа Аԥснытәи атеатр ирыднагалоит аспектакльқәа ҩба – Аԥсны Жәлар рартист Валери Ақаҩба иқәиргылаз «Шьапыла», иара убас Аԥсны Зҽаԥсазтәыз артистка Мадина Аргәын иқәлыргылаз «Сариа».
Аԥснытәи актиорцәа Мажит Гафури ихьӡ зху Башкириатәи аҳәынҭқарратә академиатә драматә театр асцена аҿы иқәгылоит.
Аԥснытәи атеатр Башкортосҭан инарыгӡо агастрольқәа Аԥсны Аҳәынҭқарра Ахада Аслан Бжьаниа идгыларала имҩԥысуеит.
Иахьа агастрольқәа реиҿкааратә зҵаарақәа рыӡбаразы Уфа ақалақь иҟоу Аԥснытәи адраматә театр адиректор Алхас Ҷолокәуа дидикылеит Башкортосҭан аԥыза-министр Андреи Назаров. Аԥыза-министр Ареспублиа Анапхгара Уфа ақалақь аҿы Аԥснытәи адраматә театр агастрольқәа рымҩаԥгара аҿы иахәҭоу ацхыраара аҭара иазхиоуп ҳәа инаҵшьны иазгәеиҭеит.
