Атәыла аҩныҵҟатәи аусқәа рминистр Роберт Киут иарбоу амҩа ахәҭа аҿы атранспорт аанкылареи апассаџьырцәа рҭыҵреи шыҟамло узырбо амҩатә дыргақәа рышьақәыргылараҿы ацхыраара шыҟаҵахо азгәеиҭеит.
15.Нанҳәа.2023
Иуԥшьаратәи аҩхааҭшәа аҿы атранспорт аанкылареи атуристцәа рҭыҵреи рзы азин ҟалаӡом.
Аҟәа. Нанҳәамза 15, 2023 шықәса. Аԥсныпресс. Атуризм аминистр Ҭеимураз Хьишба аекскурсиатә маҵзурақәа назыгӡо аиҿкаарақәеи хазхаҭалатәи аусдкылаҩцәеи Риҵаҟа ицо амҩала иҟоу Иуԥшьаратәи аҩхааҭшәа аҿы атранспорт аанкылареи атуристцәа (аекскурсиамҩаԥгаҩцәа) рҭыҵреи рақәиҭымтәра иазкны Адҵа инапы аҵаиҩит.
Атуризм Аминистрра апресс-маҵзура иҟанаҵо адыррақәа рыла, адҵа ҟаҵоуп зегьы раԥхьаӡа иргыланы, атуристцәа ршәарҭадара азы. Риҵатәи ареликтә милаҭтә парк иарбоу аҵакыраҿы лассы-лассы ахаҳәлеира ҟалоит.
