Аҟәа. Ԥхынгәымза 26, 2024 шықәса. Аԥсныпресс.  78-шықәса дшырҭагылаз иԥсҭазаара далҵит Ҭырқәтәыла иҟоу аԥсуа культуратә центрқәа Рфедерациа ԥыхьатәи анапхгаҩы, «Ахьӡ-Аԥша» аорден III аҩаӡара акавалер Феридун Аҟәысба (Аксои).

Зыдунеи зыԥсахыз Феридун Аҟәысба иуацәеи иҭынхацәеи ирыдышшылеит             аџьынџьуаа рҭоурыхтә ԥсадгьыл ахь рырхынҳәра азы Аҳәынҭқарратә Еилакы.

«Феридун Аҟәысба Ареспублика Аԥсни Ҭырқәтәыла иҟоу аԥсуа диаспореи рыбжьара аимадара арҿиара аус аҿы илагала дууп. Иара ҩ-ҽҳәарак Ҭырқәтәыла иҟоу аԥсуа культуратә центрқәа Рфедерациа дахагылахьан.  Иара изныкымкәа иҭоурыхтә ԥсадгьыл даҭаахьан.... Аԥсуа жәлар аҵеи иаша, ауаҩы разы, ауаҩы аамсҭашәа Феридун Аҟәысба игәалашәара наунагӡа ҳгәаҵаҿы иаанхоит», – ҳәа иаҳәоит аџьынџьуаа рҭоурыхтә ԥсадгьыл ахь рырхынҳәра азы Аҳәынҭқарратә Еилакы идәықәнаҵаз адышшыларатә цҳамҭа аҿы.

Аԥсны адәныҟатәи аусқәа Рминистрра аҿы гәалсра дула ирыдыркылеит Ҭырқәтәыла иҟоу аԥсуа культуратә центрқәа Рфедерациа раԥхьатәи ахантәаҩы Феридун Аҟәысба (Аксои) иԥсҭазаара алҵра азы ажәабжь.

Аҟәа. Ԥхынгәымза 24, 2024 шықәса. Аԥсныпресс. Амш азҵаараҟны иқәгылан ааигәа Москва имҩаԥысыз аусуратә ныҟәарақәа раан аиԥылараҟны ишьҭыхыз актуалра злоу азҵаарақәа.

Ирылацәажәеит иара убас ихадароу аҩныҵҟаполитикатә темақәагьы.

Аҟәа. Ԥхынгәымза 24, 2024 шықәса. Аԥсныпресс. Аԥсны агәабзиарахьчара аминистр Едуард Быҭәба  Москва ақалақь аҿы имҩаԥысуа афорум «Здоровое общество» ихы алаирхәуеит.  Аделегациа аилазаара аҿы иара убас дыҟоуп Ареспубликатә хәышәтәырҭа аҳақьым хада Ерик Ҳаҭхәа.

Афорум Росконгресс Афонд аексперттә платформа аекосистема «Здоровое общество» аусмҩаԥгатә хаданы иҟоуп. Афорум иара убас амассатә спорт акультура апопулиаризациа, агәабзиара еиҷаҳарыла азныҟәарала аԥсҭазаара, уҳәа  иадҳәалоу актуалра злоу азҵаарақәа  ирыдҳәалахоит.

Аҟәа. Ԥхынгәыза 25, 2024 шықәса. Аԥсныпресс.  Апрокуратура Хада ашьаусҭҵааратә Усбарҭа ажьырныҳәамза 21,  2024 шықәсазы Амилаҭтә сахьатә галереиа, Абанк «Аԥсны жәларбжьаратәи ахыԥхьаӡарақәа Рцентр», Ареспублика Аԥсны асахьаҭыхыҩцәа Реидгыла  ахыбрақәа рҿы иҟалаз абылра инамаданы ихацыркыз агәаҭара хнаркәшеит.  

Агәаҭара ишышьақәнаргылаз ала, ажьырныҳәамза 21, 2024 шықәса,  3 сааҭки 30 минуҭи инарзынаԥшуа, Аҟәа ақалақь, Лакоба имҩала игылоу ахыбра № 31 амца акит. Уи иахҟьаны абанки агалереиеи амаҵзуратә уадақәеи амазареи блит.

Краснодартәи атәылаҿацә ала Урыстәылатәи Афедерациа аҩныҵҟатәи аусқәа Рминистрра Аексперт-криминалисттә Центр аҿы имҩаԥгаз аӡбара-комиссиатә абылра-техниатә експертиза ала, Аԥсны асахьаҭыхыҩцәа Реидгыла ахыбраҿы иҟалаз амцакра иамзызны иԥхьаӡоуп афымцамчцәаҳәақәа реиқәылара, ма ахьанҭара рзышьҭымхра ҳәа ишьақәыргылоуп.  Урыстәылатәи акриминалистцәа иҟарҵаз алкаақәа рыла абылра ахы акит асахьақәа рыҵәахырҭеи абанк «Аԥсны Жәларбжьаратәи ахыԥхьаӡарақәа Рцентр» асервери рыҭуанқәеи ахыби рыбжьара. Гәаӷшақә амцакра ыҟан ҳәа узҳәом.

Аҟәа. Ԥхынгәымза 25, 2024 шықәса. Аԥсныпресс. Иахьа 90 шықәса ҵит Аҟәатәи аекскурсиақәеи аныҟәарақәеи рбиуро аԥҵара ҟалеижьҭеи.  

Аҟәатәи аекскурсиақәеи аныҟәарақәеи рбиуро аԥҵан 1934 шықәсазы, иагьахьӡын усҟан иара «Апролетартә туризм аилазаара» ҳәа («Общество пролетарского туризма»). Аԥсны иамоу аԥшӡарақәеи аԥсабаратә беиарақәеи рыла есымша хыԥхьаӡара рацәала асасцәа аднаԥхьалон. Абиуро аартра амш инаркны Аџьынџьтәылатәи еибашьра Дуӡӡа аналага аҟынӡа есышықәса Аԥсны иаҭаауаз асасцәа рхыԥхьаӡара еиҳа - еиҳа иацлон. Аибашьра ашьҭахь, 1947–1948 шш. Амшын Еиқәа аԥшаҳәа аҿы атуризм аиҭашьақәыргылара иалагеит.         1948 шықәсазы абиуро «Аҟәатәи атуристтә база аҟны иҟоу аекскурсиатә ҟәша» ҳәа ахьӡ рҿыцын, 1963 шықәса инаркны 1967 шықәсанӡа уи иахьӡын «Аԥснытәи аекскурсиатә база» ҳәа.  Анаҩс уи «Аҟәатәи аекскусиақәеи аныҟәарақәеи рбиуро» ҳәа ҩаԥхьа ахьӡ ԥсахын.  Уи иаҵанакуан атуризм азы Аԥснытәи аобласттә Хеилак.  Ԥыҭрак ашьҭахь абиуро Асовет Еидгыла аҿы иҟоу иреиҳау абиуроқәа жәаба рхыԥхьаӡараҿы иҟалеит. Араҟа иааиԥмырҟьаӡакәа аус руан 150-ҩык, акурорттә сезон азы акәзар – даҽа  30-ҩык рҟынӡа аусзуҩцәа ацлон. Урҭ рхыԥхьаӡараҿы иҟан аԥышәа ду змаз аекскурсиамҩаԥгаҩцәа.  

Аҟәатәи абиуро даараӡа ирацәаны аекскурсиатә маршрутқәа аман. Уи аусуа амҽханакуан Аԥсны мацара акәымкәа Асовет Еидгыла зегьы.  Атуристцәа аиҳарак иазҿлымҳан Асовет Еидгыла ақалақь дуқәа рахь аекскурсиақәа мҩаԥызгоз аҳаиргәыԥқәа, атуристтә дәыӷбақәа рыла Абжьаратәи Азиа, Урыстәыла ахьтәы мацәаз ҳәа изышьҭоу амаршрут ала аныҟәара, Ленинград ақалақь, иара убас Прволжие, Прибалтика, Украина, Қарҭ, Баку, уҳәа рҭаара.  Аҟәатәи амшынбаӷәаза усҟан иаднакылон акруизтә дәыӷба дуқәа.  Адәыӷбақәа «Россия», «Победа», «Грузия», «Абхазия», «Адмирал Нахимов» рыла атуристцәа Болгариа, Румыниа, Ҭырқәтәыла, Бырзентәыла, уҳәа атәылақәа жәпакы  ираҭаауан.

Нхыҵ Кавказ ареспубликақәа, Ҟрым аладатәи аган рахь автобустә екскурсиақәа хыԥхьаӡара рацәала ауаа аднаԥхьалон. Акырӡа ирацәаҩны атуристцәа амшын аԥшаҳәа аҟынтәи Нхыҵ Кавказ аҩхаақәа рҟынӡа, Ихадоу Кавказтәи ашьхеибаркыра иахысны Теберда, Домбаи инаӡаны шьҭахьӡа игьежьуан.  

Аҟәа. Ԥхынгәымза 25, 2024 шықәса. Аԥсныпресс.  «Атауарқәа рыла  ахәаахәҭра арежим азы аԥсны-урыстәылатәи Аиқәшаҳаҭра аиҭакрақәа ралагалара азы Апкаанҵа ашьақәырӷәӷәара азы» азакәан апроект иахәаԥшит жәларбжьаратәи, апарламентбжьаратәи аимадарақәеи аџьынџьуаа рымадареи рзы апарламенттә Еилакы алахәылацәа аԥшьаша, ԥхынгәымза 25 рзы имҩаԥысыз аилатәара аҿы.

Аилак ахантәаҩы Алхас Барцыц имҩаԥигоз аилатәара рхы аладырхәит Аизара Аиҳабы Лаша Ашәба, тәыла аекономика аминистр ихаҭыԥуаҩ Ҭеимуаз Миквабиа, иара убас Аԥсны Аконтрольтә Палата ахантәаҩы Каха Пертаиа.

Лаҵарамза 28, 2012 шықәсазы Аԥсни Урыстәылеи рнапхгарақәа рыбжьара знапаҵыҩра мҩаԥгаз атауарқәа рыла ахәаахәҭра арежим азы Аиқәшаҳаҭра аратификациа азун ԥхынҷкәынмза  23, 2013 шықәса рзы.

Иарбоу Аиқәшаҳаҭра аиҭакрақәа ралагалара азы Апкаанҵа  анапаҵыҩра мҩаԥысит Грозныи ақалақь аҿы, ԥхынгәымза 16, 2024 шықәса рзы.  

«Ареспублика Аԥсны жәларбжьаратәи аиқәшаҳаҭрақәа рзы» азакәан инақәыршәаны, Апарламент аҿы аратификациа иахысыз Ареспублика Аԥсны жәларбжьаратәи аиқәшаҳаҭрақәа рахь аиҭакрақәеи ацҵақәеи зегьы убасҵәҟьа аратификациа рызузароуп.

Аҟәа.  Ԥхынгәымза 25, 2024 шықәса. Аԥсныпресс. Арратә хәышәтәырҭа Хада аҿы акыраамҭа иззыԥшыз аполиклиникатә ҟәша шьаҭанкыла аиҭашьақәыргыларазы аусурақәа ирылагеит.   Ас еиԥш мҽхакы ҭбаала арҿыцра аҵыхәтәантәи  50-шықәсатәи ахыбра аҭоурых азы раԥхьаӡа акәны иҟалеит.

Ахәышәтәырҭа аполиклиника агәабзиарахьчара асистема аҿы акыр зҵазкуа ароль нанагӡоит. Араҟа амедицинатә цхыраара роуеит аруаа рнаҩсгьы Гәылрыԥшь араиони ареспублика егьырҭ араионқәеи рҿы инхо ауааԥсырагьы.  Аусбарҭа иадҵаалаз зегьы амедицинатә цхыраара рыҭара алнаршоит.

«Ахәышәтәырҭа иахьатәи амш азы инагӡаны аспециалистцәа рыла еиқәыршәоуп: ахирургцәа, атерапевтцәа, аокулистцәа, а-ЛОР-ҳақьымцәа, агинекологцәа, адерматологцәа, агастроентерологцәа», – ҳәа еиҭеиҳәеит арратә хәышәтәырҭа Хада аиҳабы Алиас  Џьынџьал.

Аҟәа. Ԥхынгәымза 25, 2024 шықәса. Аԥсныпресс. Аԥснытәи аделегациа Псков ақалақь аҿы имҩаԥысуа, аҳәаанырцә иҟоу урыстәылатәи аидгьылуаа реимадара апроблеақәа рылацәажәара иазку астол гьежь иалахуп.

Аҟәа ақалақь аҿы иҟоу «Москва Аҩны» адиректор Алеқсандр Бигәаа астол гьежь аҿы ажәахә ҟаҵо дықәгылеит.  Иара Урыстәылатәи Афедерациа аџьынџьуаа рганахьала иаанарԥшуа агәцаракреи ахшыҩзышьҭреи Аԥсны ауааԥсыра рзы еилкаау усуп, ибзиангьы ирыдыркылоит ҳәа иазгәеиҭеит.

«Москва Аҩны» зхырхарҭақәа еиуеиԥшым аусмҩаԥгатәқәа рымҩаԥгаразы аплошьадкақәа амоуп, уи, жәаҳәарада, иара аидгьылуаа реиҿкаарақәа рыдагьы, егьырҭ, иазинтересу ахаҿқәеи аднаԥхьалоит», - ҳәа инаҵшьны иазгәеиҭеит Алеқсандр Бигәаа.

Аҟәа. Ԥхынгәымза 25, 2024 шықәса. Аԥсныпресс. Ԥхынгәымза 24 рзы Жәлар Реизара –Апарламент адепутатцәа  Беслан Емырхәба, Алмас  Акаба, Герман  Качарааи Резо Занҭариеи Апарламент ахь ԥхынгәымза 15, 2024 шықәса рзы Аԥсны Жәлар Реизара - Апарламент аҟны ашәҟәы иҭаргалаз «Очамчыра, Тҟәарчал, Гал араионқәа рсоциал-економикатә ҿиара аҩаӡара ашьҭыхра иазку ауснагӡатәқәа рзы» Азакәан апроект ахәаԥшраҟнытә шьҭахьҟа архынҳәреи уи иазку азакәанԥҵаратә процесс аринахыс аанкылареи рзы аҳәара ҟарҵеит.  

Убри инамаданы, Жәлар Реизара-Апарламент апресс-маҵзура аҳәамҭа ҟанаҵеит:

«Аԥсны Жәлар Реизара-Апарламент Арегламент инақәыршәаны, Жәлар Реиазара Аиҳабы Лаша Ашәба иарбоу аусшәҟәы  аԥшьызгаз адепутатцәа гәыԥҩык рахь архынҳәра азы Аусшәҟы инапы аҵаиҩит. Убас ала иарбоу азакәан апроект ахәаԥшраҟнытә шьҭахьҟа ирхынҳәхоит уи иазку азакәанԥҵаратә процесс аринахыс иаанкылахоит». 

Аҟәа. Ԥхынгәымза 25, 2024 шықәса. Аԥсныпресс. Мрагыларатәи Аԥсны апартаментқәа рыргылара азы Азакәан апроект ахәаԥшраҟнытә шьҭахьҟа архынҳәреи уи иазку азакәанԥҵаратә процесс аринахыс аанкылареи рзы аӡбамҭа адкылара атәыла аҿы ишьақәгылаз аиҿагыларақәа раԥыхреи аҭагылазаашьа аҭышәныртәалареи иадҳәалоуп, ҳәа аҳәамҭа ҟанаҵоит Жәлар Реизара-Апарламент апресс-маҵзура.

«Акыраамҭатәи аилацәажәарақәеи апарламент аҩныҵҟатәи аиҿцәажәарақәеи ирылҵшәаны, ауаажәларра, раԥхьа иргыланы, Абыргцәа Рхеилак, Аԥсны Аџьынџьтәылатә еибашьра Афырхацәа, аҭҵаарадырратә еидгыларақәа, аинтеллигенциа, иара убас егьырҭ атәылауаа рхаҭарнакцәа «Очамчыра, Тҟәарчал, Гал араионқәа рсоциал-економикатә ҿиара аҩаӡара ашьҭыхра иазку ауснагӡатәқәа рзы» Азакәан апроект ахәаԥшра азҵаара агәҭынчымра зызцәырнагаз зегьы ргәаанагара ҳазхәыцны, иқәгылоу азҵаара аҵакы ҳасаб азуны, ишьақәгылаз аиҿагыларақәа раԥыхреи аҭагылазаашьа аҭышәныртәалареи хықәкыс иҟаҵаны, Азакәан апроект аԥшьызгаз азыӡба рыдыркылеит иалагалоу азакәанапроект ахәаԥшраҟнытә шьҭахьҟа архынҳәреи уи иазку азакәанԥҵаратә процесс аринахыс аанкылареи рзы.