Аҟәа. Хәажәкырамза 23, 2023 шықәса. Аԥсныпресс. Имҩаԥысит Аԥсны Жәлар Реизара – Апарламент асессиа изаамҭанытәиу аилатәараАпарламент Аиҳабы Ашәба Лаша ихантәаҩрала имҩаԥысит Аԥсны Жәлар Реизара – Апарламент асессиа изаамҭанытәиу аилатәара.

Ирыхәаԥшит иагьрыдыркылеит аҵыхәтәантәи аԥхьараан Аԥсны Аҳәынҭқарра азакәанқәа:

«Афинанстә қьыразы (ализинг азы)»

«Аԥсны Аҳәынҭқарра Азакәанеидкыла ахәҭаҷ 45 административтә зинеилагарақәа ралагаларазы».

«Административтә зинеилагарақәа ирызку аусқәа рзы аӡбареиҿкааразы»  Аԥсны Аҳәынҭқарра Азакәанеидкыла ахәҭаҷ 216 ралагаларазы». 

Ажәахәҟаҵаҩ – Апарламент абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы ихаҭыԥуаҩ Дмитри Маршьан.

«Амҩатә ныҟәарақәа русхк аҟны административтә зинеилагарақәа рыҟаҵаразы аҭакԥхықәра арӷәӷәара ахәҭаҟны Аԥсны Аҳәынҭқарра азакәанԥҵаратә актқәак аԥсахрақәа ралагаларазы»  Ажәахәҟаҵаҩ – Аҳәынҭқарра-зинтә политиказы аилак ахантәаҩы Дауҭ Хәытаба. 

Ирыхәаԥшит актәи аԥхьараан ирыдыркылеит азакәанапроектқәа:

«Аԥсны Аҳәынҭқарраҟны атуристтә усуразы» Аԥсны Аҳәынҭқарра Азакәан аԥсахрақәа ралагаларазы».

Ажәахәҟаҵаҩ – Аекономикатә политикеи, ареформақәеи, аинформациатә технологиқәеи рзы аилак  ахантәаҩы ихаҭыԥуаҩ Бадрик Ԥлиа.

«Аԥсны Аҳәынҭқарра Амилаҭтә банк азы (Аԥсны Абанк азы)» Аԥсны Аҳәынҭқарра Азакәан аԥсахрақәа ралагаларазы». 

Ажәахәҟаҵаҩ – Апарламент абиуџьети, акредиттә еиҿкаарақәеи, ашәахтәқәеи, афинансқәеи рзы аилак ахантәаҩы ихаҭыԥуаҩ Дмитри Маршьан.

Аԥсны Аҳәынҭқарра Азакәан аԥсахрақәа ралагаларазы» Аԥсны Аҳәынҭқарраҟны атәымтәылауаа рзинтә ҭагылазаашьазы».

Ажәахәҟаҵаҩ – Аҳәынҭқарра-зинтә политиказы аилак ахантәаҩы Дауҭ Хәытаба.

Ирыхәаԥшит иагьрыдыркылеит Аԥсны Жәлар Реизара – Апарламент ақәҵарақәа: 

Аҟәа. Хәажәкырамза 30, 2023 шықәса. Аԥсныпресс. Иахьа Башкорҭосҭан Ареспублика Ахада дызхагылоу аделегациа официалтә визитла Аԥсны Аҳәынҭқарра иаҭааит.

Аԥсны-урыстәылатәи аҳәынҭқарратә ҳәааҟны аделегациа иаԥылеиит Ахада Аслан Бжьаниа зхадараҟны дыҟоу Аԥсны анапхгара.

Авизит мҩаԥысуеит хәажәкырамза 30 инаркны мшаԥымза 2 рҟынӡа.

Аделегациа аилазаараҟны иҟоуп: Башкорҭосҭан Ареспублика Аиҳабыра Аԥыза-министр Александр Назаров, Башкорҭосҭан Ареспублика Аҳәынҭқарратә Еизара – Курултаи ахантәаҩы ихаҭыԥуаҩ Рустам Ишмухаметов, БА Аиҳабыра Аԥыза-министр актәи ихаҭыԥуаҩ – аекономикатә ҿиареи аинвестициатә политикеи рминистр Рустам Муратов, БА адәныҟаекономикатә еимадарақәеи аконгресстә усуреи рминистр Маргарита Болычева, БА аҵареи аҭҵаарадырреи рминистр Аибулат Хажин, БА анаплакреи атуризми рминистр ихаҭыԥуаҩ Светлана Верещагина, ааглыхреи, афымцамчи, арҿыцрақәеи рминистр Валери Галиев.

Аҟәа. Хәажәкырамза 31, 2023 шықәса. Аԥсныпресс. Ареспублика аофициалтә делегациа напхгара азҭо Башкортосҭан Ахада Ради  Хабирови Аԥсны Аҳәынҭқарра Ахада Аслан Бжьаниеи Аҟәа ақалақь, Ахьӡ -Аԥша апарк аҿы игылоу, 1992 – 1993шш. Аԥсны жәлар рџьынџьтәылатәи еибашьра аҿы иҭахаз афырхацәа Рмемориал амҵан ашәҭ шьыҵәрақәа шьҭарҵеит.

Аҟәа. Хәажәкырамза 31, 2023 шықәса. Аԥсныпресс. Урыстәылатәи Афедерациа Аԥсны Аҳәынҭқарреи Аахыҵ Уаԥстәылатәи Ареспубликеи ганрацәала ацхыраара рынаҭалоит, арҭ аҳәынҭқаррақәа рыжәларқәа хатәгәаԥхарала иалырхыз, жәларбжьаратәи азин ала ишьаҭарку Урыстәыла ахь аинтеграциа арӷәӷәара анагӡара адгылара аҭара иацнаҵоит. Абри атәы азгәаҭоуп ахәаша, хәажәкырамза 31 рзы Урыстәылатәи Афедерациа Ахада Владимир Путин ишьақәирӷәӷәаз Урыстәылатәи Афедерациа адәныҟатәи аполитика аконцепциа ҿыц аҿы.

Аҟәа. Хәажәкырамза 31, 2023 шықәса. Аԥсныпресс. Атуризми асасдкылареи русхкы аҿы аусеицура аҿиара хықәкыс иҟаҵаны, атуроператорцәа – Зҭакԥхықәра Ҳәаақәҵоу Аилазаара «Вояж» Аԥсны Аҳәынҭқарра Зҭакԥхықәра Ҳәаақәҵоу Аилазаара «Тархан» Ареспублика Башкортосҭан – атуризм аусхкы аҿы аусеицура азы аиқәшаҳаҭра рнапы аҵарҩит.

«Атуризм асоциал-економикатәи акультуратә ԥсҭазаареи рҿы акырӡа зҵазкуа усхкны иԥхьаӡаны, Аԥсни Башкортосҭани, атуризм аусхкы аҿы акыраамҭатәи аусеицура азы азхиара аарԥшуа, уи азы ихымԥадатәиу аиҿкааратәи, азинтәи, аметодологиатә шьаҭақәа раԥҵара азы агәазыҳәара рыманы, атуризм аусхкы аҿы аусеицура азы аиқәшаҳаҭра абжьаҵара аҟынӡа инаӡеит», ҳәа иазгәаҭоуп аиқәшаҳаҭра апреамбула аҿы.

Аҟәа. Хәажәкырамза 31, 2023 шықәса. Аԥсныпресс. Аԥсны адәныҟатәи аусқәа Рминистрра Аԥсны атәылауаа рзы Урыстәылатәи Афедерациа адәныҟатәи аусқәа Рминистрра Адипломатиатә Академиа аҭалареи амагистратуреи аспирантуреи рыпрограммақәа рыла аҵара аҵареи  рзы аконкурстә лыԥшаара алахәхаразы ихымԥадатәиу аусшәҟәқәа рыдкылара ишалаго азы алаҳәара ҟанаҵоит.

Аҭаларазы аконкурс алахәхара ҟалоит абарҭ амагистратура апрограммақәа рыла:

- ахырхарҭа «Аекономика», апрограмма «Жәларбжьаратәи аекономикеи абизнеси»;

-  ахырхарҭа «Азиндырра», «Жәларбжьаратәи ауаажәларратә зин», «Жәларбжьаратәи аекономикатә зин» апрограмма;

-ахырхарҭа «Менеџьмент», «Адәныҟаекономикатә усуреи ашәарҭарақәа рнапхгараҭареи» апрограмма (латәарадатәи аҵара аформа).

Аспирантура аҭаларазы аконкурс алахәхара алыршахоит анаукатә  занааҭқәа ргәыԥқәа «Аекономика», «Азин»; «Аҭоурыхтә наукақәа», «Аполитологиа».

Аҟәа. Хәажәкырамза 31, 2023 шықәса. Аԥсныпресс. Атәыла аекономика Аминистрра аҟны имҩаԥысит аԥыза-министр ихаҭыԥуаҩ, аекономика аминистр Кристина Озгани Аԥсныҟа аусуратә визитла иааз Ареспублика Башкортосҭан аделегациа ахаҭарнакцәеи реиԥылара, ҳәа иаанацҳауеит Аԥсны аекономика Аминистрра апресс-маҵзура.

Аиԥылара рхы аладырхәит Ареспублика Башкортоҭан Анапхгара аԥыза-министр актәи ихаҭыԥуаҩ – акономикатә ҿиареи аинвестициатә политикеи рминистр Русҭам Муратов, адәныҟаекономикатә еимадарақәеи аконгресстә усуреи рминистр Маргарита Болычиовеи ааглыхра, енергетикеи аинновациақәеи рминистр ихаҭыԥуаҩ – Валери Галиев.

Аԥсуа ган аҟынтәи аԥыза-министр ихаҭыԥуаҩ, аекономика аминистр Кристина Озган лнаҩс аиԥылара рхы аладырхәит аԥыза-министр ихаҭыԥуаҩ, афинансқәа рминистр Владимир Делба, аекономика аминистр ихаҭыԥуаҩцәа Теимураз Миквабиеи Емма Голеузовеи.

Ареспубликақәа рыбжьара ахәаахәҭра-економикатә усеицура аҿиара иазкыз аиԥылара аҿы аганқәа аекономикатә усеицура иадҳәалоу азҵаарақәа жәпакы ирылацәжәеит.

«Башкириеи Аԥсни акыр шықәса раахыс аимадарақәа рыбжьоуп, урҭ шьақәгылеит Аԥсны азы акыр иуадаҩыз аамҭа азы. Ҳҭоурых аҟынтәи ҳара иаадыруеит аибашьра анцоз ахәрақәа зауз ҳаибашьцәа Башкортосҭан амедицинатә цхыраара шроуаз, 100-ҩык инареиҳаны астудентуәа Башкортосҭан аҵараиурҭақәа рҿы аҵара рҵеит, иреиҳаӡоу аҵарадырра роуит. Мҽхакы ҭбаала агуманитартә цхыраара Аԥсныҟа иаауан. Ҳара уи ҳхашҭраны ҳаҟаӡам. Иахьа ҳара ҳаизыҟазаашьақәа иҿыцу аҩаӡара ахь ицәырҵуеит, аперспектива азы апланқәа шьақәҳаргылоит», - ҳәа илҳәеит Кристина Озган.

Аҟәа.  Хәажәкырамза 31, 2023 шықәса  Аԥсныпресс. Аԥсны аҵара аминистр Инал Габлиа Аԥсныҟа иааз Ареспублика Башкортосҭан анапхгаратә делегациа аилазаара аҿы иҟоу аҵареи анаукеи рминистр  Аибулат Хажин диԥылеит.

Аиԥылара иалахәын иара убас аминистр актәи ихаҭыԥуаҩ Ада Кәарҷелиеи Аҟәатәи аҳәынҭқарратә коллеџь адиректор Светлана Габлиеи.

Инал Габлиа асас бзиала уаабеит ҳәа иаҳәо аганқәа анаҩстәи аусеицура шрыбжьало азы агәыӷра шимоу ааирԥшит.  

«Иахьа ҳара Башкортосҭанынтәи ахәыҷқәа рзы потенциалла ахархәара заур алшо аобиектқәа ҳарҭаараны ҳаҟоуп. Иара убас ҳколлеџьқәа рыбжьара аусеицура абжьаҵара ҳалацәажәоит, анаҩс анапхгарабжьаратәи аиқәшаҳаҭра ҳнапы аҵаҳаҩуеит. Исымоу алшара схы иархәаны, шәколлегацәеи шәареи жәларбжьаратәи аԥхынратәи ашкол «Ашықәс арҵаҩы» алахәхара азы ааԥхьара шәысҭоит», - ҳәа иҳәеит аминистр.

Аҟәа.  Хәажәкырамза 31, 2023 шықәса. Аԥсныпресс.  Хәажәкырамза 30 рзы, Урыстәыла адәныҟатәи аусқәа Рминистрра аҿы имҩаԥысит Урыстәылатәи адәныҟаполитикатә аусқәа рхылаԥшырҭа ахада ихаҭыԥуаҩ Михаил Галузини Аԥсны адәныҟаполитикатә усқәа рхылаԥшырҭа ахада ихаҭыԥуаҩ Иракли Ҭыжәбеи реиԥылара, ҳәа адырра ҟанаҵоит Аԥсны адәныҟатәи аусқәа Рминистрра аофициалтә саит.  

Аԥснытәи аган аҟынтәи аиԥылара иара убас далахәхеит Урыстәылатәи Афедерациа иҟоу Аԥсны Ацҳаражәҳәаҩ Алхас Кәыҵниа.

Аиԥылара аҿы аганқәа мшаԥымза 4-5, 2023 шықәса рзы имҩаԥысраны иҟоу Кавказнҭыҵ аҭышәынтәалареи ашәарҭадареи рышьақәыргылара азы Жәларбжьаратәи Женеватәи аилацәажәарақәа изаамҭанытәиу араунд амшхәаԥштә зҵаарақәа ирылацәжәеит.   

Аиԥылара иалахәыз ганкахьала Қырҭтәылеи Аԥсни, даҽа ганкахьала Қырҭтәылеи Аахыҵ Уаԥстәылеи рыбжьара аиуристә ҭакԥхықәра зҵоу, амчра ахархәара мап ацәкра азы Аиқшаҳаҭрақәа анапаҵыҩра шхымԥадатәиу ҩаԥхьа инаҵшьны иазгәарҭеит.  

Аҟәа. Хәажәкырамза 30, 2023 шықәса. Аԥсныпресс. Аԥсны апрокурор Хада Адгәыр Агрба аԥшьаша, хәажәкырамза 30 рзы, ареспублика азинхьчаратә усбарҭақәа рнапхгаҩцәа алархәны,   2022 шықәсазы арҩышьыгатә маҭәашьарқәа рыдкылареи рыларҵәареи рҿагылара азы имҩаԥгаз аусура аихшьаалақәа рыҟаҵара иазкны Акоординациатә еилатәара мҩаԥигеит.

Аилатәара рхы аладырхәит атәыла аҩныҵҟатәи аусқәа рминистр Вальтер Быҭәба, Аԥсны Аҳәынҭқарратә хьчара Амаҵзура анапхгаҩы ихаҭыԥуаҩ Зураб Занҭариа, Аҳәынҭқарратә ҳазылхратә Еилакы ахантәаҩы ихаҭыԥуаҩ Зураб   Ашәба,    Аҳәынҭқарратә миграциатә Маҵзура анапхгаҩы ихаҭыԥуаҩ Виачеслав Бганба,  апрокурор Хада ихаҭыԥуаҩцәа,  апрокуратура Хада аусбарҭақәа рнапхгаҩцәа, Аҟәа ақалақь апрокурор, араионқәа рыпрокурорцәа, аҷыдалкаатә прокурорцәеи урҭ рхаҭыԥуаҩцәеи, амассатә информациа ахархәагақәа рхаҭарнакцәа.

Ажәахә хада ҟаҵо дықәгылеит апрокуратура Хада Аӡбаратә усбарҭа анапхгаҩы Даур Амҷба. Уи иажәахә аҿы 2022 шықәсазы астатистикатә рбагақәа ааигеит.