Аҟәа. Нанҳәамза 29, 2024 шықәса. Аԥсныпресс. Алхас Ҷолокәуа Аԥсны Аҳәынҭқарра Ахада Иусбарҭа аҿы иҟоу Амассатә информациа ахархәагақәа рымадаразы Аусбарҭа аиҳабыс дҟаҵоуп.  

Уи азы нанҳәамза 29, 2024 шықәсазы Аусԥҟа инапы аҵаиҩит Аҳәынҭқарра Ахада Аслан Бжьаниа.

Алхас Дмитри-иԥа Ҷолокәуа диит мшаԥымза 22, 1976 шықәса рзы Очамчыра араион Ҷлоу ақыҭан.

1992 шықәсазы далгеит К.Ӡиӡариа ихьӡ зху Аҟәатәи ашкол-интернат №1, афизикеи аматематикеи инарҵауланы рҵара азы иҷыдоу акласс.  

1998 шықәсазы далгеит ААУ афилологиатә факультет ажурналистика аҟәша.

1994 шықәса инаркны — Аԥснытәи Аҳәынҭқарратә Телерадиоеилахәыра адәныҟатәи аимадарақәа рыҟәша акорреспондентс аус иуан.

2003 шықәсазы далгеит М.Ломоносов ихьӡ зху Москватәи аҳәынҭқарратә Университет ажурналистика афакультет ателехәаԥшра аҟәша инагӡоу акурс.

2000 шықәса инаркны – Аԥснытәи аҳәынҭқарратә Телерадиоеилахәыра адырраҭара «Аамҭа» арҿиаратә гәыԥ анапхгаҩыс аус иуан. 

2002 шықәса инаркны – Аԥсуа телехәаԥшра Анапхгараҭара аинформациатә дырраҭарақәа аредактор-корреспондентс аус иуан.  

Аҟәа. Нанҳәамза 29, 2024 шықәса. Аԥсныпресс. Аҳәынҭқарра Ахада Аслан Бжьаниа Аԥсны иҟоу Урыстәыла Афедералтә шәарҭадара Амаҵзура Аҳәаахьчаратә Усбарҭа анапхгаҩы ҿыц, аинрал-маиор Сергеи Шьедрин дидикылеит.

Аиԥылара иара убас ихы алаирхәит Аԥсны иҟоу Урыстәыла ацҳаражәҳәаҩ Михаил Шургалин.

Михаил Шургалин Аҳәынҭқарра Ахада Сергеи Шьедрин диирдыруа иазгәеиҭеит:

«Ҳара агәыӷра ҳамоуп, ԥыхьатәи аинрал-маиор еиԥш ҿыц иҟарҵаз аанапхгаҩгьи Шәареи хра злоу аизыҟазаашьақәа шшәыбжьало».

Аҟәа. Нанҳәамза 26, 2024 шықәса. Аԥсныпресс. Имҩаԥысит Аԥсны Ахада Аслан Бжьаниеи Урыстәыла Ашәарҭадара Ахеилак Ахантәаҩы Ихаҭыԥуаҩ Дмитри Медведеви ҭелла реиҿцәажәара.

Дмитри Медведев Аслан Бжьаниа Урыстәылатәи Афедерациа аганахьала Аԥсны Аҳәынҭқарра ахьыԥшымра Жәларбжьаратәи азхаҵара амш идиныҳәалеит.

Аҟәа. Нанҳәамза 29, 2024 шықәса. Аԥсныпресс. Урыстәылатәи Афедерациа Аиҳабыра азакәанԥҵаратә усуразы акомиссиа Аԥсни Урыстәылеи рыбжьара ҩынтәтәи ашәахтәқәҵара ацәцара азы Аԥсны Аҳәынҭқрра азакәан апроект ашьақәырӷәӷәара иақәшаҳаҭхеит.

Аԥсни Урыстәылеи рыбжьара ахашәалахәқәа рзы ҩынтәтәи ашәахтәқәҵара ацәцара азы Аиқәшаҳаҭра анапаҵыҩра мҩаԥысит лаҵарамза 7 рзы Аҟәа ақалақь аҿы. Ҳазҭоу ашықәс нҵәаанӡа уи аратификациа амҩаԥгара азԥхьагәаҭоуп.

Аҟәа. Нанҳәамза 28, 2024 шықәса. Аԥсныпресс. Нанҳәамза 28 рзы иреиҳау аквалификациа змоу абиблиотека аусзуҩ, абиблиограф, Аԥснытәи АССР Зҽаԥсазтәыз акультура аусзуҩ, «Ахьӡ-Аԥша» III аҩаӡара аорден акавалер, Д. И. Гәлиа ихьӡ зху Аԥснытәи аҳәынҭқарратә Университет анаукатә библиотека ԥыхьатәи адиректор Шьулиа Самсон-иԥҳа Гәарамиа диижьҭеи  90 шықәса ҵит, ҳәа адырра ҟанаҵоит ААУ аофициалтә саит. Лара лыԥсҭазаара далҵит мшаԥымза, 2020 шықәса рзы.

Аҟәа. Нанҳәамза 23, 2024 шықәса. Аԥсныпресс. Аԥсны аҩныҵҟатәи аусқәа рминистр Роберт Киут Аџьынџьтәылатәи еибашьра Дуӡӡа аветеран, аҩныҵҟатәи аусқәа Рминистрра ԥыхьатәи аусзуҩ Анна Панасенко лиубилеи лыдиныҳәалеит. Лара иахьа 100-шықәса лхыҵит.

Аҟәа. Нанҳәамза 23, 2024 шықәса. Аԥсныпресс. Москваҟа иусуратә ҭаара аҳәаақәа ирҭагӡаны, Аԥсны Аҳәынҭқарра Ахада Аслан Бжьаниа Урыстәылатәи Афедерациа Анапхгара ахантәаҩы ихаҭыԥуаҩ Алеқандр Новак диԥылеит.    

Аганқәа Аԥсны асоциал-економикатә ҿиара, аинвестициатә усеицура,  Аԥсны аенергетикатә шәарҭадара алыршара, уҳәа ирыдҳәалоу азҵаарақәа жәпакы ирылацәажәеит, ҳәа адырра ҟанаҵоит Аҳәынҭқарра Ахада ипресс-маҵзура.

Аҟәа. Нанҳәамза 23, 2024 шықәса. Аԥсныпресс. Асоциалтә еиқәыршәареи адемографиатә политикеи рминистр Руслан Аџьба 1941-1945 шш. Аџьынџьтәылатәи еибашьра Дуӡӡа аветеран Анна Панасенко  100-шықәса лхыҵра лыдиныҳәалеит.

Атәыла анапхгара ахьӡала аминистр Анна Николаи-иԥҳа аҳамҭақәа лиҭеит, илзеиӷьаишьеит агәабзиара, агәамч, лыуацәеи лҭынхацәеи рыгәҭа ашықәснҵыра ду.

Аҟәа. Нанҳәамза 25, 2024 шықәса. Аԥсныпресс.  «Ақыҭанхамҩеи атуризми еидкыло» ҳәа хыс измаз ацәыргақәҵатә хәаахәҭра нанҳәамза  24 рзы Еиду Амилаҭқәа Реиҿкаара афатә-ажәтә, ақыҭанхамҩатә еиҿкаара (ФАО ООН) апроекттә офис иҟанаҵаз адгыларала Афон Ҿыц ақалақь аҿы имҩаԥысит. Уи мҩаԥысуан Симон Канттәи изку аныхабаа иаду аҵакыра аҿы, аҭааҩцәа рганахьала ақәҿиарагьы аман.

«Ацәыргақәҵатә хәаахәҭра аҭыԥантәи ауааԥсыреи атуристцәеи рыбжьара афермертә нхамҩақәа иаадрыхуа хкы-хкыла еиуеиԥшым аҽаҩра беиа аӡыргара азы платформаны иҟалеит. Уи рхы аладырхәит 13-ҩык афермерцәа, урҭ зегьы уи аԥхьа  Еиду Амилаҭқәа Реиҿкаара афатә-ажәтә, ақыҭанхамҩатә еиҿкаара (ФАО ООН) апроекттә офис еиҿнакааз атренингқәа рҿы рдыррақәа аҩаӡара шьҭырхит», – ҳәа иазгәаҭоуп Еиду Амилаҭқәа Реиҿкаара афатә-ажәтә, ақыҭанхамҩатә еиҿкаара (ФАО ООН) апроекттә офис апост-релиз аҿы.

Аҟәа. Нанҳәамза 24, 2024 шықәса. Аԥсныпресс.  Дауҭ Гәыблиa «ММА» азы Жәларбжьаратәи атурнир «Санкт-Петербуург ақалақь агубернатор Ихраҿа» аҿы аиааира игеит, ҳәа адырра ҟанаҵоит Аԥсны аҿари аспорти русқәа рзы Аҳәынҭқарратә Еилакы.

Аспортсмен  иҿазыҟаиҵоит шәачатәи аиқәԥаратә клуб «Левша» аҿы. Напхгаҩцәас имоуп  Ашот Пашиани Арсен Хамалиани. Атурнир аҿы иара Ареспублика Аԥсны, Аԥсны «MMA» Аидгылара Афедерациа ахьӡала дықәгылон.