Аҟәа. Цәыббрамза 4, 2024 шықәса. Аԥсныпресс. Аҩныҵҟатәи аусқәа Рминистрра аекономикатә шәарҭадареи акоррупциа аҿагылареи Русбарҭа аусзуҩцәа Аԥсны Аҳәынҭстандарт аспециалистцәа рыцырхырааны имҩаԥыргаз аоперативтә усмҩаԥгатәқәа ирылҵшәаны Аҟәа ақалақь аҿы ирыԥшааит амаининг-фермақәа ҩба.    

Аҩныҵҟатәи аусқәа Рминистрра апресс-маҵзура иҟанаҵо адыррақәа рыла, актәи аус зуаз амаининг-ферма Лагәлаа имҩа  аргылара  2А  аҿы иҟоу аспорттә зал аҩныҵҟа ирыԥшааит. Аконфискациа азуп афымцацәаҳәақәа иаҿакыз акриптовалиута арҳара иазку аппаратқәа быжьба, ҳәа адырра ҟанаҵоит Аԥсны аҩныҵҟатәи аусқәа Рминистрра апресс-маҵзура.  Аобиект аԥшәма Казариан Анжела Валери-иԥҳа лганахьала административтә материал еиқәыршәоуп.

Аҟәа. Нанҳәамза 4, 2024 шықәса. Аԥсныпресс. 90-шықәса дшырҭагылаз иԥсҭазаара далҵит еицырдыруа ауаажәларратәии аполитикатәии аусзуҩ, Апарламент актәи ааԥхьара адепутат, Апарламент Аиҳабы ихаҭыԥуаҩ, Аԥсны Афырхаҵа – Альберт Тополиан.

Аҟәа. Цәыббрамза 4, 2024 шықәса. Аԥсныпресс. Аԥсны адәныҟатәи аусқәа рминистр Сергеи Шамба Урыстәыла иҟоу Аԥсны ацҳаражәҳәаҩ Алхас Кәыҵниа диԥылеит.

Адәныҟатәи аусқәа Рминистрра апресс-маҵзура иҟанаҵо адыррақәа рыла, аиԥылара аҿы ҷыдала ахшыҩзышьҭа аҭан аԥсны-урыстәылатәи аҩгантәи аизыҟазаашьақәа  ирыдҳәалоу актуалра злоу азҵаарақәа рылацәажәара.

Аҟәа. Цәыббрамза 4, 2024 шықәса. Аԥсныпресс.   Риҵатәи ареликттә милаҭтә парк аспециалистцәа аҩада-мраҭашәаратәи аганахьала Аџьарра ашьха ашьапаҿы ашьхарнаша ҩежь ҳәа изышьҭоу аҵиаа аԥшаареи, иара убас шамахамзар уаҳа џьара иуԥымло егьырҭ аҵиаақәа ҭырҵаауеит.

Аекспедициа амҩаԥгараан уи иалахәу аспециалистцәа амшын аҩаӡара ахыхь 2 600 метра рҟынӡа ахалареи  18 километр аиасреи рылдыршеит.

Аҟәа. Цәыббрамза 4, 2024 шықәса. Аԥсныпресс. Иҭыҵит Аԥсны аҭҵаарадыррақәа Ракадемиа апрезидент Зураб Џьапуа имонографиа «Нарҭаа ирыхҳәаау аԥсуа епос».  Ашәҟәы иалалеит аԥсышәала иҩу аҭҵаарақәеи атекстқәеи, ҳәа адырра ҟанаҵоит Аԥсны аҭҵаарадыррақәа Ракадемиа апресс-маҵзура.  

Зураб Џьапуа иԥсҭазаара аиҳарак афольклористика, кавказдырра, аепосҭҵаара иазикит. Уи инаукатә ҭҵаарақәа рҿы иҷыдоу аҭыԥ ааннакылоит  - нартиада. Зураб Џьапуа имонографиа – аҵарауаҩ шықәсырацәа инеиԥынкыланы инаигӡоз иусура иалҵшәахеит, уи хыԥхьаӡара рацәала инапы иҵыҵыз инаука-ҭҵааратә усумҭақәа реизак ауп.  Аҵарауаа ргәаанагарала, иарбоу аҭҵаарадырратә усумҭа абызшәеи амҽхаки ҳасаб азуны уахәаԥшуазар, уи ҳәарада нарҭҭҵаара (нартоведение) хра злоу алагала ауп. Автор игәаанагарала, ари аусумҭа агуманитартә наукақәа аԥсуа бызшәала рыҿиара аганахьала иҿыцу импульсны иҟалар алшоит.

Аҟәа. Цәыббрамза 4, 2024 шықәса. Аԥсныпресс. Урыстәылатәи Афедерациа Ахада Владимир Путин «1941 – 1945шш. Аџьынџьтәылатәи еибашьра Дуӡӡа аҿы Аиааира агара Амш  80-шықәса ахыҵра» ҳәа аиубилеитә медал аԥҵара азы Аусԥҟа инапы аҵаиҩит.

«1941 – 1945 шш. Аџьынџьтәылатәи еибашьра Дуӡӡа аҿы Аиааира агара Амш  80-шықәса ахыҵра инамаданы, аибашьра аветеранцәа иаадырԥшыз афырхаҵара, агәымшәара, ахацәнымырхара аҳаҭыр азы ишьақәсырӷәӷәоит:

Аҟәа. Цәыббрамза 3, 2024 шықәса. Аԥсныпресс. Аԥсны адәныҟатәи аусқәа рминистр Сергеи Шамба имҩаԥигаз абрифинг атема хадас иҟалеит «Урыстәылатәи Афедерациа  Ахада Иусбарҭа анапхгаҩы  ихаҭыԥуаҩ Дмитри Козаки Аԥсны Аҳәынҭқарра Ахада Аслан Бжьаниеи реилацәажәара апкаанҵа» ҳәа хыс иаманы мышқәак раԥхьа асоциалтә ҳақәа аԥснытәи асегмент аҿы ицәырҵыз аусшәҟәы.  

«Сара сыхьӡала еиԥш Аҳәынҭқарратә шәарҭадара Ахеилак амаӡаныҟәгаҩи Аҳәынҭқарра Ахада ихьӡалеи ҳтәыла аоппозициатә аполитикатәи ауаажәларратәи аусзуҩцәа рнапы зҵарыҩыз ақьаад ааит. Дара иарбоу аусшәҟәы ахаҭара иазҵаауан.  Убри инамаданы иацы (цәыббрамза 2 рзы – АП аред. азгәаҭара) ҳара адәныҟатәи аусқәа Рминистрра аҿы аиԥылара ҳаман. Уи рхы аладырхәит Рауль Лолуа, Кан Кәарҷиа, Адгәыр Арӡынба, Омар Смыр. Ҳара сааҭки бжаки инарзынаԥшуа инарҭбааны, инҭкааны, акы бжьамыжькәа иарбоу азҵаарала ҳаилацәажәон, сара сгәаанагарала, ари атема нагӡаны аилкаара аиуит. Аха, ауаажәларра рыҩныҵҟагьы аинтересс ӷәӷәа ахьыҟоу инамаданы, сара абрифинг амҩаԥгара сақәшаҳаҭхеит, азҵаарақәа рҭак аҟаҵарагьы сазхиоуп», - ҳәа иҳәеит Сергеи Шамба.

Иарбоу аусшәҟәы ахаҭара иадҳәаланы акәзар, Сергеи Шамба иажәақәа рыла, аофициалтә каналқәа рыла аиԥш-зеиԥшу џьара акы мааӡеит.  

«Уи атәы  сара исҳәеит аоппозициатә мчрақәа рхаҭаранакцәеи сареи ҳиԥылараҿгьы. Ҳара уи ихаҭоу аофициалтә усшәҟәып ҳәа ҳазҳәаӡрм, убри аан, уаҟа иқәыргылоу азҵаарақәа, изныкымкуа уажәаԥхьагьы еиуеиԥшым аиԥыларақәа рҿы ирылацәажәахьан, Аԥсны Аҳәынҭқарра Ахада Урыстәылатәи Афедерациа Ахада Иусбарҭа аҿы иԥыларақәагьы уахь иналаҵаны. Излацәажәоз ҳхахьы иаҳгаз аҭакԥхықәрақәа рынамыгӡара иалкаау санкциақәак рымҩаԥгара цәырнагар алшоит ҳәа акәын», – ҳәа иҳәеит Сергеи Шамба. Убри аан иара иазгәеиҭеит асанкциақәа аусура ишалагаз цәыббрамза 1 инаркны.

«Цәыббрамза 1 инаркны ашәатәқәак рфинансыркара аанкылоуп. Уи зыдҳәалоу аҳақьымцәа, арҵаҩцәа, амчратә структурақәа, уҳәа роуп. Уи, еилкаау усуп, раԥхьатәи ашьаҿакәа роуп макьаназы.  Иара убас, шьҭарнахыс есӡынра зда ԥсыхәа ҳамамкәа иааҳадгыло афымцамч Урыстәылантәи аиагара азҵаара аӡбарагьы ауадаҩрақәа ацлоит. Уажәшьҭарнахыс уи ахәԥса ахшәаара акоммерциатә шьаҭала имҩаԥгатәхоит», – ҳәа иазгәеиҭеит Сергеи Шамба.

Иара иазгәеиҭеит, апкаанҵа аҿы излацәажәо аиԥылара мҩаԥысит нанҳәамза 19 рзы Урыстәыла Ахада Иусбарҿа аҿы, убри аан, асоциалтә ҳақәа рҿы ирыладырҵәаз аусшәҟәы, иара ишарбоу ала еиқәыршәан нанҳәамза  26 рзы.

Аҟәа. Нанҳәамза  30, 2024 шықәса. Аԥсныпресс. Нанҳаәмза 30 рзы – диит асоветтә атлетика ласы аспортсменка, 1980 шықәсазтәи Аолимпиатә хәмаррақәа рҿы араӡнытә аԥхьахә згаз Саида Гәынба (30.08.1959 – 24.11.2018 шш.). Лара иахьа лыԥсы ҭазҭгьы илхыҵуан 65 шықәса.  

Аԥхынтәи Аолимпиатә хәмаррақәа рҿы Саида Гәынба Асовет Еидгыла еизгоу акоманда ахьӡала дықәгылон, уи 1980 шықәсазы аԥса аршәразы араӡны медал лгеит, уи  67,76 метр рҟнӡа аԥса лыршәит. Саида Гәында аԥса аршәраҿы хаҭалатәи лрекорд — 68,28 м. рҟынӡа инаӡон, уи   1980 шықәсазы ишьақәыргылан.  Саида Гәынба Асовет Еидгыла ҩынттәи ачемпионка 1978, 1979 шш.

Аҟәа. Цәыббрамза 2, 2024 шықәса. Аԥсныпресс. Аԥсни Урыстәылеи ирыбжьоу аҳәынҭқарратә ҳәаа аҿы ирымырхыз х-машьынак Иҷыдоу Арратә Операциа аҭаххрақәа рзы идәықәырҵеит, ҳәа адырра ҟанаҵоит Урыстәылатәи Афедерациа Афедералтә ҳазалхратә Маҵзура Аладатәи аҳазалхратә Усбарҭа аофициалтә саит.

Автомашьынақәа «Mazda», «Toyota Alphard», «Chevrolet Niva» Аԥснынтәи Урыстәылаҟа аҳазалхратә закәанԥҵара аилагарала аиагаразы рҽазыршәеит. Атранспорттә хархәагақәа Евразиатәи Аекономиатә Еидгыла аҳазалхратә ҳәаа ала изакәанымкәа атауарқәа рахгара афактқәа рыла административтә уснагӡатәқәа рымҩаԥгара аҳәаақәа ирҭагӡаны иаарԥшын иагьрымырхит Краснодартәи аҳазалхра Ганрацәалатәи амашьынақәа роушьра-гәаҭаратә Ҭыԥ «Адлер» аҿы. Аӡбарҭа аӡбамҭала иарбоу атранспорттә хархәагақәа аҳәынҭқарра ахатәрахьы ииаган. Иахәҭоу аусшәҟәқәа анеиқәыршәаха ашьҭахь аҳазалхра аусзуҩцәа зконфискациа мҩаԥгаз амашьынақәа атәылахьчара Аминистрра ахаҭарнакцәа ирырҭеит.

Аҟәа. Цәыббрамза 3, 2024 шықәса. Аԥсныпресс. 16 шықәса раԥхьа, цәыббра 3, 2008 шықәсазы, Хосе Даниель Ортега Сааведра инапы аҵеиҩит Аԥсны ахьыԥшымра азхаҵаразы Адекрет.

Аԥсны адәныҟатәи аусқәа рминистр Сергеи Шамба никарагуатәи иколлега Денис Роналдо Монкаде Колиндрес адныҳәаларатә шәҟәы изиишьҭит.