Адиаспорақәа рхаҭарнакцәа адәныҟатәи аусқәа рминистр Олег Барцыц напхгара зиҭо Аԥсны Аҳәынҭқарра аделегациа гәыкала ирыдыркылеит.

Еиуеиԥшым ахырхарҭақәа рыла имҩаԥысуаз аиԥыларақәа рҿы адиаспорақәа рыдгылареи урҭ рҭоурыхтә ԥсадгьыли дареи реимадара арӷәӷәареи ирыдҳәалоу азҵаарақәа ирылацәажәеит. Аусмҩаԥгатәқәа ирылахәыз азҿлымҳара рыман аминистр Шьамтәыла иҟазаара шымҩаԥысуаз азы.

Олег Барцыц шьамтәылатәи иколлега, адәныҟатәи аусқәеи аҳәаанырцә иҟоу аџьынџьуаа русқәеи рзы аминистр Асад Ҳасан Аль-Шаибании иареи реиԥылара далацәажәеит. Уи аан аполитикатәи, ахәаахәҭратәи, аекономикатәи ҟазшьа змоу еиуеиԥшым азҵаарақәа ишрылацәажәаз иҳәеит. Аиԥылараҿы Шьамтәыла адәныҟатәи аусқәа Рминистрра анапхгаҩы атәыла анапхгара ҿыц Аԥсны Аҳәынҭқарреи дареи реизыҟазаашьақәа аринахысгьы рыҿиареи рырӷәӷәареи рыҽшазыршәо азы адырра ҟаиҵеит.

Аиԥыларақәа рҿы Аԥсны адәныҟатәи аусқәа Рминистрра анапхгаҩы дызԥылоз ажәа риҭеит Шьамтәыла инхо аԥсуа-адыгатәи ачерқьестәи диаспорақәа рхаҭарнакцәа рҭоурыхтә ԥсадгьыл ахь раареи рцареи рзы алшара рыҭаразы иназыцҵо аусмҩаԥгатәқәа шымҩаԥгахо. Аминистр инаҵшьны иазгәеиҭеит, аҳәынҭқарра ацхыраарала аԥсуа-адыгатәи ачерқьестәи диаспорақәа рхаҭарнакцәа иреиҳау аҵара аиуразы алшара рызҭо апрограммақәа шеиҿыркаауа.

Олег Барцыц адиаспорақәа рхаҭарнакцәа Аԥсны Аҳәынҭқарра Ахада Бадра Гәынба иҟынтәи асаламшәҟәқәеи азеиӷьашьарақәеи рызнеигеит. Иазгәаҭан, Аԥсны Аҳәынҭқарра анапхгара аҳәаанырцә инхо рџьынџьуаа ҷыдала хшыҩзышьҭра шрырҭо, аринахысгьы иахьынӡалшо ацхыраара шыҟарҵало.