Аҟәа. Ԥхынгәымза 16, 2024 шықәса. Аԥсныпресс.  Урыстәыла аекономикатә ҿиара аминистр Максим Решетникови Аԥсны аԥыза-министр ихаҭыԥуаҩ,  аекономика аминистр Кристина Озгани «Урыстәылатәи Афедерациа Анапхгареи Ареспублика Аԥсны Анапхгареи ирыбжьарҵахьаз атауарқәа рыла ахәаахәҭразы арежим азы Аиқәшаҳаҭра аԥсахрақәа ралагаларазы» Аԥкаанҵа рнапы аҵарҩит.

Аусшәҟәы анапаҵыҩра мҩаԥган Грозныи ақалақь аҿы имҩаԥысуа Кавказтәи аинвестициатә Форум аплошьадка аҿы.

Аԥсны аекономика Аминистрра апресс-маҵзура иҟанаҵо адыррақәа рыла, иарбоу Аусшәҟәы  Урыстәылантәи ареспубликахь иаарго афатәаалыҵтә тауарқәа, аргыларатә маҭәахәқәа рыхәқәҵара азҵаараҿы Аԥсны азы еиҳа иманшәалоу аҭагылазаашьақәа раԥҵара иазырхоуп.

Аҟәа. Ԥхынгәымза 16, 2024 шықәса. Аԥсныпресс. Ԥхынгәымза 15 рзы, Аԥсны Аҳәынҭқарра Ахада Аслан Бжьаниа Апарламент адепутатцәа, Аԥсны араионқәеи ақалақьқәеи рхадацәа алархәны инарҭбааз аилатәара мҩаԥигеит. Абри атәы аанацҳауеит Аҳәынҭқарра Ахада ипресс-маҵзура.

Аиԥылара иалахәын, иара убас Аҳәынҭқарра Ахада ихаҭыԥуаҩ Бадра Гәынба, атәыла аԥыза-аминистр Анқәаб Алеқсандр, Жәлар Реизара Аиҳабы Ашәба Лаша, Аконстиуциатә ӡбара ахантәаҩы Диана Ԥлиа, апрокурор Хада Адгәыр Агрба, Аҳәынҭқарра Ахада Иубарҭа анапхгаҩы Абесалом Кәарҷиа, Иреиҳаӡоу Аӡбара Ахантәаҩы Саида Быҭәба, Ашәарҭадара Ахеилак Амаӡаныҟәгаҩ Сергеи Шамба, Аҳәынҭқарра Ахада Иусбарҭа  анапхгаҩы ихаҭыԥуаҩ Зураб Қаџьаиа, аиҳабыра алахәылацәа, амчратә усбарҭақәа рнапхгаҩцәа.

Амшхәаԥштә аҟны иқәгылан «Аԥсны Аҳәынҭқарра Очамчыра, Тҟәарчал, Гал араионқәа рсоциал-економикатә ҿиара аҩаӡара ашьҭыхразы уснагӡатәқәак рзы» азакәан апроект алацәажәара. Адепутатцәа  Герман Қарчаа, Беслан Емырхәба, Алмас Акаба Аԥсны Жәлар Реизара - Апарламент аҟны ашәҟәы иҭаргалаз ари азакәанапроект хықәкыс иамоуп Аԥсны мрагыларатәи арегионқәа рыҟны асоциал-економикатә ҭагылазаашьа аиӷьтәра.

Аҟәа. Ԥхынгәымза 15, 2024 шықәса. Аԥсныпресс. Аҳәынҭқарра  Ахада Аслан Бжьаниа Асахьаркыратә гимнастика Урыстәылазегьтәи афедерациа апрезидент, асахьаркыратә гимнастика азы еизгоу Урыстәыла азыҟаҵаҩ хада, Урыстәыла зҽаԥсазтәыз азыҟаҵаҩ Ирина Винер  дидикылеит.

Асас аԥсшәа лаҳәо, Аҳәынҭқарра Ахада иазгәеиҭеит, Ирина Венер Урыстәыла  еиԥш Аԥсынтәылагьы дшеицырдыруа. «Шәара шәырдыруеит еизҳауа абиԥарақәа рыҿиара аус аҟны аҵак ду змоу шәлагаламҭазы», - ҳәа иҳәеит Аҳәынҭқарра Ахада.

Аҟәа. Ԥхынгәымза 15, 2024 шықәса. Аԥсныпресс.  Ԥхынгәымза 15 рзы адепутат Беслан Ҳалуашь ихантәаҩрала имҩаԥысит абиуџьети акредиттә еиҿкаарақәеи ашәахтәқәеи афинансқәеи рзы апарламенттә Еилакы аилатәара. Аилатәара рхы аладырхәит Апарламент адепутатцәа, Апарламент аҿы Аҳәынҭқарра Ахада Изинмчы змоу Ахаҭарнак Баҭал Аиба, ашәахтәқәеи аизгақәеи рзы аминистр Михаил Габелиа.

Аусшәҟәы адгалара мҩаԥигеит Аԥсны Аҳәынҭқарра Ахада Изинмчы змоу Ахаҭарнак Баҭал Аиба.

Аилатәара иалахәыз имаҷууи ибжьаратәуи аусдкылара асубиектқәа ирықәу ашәахтә қәыӷәӷәара армаҷреи ашәахтәқәҵареи аҳасабырба аҟаҵареи  ирыдҳәалоу апроцедурақәа рырмариареи азԥхьагәазҭо «Ирмариоу ашәахтәқәҵаратә система азы» азакәан апроект иахәаԥшит, ҳәа адырра ҟанаҵоит Жәлар Реизара-Апарламент аофицалтә саит.

Азакәан апроект авторцәа ргәаанагарала, уи ахықәкы хаданы иҟоуп ареспублика аҿы имаҷууи ибжьаратәуи аусдкылара асубиектқәа рыҿиаразы иманшәалоу аҭагылазаашьақәа раԥҵара.

Адепутатцәа ахшыҩзышьҭра аҭаны аиҭакрақәеи ацҵақәеи реихшанҵа (атаблица) иарбоу ирыдгалаз азакәан апроект ахь аиҭакрақәа ирыхәаԥшит, иалацәажәеит, анаҩс уи иааиуа Апарламент асессиа аилатәара аҿы аҩбатәи аԥхьараҿы адкыларазы ажәалагала аҟаҵаразы аӡбамҭа рыдыркылеит.  

Аҟәа. Ԥхынгәымза 15, 2024 шықәса. Аԥсныпресс.  «Сара сзы гәахәара дууп сыԥсадгьыл аҟны сҩызцәеи сареи сыжәлар ирызнаҳго аныҳәазы алшара ахьҳамоу. Насыԥны исыԥхьаӡоит ари адгьыл аҟны сахьиз», - ҳәа Аҳәынҭқарра Ахада Аслан Бжьаниа иԥылара ашьҭахь ажурналистцәа дрыҿцәажәо илҳәеит Аԥсни Урыстәылеи Жәлар рартистка Хьыбла Герзмааԥҳа.

Иахьа Аслан Бжьаниа Аԥсни Урыстәылеи Жәлар рартист, «Ахьӡ-Аԥша» аорден I аҩаӡара акавалер Хьыбла Гьерзмааи урыстәылатәи аоператә шәаҳәаҩы, Урыстәыла зҽаԥсазтәыз артист  Ильдар Абдразакови идикылеит.

Хьыбла Герзмаа иазгәалҭеит иахьа лара ишлыцқәгыло Мариинтәи атеатр асолистцәа.

Аҟәа. Ԥхынгәымза 15, 2024 шықәса. Аԥсныпресс.  Грозныи ақалақь, Чечентәи Ареспублика Ахада  ирезиденциа аҿы, ацәыргақәҵатә Центр «Павильон «Стройкар» (ЭКСПО)  аплошьадка аҿы аусура иалагеит Кавказтәи аинвестициатә Форум. Асасцәа ирзыԥшуп игәылҭәаау аусутә программа, инарҭбаау ацәыргақәҵатә експозициа, иара убас аспорттә усмҩаԥгатәқәа рацәаны.

Афорум иалахәхо аԥснытәи аделегациа аилазаараҿы иҟоуп: атәыла аԥыза министр ихаҭыԥуаҩ, аекономика аминистр Кристина Озган, аԥыза министр ихаҭыԥуаҩ, афинансқәа рминистр Владимир Делба, аекономикатә политиказы апарламенттә Хеилак ахантәаҩы ихаҭыԥуаҩ Бадрик Ԥлиа, Абжьаҟазаратә ӡбарҭа ахантәаҩы Фатима Кәыҵниаԥҳа.

Аҟәа. Ԥхынгәымза 15, 2024 шықәса. Аԥсныпресс. Аслан Бжьаниа Аԥсни Урыстәылеи жәлар рартист, «Ахьӡ-Аԥша» аорден I аҩаӡара акавалер Хьыбла Гьерзмааи урыстәылатәи аоператә шәаҳәаҩы, Урыстәыла зҽаԥсазтәыз артист  Ильдар Абдразакови идикылеит.

Аҳәынҭқарра Ахада асасцәа аԥсшәа раҳәо, иазгәеиҭеит афестиваль «Хьыбла Гьерзмаа шәаалыԥхьоит» ҩажәижәаба шықәса ишрықәу шьҭа, уи амҩаԥгара ареспублика акультуратә ԥсҭазаараҿы кыр шаҵанакуа.

Ари, уи иажәақәа рыла, аԥсуа публика иҳараку акультура радԥхьаларазы лшара дууп. «Ари азы ҷыдала иҭабуп ҳәа шәасҳәоит», - ҳәа инаҵшьны иазгәеиҭеит Аҳәынҭқарра Ахада.

Ильдар Абдразаков иахь ихы рханы, Аҳәынҭқарра Ахада иҳәеит:

«Издыруеит, Шәара Хьыбла Герзмаа лыдагьы егьырҭ ҳџьынџуаагьы аиҩызара шшәыбжьоу. Уи ҳара ҳзы гәахәара дууп. Аԥсны есымша шәара шәзы иаартуп, шәабара ианакәызаалак ҳаигәырӷьоит».

Хьыбла Гьерзмаа Аслан Бжьаниа иҭабуп ҳәа иалҳәеит аиԥыларазы, аклассикатә музыка афестиваль амҩаԥгараҟны атәыла анапхгара иҟанаҵо адгыларазы.

«Сара сзы гәахәара дууп сы-Ԥсадгьыл аҟны сҩызцәеи сареи сыжәлар ирызнаҳго аныҳәазы алшара ахьҳамоу. Насыԥны исыԥхьаӡоит ари адгьыл аҟны сахьиз», - ҳәа илҳәеит аоператә шәаҳәаҩы. 

Аҟәа. Ԥхынгәымза 15, 2024 шықәса. Аԥсныпресс.  Аԥсны Аҳәынҭавтоинспекциа Аусбарҭа аҿы имҩаԥысит Дамеи Аҩӡба Аусбарҭа анапхгаҩы аамҭала инапынҵақәа рынагӡаҩыс иҟаҵара зцыз атәыла аҩныҵҟатәи аусқәа Рминистрра аусуратә еилатәара.

Аҩныҵҟатәи аусқәа рминистр Роберт Киути аминистр ихаҭыԥуаҩ Беслан Чкадуеи  Автоҳәынҭинспекциа Аусбарҭа анапхгаҩы ҿыц зыԥшра ҟамҵакәа зынагӡаа алыршатәу ахыдҵақәа ирҭеит. Аҩныҵҟатәи аусқәа Рминистрра аҿы ижәны амашьына аԥсҟы зкуа амашьынарныҟәцаҩцәа рхьырхәра иазкны иҿыцу ауснагӡатәқәа азԥхьагәаҭоуп. Ахәҭакахьала, урҭ мызкы ҳәа аҽҳәара аҭаны рмашьынақәа рымхра азы аԥшьгара ҟаҵоуп.  

Аҟәа. Ԥхынгәымза 15, 2024 шықәса. Аԥсныпресс. Аԥсны Жәлар Реизара –Апарламент Аиҳабы Лаша Ашәба зыԥсҭазаара иалҵыз Ареспублика Аԥсны Апарламент I ааԥхьара адепутат Альфред Леонид-иԥа Какуев иҭаацәа дрыдышшылеит.

Адышшыларатә шәҟәы аҿы иаҳәоит:

«Ареспублика Аԥсны Жәлар Реизара– Апарламент Аԥсны Жәлар Реизара-Апарламент I ааԥхьара (1991–1996 шш.) адепутат – Альфред Леонид-иԥа Какуев иԥсҭазаара дахьалҵыз инамаданы иуацәеи иҭынхацәеи ирыдышшылоит.  

Аҟәа. Ԥхынгәымза 15, 2024 шықәса. Аԥсныпресс. Аминистрцәа Реилазаара гәалсра дула ирыдышшылоит зыԥсҭазаара иалҵыз  Аԥсны зҽаԥсазтәыз ажурналист, ашәҟәыҩҩы, апублицист, агазеҭ «Эхо Абхазии» аредактор Хада Витали Валериан-иԥа Шариа иҭаацәа.

50 шықәса инареиҳаны Витали Валериан-иԥа Шариа Аԥсны амассатә информациа ахархәагақәа рҿы аус иуан, идуу арҿиаратә мҩа данысит. Егьырҭ аӡәырҩы инагоу аспециалистцәа реиԥш иаргьы амилаҭтә ихьыԥшым апресса ахыҵхырҭаҿы дгылан. Аԥсны жәлар Рџьынџьтәылатәи еибашьра раԥхьатәи амшқәа инадыркны Аиааира Амш аҽнынӡа Витали Валериан-иԥа Шариа иколлегацәа дрывагыланы Гәдоуҭа ақалақь аҿы агазеҭ «Республика Абхазия» ҭижьуан, иара убри ала Аԥсадгьыл ахьчаҩцәа хәызмаӡам аинформациатә дгылара риҭон. Иара икалам иҵыҵыз аповестқәеи ажабжь шьахәқәеи иԥхьагылоу урыстәылатәи ажурналқәа: «Наш современник», «Смена», «Свет», иара убас есымчыбжьа иҭыҵуаз «Литературная Россия» адаҟьақәа ирнылон.